فوتو: inform.kz

ءار مينۋت، ءار ساعات، ءار كۇن سايىن ەلىمىزدە، الەمدە حالىقتى ەلەڭ ەتكىزەر ماڭىزدى جاڭالىقتار بولادى. ال ونىڭ ءبىرى كوزگە ىلىنسە، ەندى ءبىرى نازاردان تىس قالىپ جاتادى. ەندەشە The Qazaq Times وقىرماندارى ءۇشىن 4-9 قىركۇيەك ارالىعىندا بولعان ەڭ ماڭىزدى ەكونوميكا جاڭالىقتارىنا شولۋ جاسايدى. 

الماتىدا بەنزين قىمباتتادى

وسى اپتادا قازاقستاندا بەنزين مەن ديزەل وتىنىنىڭ باعاسى تامىز ايىنان باستاپ بىرتىندەپ قىمباتتاعانى تۋرالى ءمالىم بولدى. مىسالى الماتى قالاسىندا اي-92 ماركاسىنىڭ ءليترى - 145-147 تەڭگە  (تامىز ايىندا 143 تەڭگە بولعان), ديزەل وتىنىنىڭ ءليترى - 145-147 تەڭگە (1 تەڭگەگە قىمباتتاعان), اي-95 ماركاسى —158-159 تەڭگە ارالىعىندا ساتىلىپ جاتىر.

قوناقجاي ەلدەردىڭ ءتىزىمى: قازاقستان قاي ورىندا؟

Passport Index پورتالى الەمدەگى قوناقجاي ەلدەردىڭ ءتىزىمىن جاريالادى.   رەيتينگ ناتيجەسى بويىنشا، قازاقستان 74 ورىندا. ال ەڭ قوناقجاي ەلدەردىڭ العاشقى وندىعىن كومور ارالدارى وداعى، كوت-د'يۆۋار، گۆينەيا-بيساۋ، ماداگاسكار، مالديۆ، ماۆريتانيا، ميكرونەزيا فەدەراتيۆتى شتاتى، موزامبيك، ساموا باستاپ تۇر. ودان كەيىنگى ورىندارعا سەيشەل، شىعىس تيمور، توگولەز رەسپۋبليكاسى، تۋۆالۋ جانە ۋگاندا جايعاسقان.

كەڭەس كەزىندەگى ەلدەردىڭ ىشىندە ارمەنيا 29 ورىندا بولسا، ۋكراينا - 49, گرۋزيا – 51, قىرعىزستان 60 ورىندى يەلەنىپ، قازاقستاننان بۇرىن تۇر. رەسەي - 83, وزبەكستان – 96, ازەربايجان – 97 ورىندا.

قازاقستاندا جەكە كريپتوۆاليۋتا قاشان پايدا بولادى؟

قر قارجى مينيسترلىگىنىڭ مەملەكەتتىك كىرىستەر كوميتەتى كريپتاۆاليۋتانى ىسكە قوسۋدىڭ ءبازيسى قالاي دايىندالىپ جاتقانى تۋرالى ايتتى. كوميتەتتىڭ مالىمەتىنشە، كريپتوۆاليۋتاعا ءوتۋ ەلدىڭ سالىق جۇيەسىن وڭتايلاندىرۋعا قاتىستى شارالار قابىلدانعاننان كەيىن جۇزەگە اسادى. سونداي-اق، كوميتتەتتىڭ اقپاراتىنشا، ەڭ الدىمەن قوسىمشا قۇن سالىعىن اكىمشىلەندىرۋ اياسىندا بلوكچەين تەحنولوگياسىن ەنگىزۋ اياقتالۋ كەرەك. ال بۇل جۇيە ققس-نى قايتارۋدى اۆتوماتتاندىرادى جانە جەمقورلىق پەن الاياقتىق ىستەردىڭ الدىن الادى.

