استاناداعى مينيسترلىكتەر ءۇيىنىڭ الدىندا ساياساتكەر، دەمپارتيا ليدەرى جانبولات ماماي باستاعان توپ نەسيە امنيستياسىن جۇرگىزۋدى تالاپ ەتىپ، مىڭداعان قازاقستاندىقتىڭ حاتىن پرەزيدەنت توقاەۆتىڭ كەڭسەسىنە، اقورداعا وتكىزۋگە باردى. بىراق باستاماشىل توپقا ارنايى جاساق كەدەرگى كەلتىرىپ بوگەدى. ارادا جارتى ساعات وتكەن سوڭ پرەزيدەنت اكىمشىلىگى كەڭسەسى 78 مىڭ ادامنىڭ ەلەكتروندى، 9,6 مىڭ ادامنىڭ قاعاز ءوتىنىشىن قابىلداپ الدى. 

ساعات 11:00-گە جوسپارلانعان ساياسي-الەۋمەتتىك شاراعا تىلشىلەر مەن دەمپارتيا جاقتاستارى جينالعان.

– باستى ماقساتىمىز – 100 مىڭعا تارتا ازاماتتىڭ قولى جينالعان قازاقستان حالقىنىڭ نەسيەلىك امنيستيا تۋرالى ارىزىن اقورداعا وتكىزەمىز. 5,5 ميلليونعا تارتا ازاماتتىڭ 4,4 ترلن تەڭگە بەرەشەگىن ءبىر رەتكە وتەۋگە مەملەكەتتىڭ شاماسى جەتەدى. ءبىر اي ىشىندە مەرزىم بەرەمىز. ەگەر شەشىم بولماسا، ءبىر ايدان سوڭ حالىقتى بەيبىت ميتينگكە شاقىرامىز. بيلىك حالىق تالاپ ەتكەندە، كوشەگە شىققاندا عانا قولعا الاتىن ادەتى بار، – دەدى دەمپارتيا باستاماشىل توبىنىڭ جەتەكشىسى جانبولات ماماي.

دەگەنمەن 100 مىڭ ادامنىڭ قولى قويىلعان حاتتى اقورداعا بەتتەگەن توپتىڭ الدىن ونداعان اسكەري بوگەپ، كوپىردەن دە، اينالما جولدان دا وتكىزبەي قويدى.

گرۋزيادا، ءباا، وڭتۇستىك كورەيادا، موڭعولياداعى نەسيەلىك راقىمشىلىق تاجىريەبەسىن العا تارتا وتىرىپ، ءدال مۇنداي كومەك پاندەميا كەزىندە اسا ماڭىزدى، قاجەتتى قادام دەپ سانايدى.

«نەسيەلىك امنيستيا جاريالاۋ قازاقستاندا وي̆لاپ تابىلعان باعدارلاما ەمەس. بۇعان دەي̆ىن گرۋزيادا 600 مىڭ ادامنىڭ 1.5 ميلليارد دوللاردى قۇراي̆تىن نەسيەسى كەشىرىلدى. موڭعوليا پرەزيدەنتى 2020 جىلى قاڭتار اي̆ىندا ەلدەگى بارلىق زەي̆نەتكەرلەردىڭ نەسيەسىن كەشىردى. نەسيەلىك امنيستيا وڭتۇستىك كورەيادا، بىرىككەن اراب امىرلىكتەرىندە دە جاريالاندى. سوندىقتان، الەمدىك پرەتسەدەنت بار.
نەسيەلىك امنيستيا جاريالاۋعا اقشا جوق دەگەن سىلتاۋعا دا ءبىز سەنبەي̆مىز. ءسىزدىڭ سوزىڭىزگە سەنسەك، ۇلتتىق قورىمىزدا 90 ميلليارد دوللار قاراجات بار. ودان بولەك، تاۋەلسىزدىك جىلدارىندا وفشورعا 140 ميلليارد دوللار اۋدارىلعان. سول اقشانى نەگە قاي̆تارماسقا؟» دەيدى ول.

