بىشكەكتە 2 ناۋرىزدا گوركي اتىنداعى ساياباقتا "دوردوي-ديقان", "دوردوي-موتورس", "ازيا" جانە وش بازارلارىندا ساۋدا جاسايتىن كاسىپكەرلەر نارازىلىق اكتسياسىنا شىقتى. ولار جاڭا سالىق ەرەجەلەرىنە قارسى. بۇل تۋرالى ورتالىق ازيا جاڭالىقتار قىزمەتى جازدى.

ازاتتىقتىڭ قىرعىز قىزمەتى ءتىلشىسىنىڭ حابارلاۋىنشا، اكتسياعا جينالعاندار سالىق كولەمىن ولاردىڭ تابىسىنا ساي ەسەپتەۋدى، سونىمەن بىرگە كاسسا اپپاراتتارىن الىپ تاستاۋدى، ساۋدا قىزمەتىنە بىرىڭعاي سالىق ەنگىزۋدى تالاپ ەتتى. كاسىپكەرلەر سالىق تولەۋدەن قاشپايتىنىن ەسكەرتتى.

ساۋداگەرلەر جوگوركۋ كەڭەش دەپۋتاتتارى مەن پرەزيدەنت سادىر جاپاروۆپەن كەزدەسكىسى كەلەدى. اكتسياعا سالىق قىزمەتى توراعاسىنىڭ ورىنباسارى يسلام قىدىرگىچەۆ كەلگەن، بىراق وعان كاسىپكەرلەر الدىندا ءسوز سويلەۋگە رۇقسات بەرمەدى.

2023 جىلعى 1 قاڭتاردان باستاپ تاۋار ساتاتىن كاسىپكەرلەر اقپارات جۇيەسىنە تىركەلىپ، ەلەكتروندى تاۋار ەسەبىن تاپسىرۋى ءتيىس.

قاڭتار باسىندا "دوردوي-ديقان" بازارىنىڭ بىرنەشە ءجۇز ساۋداگەرى جاڭا سالىق ەرەجەلەرىن الىپ تاستاۋدى تالاپ ەتىپ، ميتينگ ۇيىمداستىرعان. سالىق قىزمەتىندەگىلەر كاسىپكەرلەرگە ءتۇسىندىرۋ جۇمىستارى ءجۇرىپ جاتقانىن، قاڭتاردا شامامەن 14 مىڭ كاسىپكەر اقپارات جۇيەسىنە تىركەلگەنىن ايتقان.