ەنەرگەتيكا مينيسترلىگى بەنزيننىڭ نە ءۇشىن قىمباتتاعانىن ءتۇسىندىردى 

قر ەنەرگەتيكا مينيسترلىگى بەنزين باعاسىنىڭ نەلىكتەن قىمباتتاعانىن ءتۇسىندىردى. ۆەدومستۆونىڭ سوزىنشە، باعانىڭ قىمباتتاۋى رەسەي جانارمايىنىڭ يمپورتتالۋىمەن  بايلانىستى. "قازىر رەسەي بەنزينىنىڭ ۇلەسى كوبەيدى، باعا ءبىراز قىمباتتايدى. قازىر باعانىڭ قۇبىلۋ ماۋسىمى، سەبەبى زاۋىت جۇمىستارى توقتاعان سوڭ سۇرانىس ارتادى. ءبىز قازان ايىنىڭ سوڭىنا دەيىن بالانس رەتتەلەدى دەپ ويلايمىز. باعا نارىق جاعدايىنا بايلانىستى بولادى", - دەگەن ەدى مينيسترلىك وكىلى قۋانىش قۇدايبەرگەنوۆ.

ايتا كەتەيىك، ۇكىمەت تەڭگە قۇبىلسا، بەنزين قىمباتتاسا، ەكونوميكا السىرەسە رەسەي نارىعىمەن بايلانىستىرۋدى ادەتكە اينالدىرعان. مۇمكىن شىنىمەن دە سولاي شىعار. الايدا "زاۋىتتار جوندەۋ جۇمىستارى ءۇشىن جابىلاتىن بولسا، ءوندىرىس نەگە ارتىق ورىندالماعان؟" دەگەن سۇراق تۋىندايدى. ونىڭ ۇستىنە بەنزين باعاسى قىمباتتاپ، ونىڭ قايتا ءتۇسۋى وسى ۋاقىتقا دەيىن بولا قويعان جوق.

رەسەي قازاقستان قانتىنان باس تارتقىسى كەلەدى

رەسەيدىڭ اۋىل شارۋاشىلىق مينيسترلىگى قازاقستان مەن بەلارۋس قانتىنىڭ يمپورتىن شەكتەۋدى ۇسىندى. مينيسترلىك مۇنداي ۇسىنىستى وتاندىق وندىرىسكە قولداۋ ءبىلدىرۋ ءۇشىن جاساپ وتىر. فەدەراتسيانىڭ اۋىل شارۋشىلىق ءمينيسترى الەكساندر تكاچەۆتىڭ سوزىنشە، اتالعان ەكى ەل قانتتى باج سالىعىنسىز يمپورتتاپ وتىر جانە بۇل ەۋرازيالىق ەكونوميكالىق وداق ەلدەرى اراسىنداعى نارىق جاعدايىن قيىنداتادى ءارى رەسەيلىك وندىرۋشىلەر ءۇشىن ءتيىمسىز ەكەن.

وشاقباەۆ: قازاقستان تەڭگە كۋرسىن ەركىن اينالىمعا جىبەرمەۋ كەرەك 

تەڭگە كۋرسىن ەركىن اينالىمعا جىبەرۋ ساياساتى قازاقستانعا ءتيىمسىز. سوندىقتان ۇلتتىق بانك كۋرستى بەلگىلەۋ جۇيەسىن قاراستىرۋ كەرەك. "تالاپ" قولدانبالى زەرتتەۋ ورتالىعى" قوعامدىق قورىنىڭ ديرەكتورى راقىم وشاقباەۆ وسىلاي مالىمدەدىەكونوميستىڭ تۇسىندىرۋىنشە، ورتالىق ەلدەگى ينفلياتسيانىڭ وسۋىنە اسەر ەتىپ وتىرعان نەگىزگى فاكتورلارعا زەرتتەۋ جۇرگىزگەن. ناتيجە بويىنشا، ۇكىمەت پەن ۇلتتىق بانكتىڭ باعانىڭ كوتەرىلۋىنە قارسى شارالارى تەك 50%-عا ءتيىمدى بولىپ وتىر.

"قازاقستانداعى ينفلياتسيانىڭ جوعارىلاۋىنىڭ باستى فاكتورى - تەڭگەنىڭ قۇبىلۋى. ءبىزدىڭ ويىمىزشا، بۇل فاكتوردى رەتتەۋ قولعا الىنباسا، ينفلياتسيانى تۇراقتاندىرۋ بيلىككە قيىن بولادى. ال باسقالارى - ساتىۋشلارمەن، سپەكۋليانتتارمەن كۇرەسۋ جانە قورلاردى تۇراقتاندىرۋ  ەش ءتيىمدى بولمايدى. سوندىقتان ءبىزدىڭ ورتالىق تەڭگە كۋرسىن بەلگىلەۋ جۇيەسىنە قايتا ورالۋ كەرەك دەپ ەسەپتەيدى", - دەدى ول.

“The Qazaq Times”