ەكىباستۇزدا جىلۋ جەلىسىندەگى اقاۋعا "ستانتسيا قىزمەتكەرىنىڭ قاتەلىگى" سەبەپ بولعانى ايتىلدى

مەملەكەتتىك ەنەرگيا قاداعالاۋ كوميتەتى زەرتتەۋىنىڭ الدىن الا قورىتىندىسى بويىنشا، جىلۋ جەلىلەرىنىڭ بۇزىلۋىنا "ستانتسيا قىزمەتكەرىنىڭ قاتەلىگى سەبەپ بولعان". سونىڭ سالدارىنان جەلىدەگى قىسىم كۇرت كوبەيىپ، "جىلۋ جەلىسىندەگى كوپ قۇبىر جارىلعان" دەدى سكليار.

"27 قاراشادا ءبىر مەزەتتە 43 قۇبىر جارىلدى، 28 قاراشادا سونداي 30 وقيعا بولدى. ەكىباستۇزدا مۇنداي سيپاتتاعى اپات العاش رەت بولىپ وتىر" دەدى سكليار ەكىباستۇزداعى بريفينگ كەزىندە.

"اپات جىلۋ ەلەكتر ورتالىعىندا ەمەس، جەلىلەردە بولعان. كوپ قۇبىر جارىلىپ، جۇيەدەن سۋ كوپ كەتكەننەن كەيىن جىلۋ ەلەكتر ورتالىعىنداعى قازاندىقتار اۆتوماتتى تۇردە ءوشىپ قالدى" دەدى سكليار.

ونىڭ سوزىنە قاراعاندا، 1 جەلتوقساندا تاڭەرتەڭ 5 «ا» ىقشاماۋدانىنداعى جىلۋ ماگيسترالىندەگى سوڭعى ءىرى اقاۋ جويىلعانمەن جىلۋمەن قامتاماسىز ەتۋ جەلىسىندەگى تەپە-تەڭسىزدىكتەر مەن جەلىدەن سۋدىڭ شىعارىلۋى اتالعان ىقشاماۋدانداعى ۇيلەردى جىلۋ جەلىسىنە قوسۋعا مۇمكىندىك بەرمەي وتىر. 5 «ۆ» مەن 6-ىقشاماۋداندارداعى ۇيلەردى كەزەڭ-كەزەڭ بويىنشا جىلۋعا قوسۋ جۇمىستارى ءجۇرىپ جاتىر.

"بۇل 41-كوپ قاباتتى ءۇي. 2 جەلتوقساندا 5 "ا" ىقشاماۋدانىنداعى 17 ۇيگە جىلۋ بەرىلەدى" دەدى سكليار.

27 قاراشاعا قاراعان ءتۇنى 150 مىڭ تۇرعىنى بار ەكىباستۇزدا جەرگىلىكتى جىلۋ ەلەكتر ورتالىعىنداعى قازاندىقتار ىستەن شىعىپ, ونداعان كوپقاباتتى تۇرعىن ءۇي، سونىمەن بىرگە جەكە ۇيلەر مەن الەۋمەتتىك نىساندار 30 گرادۋس ايازدا جىلۋسىز قالعان.

ەكىباستۇزداعى جىلۋ ماگيسترالىندەگى اقاۋلاردان كەيىن بيلىك جەرگىلىكتى اۋماقتا تەحنوگەن سيپاتىنداعى توتەنشە جاعداي جاريالاعان. پرەزيدەنت قاسىم-جومارت توقاەۆ 1 جەلتوقساندا پاۆلودار وبلىسىنىڭ اكىمى ابىلقايىر ىسقاقوۆتى قىزمەتىنەن بوساتقان. وبلىس اكىمى مىندەتىن ۋاقىتشا ولەگ كرۋك اتقارادى. ول بۇعان دەيىن وبلىس اكىمىنىڭ ءبىرىنشى ورىنباسارى بولعان.