شامامەن ساعات 11:10 وتكەندە الەۋمەتتىك قاشىقتىقتى ساقتاماي، شىنجىر تىزبەك قۇرىپ تۇرعان اسكەريلەردىڭ جولىن بوگەۋىنە نارازى بەلسەندى توپ «توقاەۆ، شىق!» دەپ ۇرانداستى.

اراسىنا ارانداتۋشى جىبەرىلدى دەگەن بەلسەندى توپ تەك «رەسمي ۋاكىل كەلىپ تالاپ-ارىزدى قابىلداپ الۋىن» سۇراپ تۇرعانىن ايتادى.

مينيسترلىكتەر ءۇيىنىڭ ماڭىندا توپتاسقان جۇرتقا ساعات 11:33-تە ءوزىن پرەزيدەنت اكىمشىلىگىنىڭ وتىنىشتەردى قاراۋدى باقىلاۋ ءبولىمى مەڭگەرۋشىسىنىڭ ورىنباسارى  قادىر دانيار رامازانۇلى دەپ تانىستىرعان ادام قۇزىرلى مەكەمەگە (مينيسترلىكتەر ءۇيىنىڭ 15 بلوگىنا – QT) ەرتىپ اكەتتى.

بەلسەندى توپتىڭ جەتى وكىلى كەڭسە قىزمەتكەرلەرىنە 78 مىڭ ازاماتتىڭ ەلەكتروندى نۇسقاداعى ارىزى مەن قاعاز تۇرىندەگى 9600 ارىزدى تاپسىرىپ جاتىر. تىكەلەي ەفير جۇرگىزىپ تۇرعان دەمپارتيا مۇشەسى جانبول راحماتۋللا كەڭسە تورىندە قازىرگى مەملەكەت باسشىسىنىڭ ەمەس، ەكس-پرەزيدەنت نازارباەۆتىڭ پورترەتى تۇرعانىن سىنعا الدى.

اقوردادان بۇقارالىق نەسيەلىك انيستيا جاساۋدى تالاپ ەتكەن دەمپارتيا قۇرامى. فوتو: جانبولات مامايدىڭ Facebook جەلىسىندەگى پاراقشاسىنان

جانبولات ماماي ەكى ايدان بەرى كۇنىنە ساعات 11-دەن 16:00-گە دەيىن ارىز قابىلداعانىن ايتادى.

تۇسكى ساعات 12:18-دە ماماي قورىتىندى ءسوزىن سويلەدى:

– ىندەتتىڭ قارقىنى اقىرىنداپ جاتىر دەدى عوي. قىركۇيەككە دەيىن ءبىر اي كۇتەيىك. تالاپتى ورىنداماسا، ميتينگكە شىعامىز. حالىقتىڭ اماناتىن تاپسىردىق. تالاپتى ورىنداتپاي قويمايمىز. توقاەۆ بۇكىل حالىقتىڭ نەسيەسىن ءبىر رەت كەشىرۋگە شەشىم قابىلداۋى ءتيىس. سوڭىنا دەيىن كۇرەسەمىز، – دەدى.

ماۋسىم ايى باستالعالى بەرى جانبولات ماماي الەۋمەتتىك جەلىلەر مەن ينتەرنەت ارقىلى كوروناۆيرۋسپەن قاتار كەلگەن ەكونوميكالىق اۋىر داعدارىستى باستان كەشىرىپ جاتقان ەلدى نەسيە راقىمشىلىعىن تالاپ ەتۋگە شاقىرىپ كەلەدى. دەموكراتيالىق پارتيا قۇرۋدى كوزدەيتىن توپ تامىزدىڭ باسىندا «ەستيتىن مەملەكەت»، «حالىق ۇنىنە قۇلاق اساتىن مەملەكەت» تۇجىرىمداماسىمەن ساياسات جۇرگىزۋگە ۋادە ەتكەن پرەزيدەنت قاسىم-جومارت توقاەۆتىڭ اتىنا اشىق حات جازىپ، اشىق دەرەككوزدەردە جاريالاعان ەدى.

"The Qazaq Times"