2018 جىلى قازاقستان پاسپورت يندەكسىندە ەكى ساتىعا كوتەرىلىپ، 65 ورىنعا تۇراقتادى. ياعني وسى رەيتينگ ەسەبى بويىنشا قازاقستاندىقتار ۆيزاسىز 71 ەلگە بارۋعا مۇمكىندىك الىپ وتىر.

Henley&Partners كومپانياسى تاراتقان اقپارات بويىنشا قازاقستان بەلارۋس پەن ومان ەلدەرىمەن ءبىر ورىندا تۇر. ءبىر قىزىعى وتكەن جىلى دا قازاقستاننىڭ ۆيزاسىز 71 ەلگە بارۋعا مۇمكىندىگى بولعان. بىراق ول كەزدە مەملەكەت 67 ورىندا تۇرعان.

پاسپورت يندەكسىندە قازاقستانمەن كورشىلەس رەسەي - 48, ازەربايجان - 72, وزبەكستان - 85 ورىندا تۇر.

اتالعان رەيتينگتە  ۆيزاسىز بارۋعا بولاتىن ەلدەر ءتىزىمىنىڭ كورسەتكىشى بويىنشا گەرمانيا سوڭعى بەس جىلدان بەرى بىرىنشى ورىندا تۇر. ياعني اتالعان ەلدىڭ ازاماتتارى ۆيزاسىز 177 ەلگە ەركىن ساياحاتتاي الادى. ەكىنشى ورىندا سينگاپۋر. بۇل ەلدە تۇراتىن ازاماتتاردىڭ 176 ەلگە ۆيزاسىز بارۋعا مۇمكىندىگى بار. ال ءۇشىنشى ورىندى ۇلىبريتانيا، دانيا، يتاليا، نورۆەگيا، فينليانديا، فرانتسيا، شۆەتسيا، جاپونيا بولىسكەن. اتالعان ەلدىڭ ازاماتتارى 175 ەلدى ۆيزاسىز-اق كورە الادى.

ال ەڭ سوڭعى ورىندا تۇرعان ەل - اۋعانستان. بۇل ەل ازاماتتارى ءۇشىن ۆيزاسىز تەك 24 ەلدىڭ ەسىگى اشىق.

كومپانيانىڭ مالىمەتىنشە، ۆيزا تالاپتارى مەملەكەتتىڭ الەمدىك قاۋىمداستىقتاعى مارتەبەسىنە وبەكتيۆتى تۇردە اسەر ەتەدى. ۆيزا شەكتەۋلەرىنىڭ بولماۋى ءارتۇرلى يۋريسديكتسيالاردا بيزنەستى ءتيىمدى جۇرگىزۋگە، حالىقارالىق بايلانىستاردى ساقتاۋعا، جاھاندىق ينۆەستيتسيا مۇمكىندىكتەرىن پايدالانۋعا جانە ەركىن ساياحاتتاۋعا مۇمكىندىك بەرەدى.

سونىمەن قازاقستاندىقتار ۆيزاسىز بارا الاتىن ەلدەر مىنالار:

بۇرىنعى كسرو ەلدەرى: ازەربايجان، ارمەنيا، بەلارۋس، گرۋزيا ،قىرعىزستان، مولدوۆا، رەسەي، تاجىكستان، تۇركىمەنستان، وزبەكستان، ۋكراينا.

ەۋروپا ەلدەرى: البانيا، ماكەدونيا، سەربيا، چەرنوگوريا.

كاريب تەڭىزى ەلدەرى: انتيگۋا جانە باربۋدا، باربادوس، گايتي، دومينيكا، سەنت-ۆينسەنت جانە گرەنادينا.

وڭتۇستىك امەريكا ەلدەرى: ارگەنتينا، برازيليا، كۋبا، كولۋمبيا، كولۋمبيا، ەكۆادور.

ازيا جانە وڭتۇستىك-شىعىس ازيا ەلدەرى: گونكونگ، يندونەزيا، مالايزيا، مالديۆا، موڭعوليا، تۇركيا، فيليپپين، وڭتۇستىك كورەيا، حاينان ارالى.

تىنىق مۇحيتى ارالدارى: ميكرونەزيا، نيۋە، ساموا، كۋكا ارالى

افريكا ەلدەرى: ناميبيا، سەيشەل ارالدارى، تۋنيس.

سونداي-اق، قازاقستاندىقتار ءۇشىن ۆيزا الۋ ءتارتىبى جەڭىلدەتىلگەن ەلدەر مىنالار: بوليۆيا، بۋرۋندي، شىعىس تيمور، ۆەتنام، گۆينەيا-بيساۋ، گرەنادا، دجيبۋتي، دومينيكا رەسپۋبليكاسى، مىسىر، زامبيا، كابو-ۆەردە، يوردانيا، كامبودجا، كەنيا، كومور ارالدارى، لاوس، ماۆريكي، ليۆان، ماداگاسكار، ماكاو، ماكاو، مالي، موزامبيك، نەپال، نيكاراگۋا، پالاۋ، سينگاپۋر، سومالي، تايلاند، توگو، تۋۆالۋ، ۋگاندا، شري-لانكا، يامايكا.

“The Qazaq Times”