كۇزدىڭ باسىندا تالعاردا بولعان اتىشۋلى قوعامدىق رەزونانستىق ىسكە قاتىستى سۇراۋ حاتقا جاۋاپتى ىشكى ىستەر مينسيترلىگى قىسقا قايىردى. ءباسپاسوز قىزمەتى بەرگەن جاۋاپقا قاراعاندا، كىسى ولىمىنە قاتىستى ىسكە قوسىمشا 7 ءىس اشىلعان. ۆەدومستۆو اۋدان دەڭگەيىندە «قىزمەتتىك تەرگەۋ جۇرگىزىپ، ناتيجەسىندە بىرقاتار قىزمەتكەر، باسشىلاردى قوسا العاندا، قاتاڭ جاۋاپتىلىققا تارتىلدى» دەيدى. رەسمي اقپارات بويىنشا، كۇدىكتىلەرگە «كۇزەتپەن ۇستاۋ» بۇلتارتپاۋ شاراسى قولدانىلعان.
رەداكتسيا ىشكى ىستەر ءمينيسترى ەرجان سادەنوۆكە جولدانعان التى سۇراقتان تۇراتىن سۇراۋ حاتقا تولىمدى جاۋاپ الا المادى. جوعارىدا اتالعان اقپاراتتان وزگەسى قىلمىستىق-پروتسەسۋالدىق كودەكستىڭ 201-بابىنا سايكەس جاريا ەتىلمەيتىنىن جازعان.
قىركۇيەك ايىنىڭ العاشقى سەنبىسىندە الماتى وبلىسىنىڭ تالعار اۋدانى قىزىلقايرات اۋىلىندا بولعان كىسى ءولتىرۋ، ازاماتتاردى قارۋمەن قورقىتۋ، بالا ۇرلاۋ قىلمىستارى پوليتسيانىڭ سالعىرتتىعى تۋرالى اقپارات قوعامدىق رەزونانس تۋدىردى. 30 جاستاعى ەرنار تۇرعانبەكوۆتىڭ قازاسى مەن ءبۇلدىرشىننىڭ كەپىلگە الىنۋى ازاماتتاردىڭ قاۋىپسىزدىگىنە قاتەر ءتوندىرىپ، قوعام مۇددەسىنە قاتىستى وتكىر ماسەلەلەردى كۇن تارتىبىنە شىعاردى.
تراگەديانىڭ العىشارتى مەن سالدارىنا كۋا، جابىرلەنۋشىلەردىڭ وكىلى ادۆوكات گاۋحار ساريەۆا تالعار اۋدانىنداعى پوليتسيا سالاسىنا رەفورما قاجەتتىگىن كوتەردى. جابىرلەنۋشى تاراپ كۇدىكتىنى كۇنى بۇرىن پوليتسەيلەردىڭ قولىنا ۇستاپ بەرگەنىمەن، كەيىننەن «نەگىزسىز بوساتۋى» سەبەپتى اياعى اۋىر وقيعاعا اكەپ سوققانىنا نارازى. بۇل كوپشىلىكتىڭ سىنىن تۋدىردى.
پروكۋراتۋرا وسى وقيعادان كەيىن پوليتسياعا قاتىستى قىلمىستىق كودەكستىڭ 370-بابى 4-بولىگى (لاۋازىمدى تۇلعالاردىڭ ارەكەتسىزدىگى) بويىنشا ءىس قوزعاعانى حابارلاندى.
ادۆوكات گاۋحار ساريەۆا Instagram جەلىسىندەگى پاراعىندا كۇدىكتىنىڭ كولىگى اپاتقا ۇشىراۋىنان جاراقات العان ەكى جاسار بالاعا شۇعىل وتا جاسالىپ، تىلىنە 8 تىگىس سالىنعانىن ايتقان.
جابىرلەنۋشىنىڭ ۇيىنە كۇدىكتىمەن ەرىپ بارعان ەكى ازاماتتى پوليتسيا جاۋاپقا تارتىپ، ۇشەۋى يزولياتورعا قاماعانى تۋرالى اقپارات تارادى. بىراق مينيسترلىك بۇل جونىندەگى سۇراقتى جاۋاپسىز قالدىردى.
بىلتىر كۇزدە تالعار اۋدانىندا شەرزات پولاتتىڭ قازاسى حالىقارالىق كولەمدە قوعامنىڭ نازارىن اۋدارعان.
قىزىلورداداعى №60 مەكەمەدەن حات: قاماۋداعى دۋمان مۇحامەتكارىم قاۋىپسىزدىك سۇرايدى
تالعارداعى قاندى وقيعا: ءىىم-گە جولدانعان ساۋال جانە قوعام كۇتكەن جاۋاپ
تالعاردا تاعى دا قاندى وقيعا. پوليتسيانىڭ جاۋاپسىزدىعى ما، جۇيەلىك داعدارىس پا؟
قايرات قوجامجاروۆقا قاتىستى تەرگەۋ: نازارباەۆ ءداۋىرىنىڭ ىقپالدى شەنەۋنىگىنە كەزەك كەلدى
ORDA حابارى، اقوردا رەاكتسياسى جانە سادىقوۆ ءىسى: نە بولىپ جاتىر، نەنى بايقادىق؟
بەسەۋدىڭ سوتى: قازاقستانداعى جاڭا ساياسي رەپرەسسيانىڭ كورىنىسى