فوتو: ازاتتىق راديوسى

قىرعىزستان كەدەن قىزمەتىنىڭ جۇمىسىن جاقسارتپاسا، قازاقستان شەكارا باقىلاۋىن ودان ءارى كۇشەيتەدى – دەدى قر قارجى مينيسترلىگىنە قاراستى مەملەكەتتىك كىرىستەر كوميتەتى توراعاسىنىڭ ورىنباسارى گوسمان ءامرين جۋرناليستەر الدىندا سويلەگەن سوزىندە.

گوسمان ءامرين جۋرناليستەر الدىندا قازاق-قىرعىز قارىم-قاتىناسىنداعى جاعدايلاردى ءتۇسىندىرۋ بارىسىندا: «ءبىز قىرعىزستان تاراپىنا بۇل ماسەلەنىڭ ءبىر عانا شەشۋ جولى بار ەكەنىن تۇسىندىرگىمىز كەلەدى. ول – بىرلەسىپ جۇمىس ىستەۋ. بۇل بارلىق كەدەرگىلەردى جويىپ، اشىق جۇمىس ىستەۋگە مۇمكىندىك بەرەدى. ەگەر ولار بىزگە اقپارات بەرۋدەن باس تارتاتىن بولسا، بىزبەن قوسىلىپ جۇمىس ىستەمەيتىن بولسا، وندا قازاقستان تاراپى شەكارا باقىلاۋىن ءارى قاراي دا كۇشەيتۋگە ءماجبۇر بولادى. ءبىز بۇعان دەيىن قىرعىزستانمەن ەكى ەل اراسىنداعى تاۋارلاردىڭ باعاسى جايىنداعى اقپاراتپەن الماسۋعا كەلىسكەن بولاتىنبىز. ءبىز ولارعا وسى ماسەلەگە بايلانىستى قۇجاتتاردى جىبەردىك، ال ولار بىزگە قۇجاتتارىن ءالى جىبەرگەن جوق. ونىڭ ۇستىنە شەكارا داۋىنا بايلانىستى ماسەلەلەردى شەشۋگە باعىتتالعان «جول كارتاسى» باعدارلاماسىنا دا قول قويىلعان جوق» - دەگەن.

ەستەرىڭىزگە سالايىق، قازان ايىنىڭ 10-ىنان بەرى قازاقستاننىڭ قىرعىزستانمەن اراداعى شەكاراسى كۇشەيتىلگەن رەجيمدە جۇمىس ىستەۋدە. بەس بىردەي قىرعىز ءسۇت ءوندىرۋشى كومپانياسىنا قازاقستان اۋماعىنا ونىمدەرىن ەكسپورتتاۋعا تىيىم سالىنعان. كوپشىلىك جۇرت قازاق-قىرعىز شەكاراسىنداعى داۋدى قىرعىزستان كەدەن قىزمەتىنىڭ دۇرىس جۇمىس ىستەمەي وتىرۋىمەن نەمەسە قىرعىز ءسۇت ونىمدەرىنىڭ سانيتارلىق تالاپتارعا ساي ەمەستىگىمەن ەمەس، اتامباەۆ پەن نازارباەۆ تەكەتىرەسىمەن بايلانىستىرادى. قوعامدا بۇنداي پىكىر قالىپتاسۋىنا سەبەپتە جوق ەمەس. ويتكەنى بۇعان دەيىن المازبەك اتامباەۆ نازارباەۆتى قاتاڭ سىنعا الىپ، قازاق بيلىگىن «جەمقورلار» دەپ ايىپتاعان بولاتىن.

“The Qazaq Times”