6 قىركۇيەك كۇنى الماتى وبلىسى تالعار اۋدانىندا تاعى دا ادام شوشىرلىق قىلمىس بولدى. كوز الدىمىزدا تاعى ءبىر وتباسىنىڭ قاسىرەتى مەن پوليتسيانىڭ سالعىرتتىعى تۇتاس ەلدىڭ نازارىن وزىنە اۋداردى.  تالعار اۋدانى قىزىلقايرات اۋلىندا بەلگىسىز بىرەۋ جابىرلەنۋشىنىڭ باۋىرىن اتىپ ءولتىرىپ، ونىڭ ەكى جاسار قىزىن ۇرلاپ اكەتتى.

ءسابي كەيىن ارنايى جاساقتىڭ وپەراتسياسى ارقىلى قۇتقارىلىپ، اناسىنا تاپسىرىلدى، ال كۇدىكتى ۇستالدى. بىراق باستى سۇراق اشىق قالىپ وتىر: بۇل قاندى وقيعانىڭ الدىن الۋعا بولاتىن با ەدى؟

ادۆوكاتتىڭ ايعاعى: ەسكەرىلمەگەن شاعىمدار

ادۆوكات گاۋحار ساريەۆا وقيعاعا قاتىستى اششى شىندىقتى اشتى. ونىڭ ايتۋىنشا، جابىرلەنۋشىنىڭ تۋىسى كۇدىكتىنى ءبىر اي بۇرىن زورلادى دەپ پوليتسياعا شاعىمدانعان. بىراق ىشكى ىستەر ورگاندارى ەشقانداي شارا قولدانباعان.

جابىرلەنۋشىلەر كۇدىكتىنى وزدەرى ۇستاپ، پوليتسياعا اكەلدى.

كۇدىكتى ەرتەڭىندە-اق بوساتىلىپ شىقتى.

سول بوساتىلعان ادام قايتا كەلىپ، قارۋ قولدانىپ، ءبىر وتباسىنىڭ شاڭىراعىن ورتاسىنا ءتۇسىردى.

بۇل قۇقىق قورعاۋ جۇيەسىنىڭ سالعىرتتىعى مەن جاۋاپسىزدىعىنىڭ ايعاعى.

رەسمي ورگاندار نە دەيدى؟

الماتى وبلىستىق پوليتسياسى مالىمدەمەسىندە:

قىلمىستىق ىستەر قوزعالعانىن،

جابىرلەنۋشى مەن كۇدىكتىنىڭ «بۇرىن جاقىن قارىم-قاتىناستا بولعانىن»،

قىز بالانىڭ امان-ەسەن قۇتقارىلعانىن حابارلادى.

بۇل — قوعامدى سابىرعا شاقىرۋعا باعىتتالعان مالىمدەمە. بىراق قوعامداعى اشۋ-ىزا مەن سەنىم داعدارىسىن سەيىلتپەدى. سەبەبى حالىق «نەگە ۋاقىتىندا ارەكەت ەتپەدىڭدەر؟» دەگەن زاڭدى ساۋالعا جاۋاپ الا المادى.

بۇرىنعى رەزونانستى وقيعالارمەن ساباقتاستىق

بۇل جاعداي تالعارداعى العاشقى رەزونانستى قىلمىس ەمەس.

بىلتىر شەرزات پولاتتىڭ ءولىمى بۇكىل ەلدى ءدۇر سىلكىندىرگەن. ءجاسوسپىرىمنىڭ قازاسى بويىنشا ۇكىم بيىل جازدا شىقتى. بىراق سول ىستە دە پوليتسيا مەن قاداعالاۋ ورگاندارىنىڭ ارەكەتسىزدىگى سىنعا الىنعان ەدى.

شەرزات ءىسى كەزىندە جابىرلەنۋشىلەردىڭ شاعىمدارىنا قاراماستان، قارجاۋبايدىڭ ءۇيى ورتەنىپ، شەرزاتتىڭ اعاسى نۇرعانات كۇماندى جاعدايدا قايتىس بولدى.

وسى تىزبەككە بۇگىنگى تراگەديا قوسىلدى. بۇل — كەزدەيسوقتىق ەمەس، جۇيەلىك داعدارىس.

پوليتسيانىڭ اركەتسىزدىگىنىڭ سالدارى

جىلدار بويى شەشىلمەي كەلە جاتقان تۇيىندەر، جازاسىز قالعان شەنەۋنىكتەر مەن پوليتسەيلەر — وسىنداي تراگەديالاردىڭ قايتالانۋىنا جول اشىپ وتىر.

ءبىرىنشى قاتەلىك – شاعىمدى ەلەمەۋ.

ەكىنشى قاتەلىك – ۇستالعان كۇدىكتىنى بوساتىپ جىبەرۋ.

ءۇشىنشى قاتەلىك – قوعامعا «ءبىز جاعدايدى باقىلاۋدا ۇستاپ وتىرمىز» دەگەن قۇرعاق سوزبەن شەكتەلۋ.

وسىنىڭ ءبارى ءبىر ادامنىڭ ءومىرىن قيدى، ءبىر ءسابيدىڭ تاعدىرىن قاتەرگە تىكتى.

قوعامدىق سەنىمنىڭ كۇيرەۋى

تالعارداعى جاعداي — ەلدەگى ىشكى ىستەر جۇيەسىنە دەگەن سەنىمنىڭ قانشالىقتى السىرەگەنىن كورسەتتى.

قاراپايىم حالىق «قىلمىسكەردى ءوزىمىز ۇستاپ بەرمەسەك، ادىلدىك بولمايدى» دەگەن كۇيگە جەتتى.

جابىرلەنۋشىلەردىڭ شاعىمىن ەلەمەگەن پوليتسياعا حالىق سەنىم ارتۋدان قالدى.

رەسمي ورگانداردىڭ «ءسابي قۇتقارىلدى، قاۋىپ جوق» دەگەن اقتالۋى شىندىقتى بۇركەي المادى.

قر ىشكى ىستەر سالاسىنىڭ جۇيەلىك داعدارىس

تالعارداعى قاندى وقيعا — ءبىر اۋداندىق پوليتسيا ءبولىمىنىڭ قاتەلىگى ەمەس، قازاقستانداعى ىشكى ىستەر سالاسىنىڭ جۇيەلىك داعدارىسىنىڭ ايناسى.

ۋاقىتىلى ارەكەت ەتىلسە، بۇل قىلمىستىڭ الدىن الۋعا بولاتىن ەدى.

جازاسىزدىق پەن سالعىرتتىقتىڭ سالدارى — ادام قازاسى مەن بالا ۇرلىعى.

بيلىك شىنايى رەفورمانى قولعا الماسا، مۇنداي قايعىلى وقيعالار قايتالانا بەرەدى.

بۇل جولى دا «جابۋلى قازان جابۋلى كۇيىندە» قالا ما، الدە قاندى وقيعا جۇيەنى وزگەرتۋدىڭ سوڭعى دابىلى بولا ما؟ بۇل سۇراق كەشە «شەرزات ىسىندە دە» قوزعالعان بولاتىن. وعان جاۋاپتى بۇگىنگى تالعارداعى قاندى وقيعا بەرىپ وتىر.

قايعى جۇتقان وتباسىنىڭ قاسىرەتىنە ورتاقتاسىپ، كوڭىل ايتامىز. قىلمىسكەردىڭ قاتاڭ جازالانۋىن، سونداي-اق وسىنداي قاسىرەتكە جول بەرگەن جاۋاپتى تۇلعالاردىڭ دا زاڭ الدىندا قاتاڭ جاۋاپقا تارتىلۋىن تالاپ ەتەمىز.

The Qazaq Times