اۋرۋحانا اۋراسى: «كوۆيدتىڭ باستى قاتەرى – وكپەنىڭ بۇلىنگەنىن سەزبەي قالاسىز» (فوتوبايان)

كەيىنگى كەزدە الەۋمەتتىك جەلىلەردە «ءۇشىنشى تولقىن» رەتىندە اتالىپ جۇرگەن ناۋرىز جانە ءساۋىر ايلارىندا ناشارلاعان ەپيدەميولوگيالىق احۋالدى تەرىستەيتىن پىكىر لەگى جيىلەدى. بىلتىر دا اۋرۋحاناداعى جاعداي تۋرالى اقپارات بارىنشا جاسىرىلىپ، ءتىپتى دارىگەرلەرمەن تىلدەسۋگە بارعان جۋرناليستەردى پوليتسيا الىپ كەتكەنى ەسىمىزدە. اقپاراتتىق ۆاكۋمنىڭ اقىرى ينفودەمياعا شىراتىپ ەدى. مينيسترلىك بولجامىنىڭ قاتەلىگى مەن ۇكىمەت دايىندىعىنىڭ جەتكىلىكسىزدىگىنەن جانە شىنايى جاعدايدان بەيحابار جۇرتتىڭ بوساڭسۋى سەبەپتى «ماۋسىم-شىلدە قىرعىنى» ورىن الدى.

رەداكتسيا وسى تاۋقىمەت قايتالانباس ءۇشىن اقپاراتتىق جاعىنان قوعامعا قاجەتتى ۆيزۋال-ماتەريال ۇسىنباق ويمەن اۋرۋحاناداعى احۋالدى كورىپ قايتۋعا اكىمدىككە رەسمي سۇراۋ سالدىق. ارادا ءبىر اپتا وتكەندە اكىمدىك اۋرۋحاناعا كىرۋگە مۇرسات بەرىپ، الدىن الا پتر تەستىنىڭ قورىتىندىسىن تالاپ ەتتى. سونداي-اق «قىزىل ايماقتان» ۆيرۋس جۇقتىرىپ، اۋىرا قالعان جاعدايدا جاۋاپكەرشىلىكتى ءوز موينىمىزعا الاتىنىمىز تۋرالى قولحات سۇراتتى. جۇما كۇنگى جۇمىس ساپارىمەن جۇقپالى اۋرۋلار اۋرۋحاناسىنا جول تارتتىق.

2 ءساۋىر. جول ۇستىندەمىز. كولىك قانشا تەزدەتسە دە جەتەر ەمەس. تۇركسىب اۋدانىنىڭ تەرىستىك تۇكپىرىندەگى اۋرۋحاناعا تاياپ قالدىق. قويانقۇس ەلدى مەكەنىمەن ءبىر بويلىقتا الماتى-قاپشاعاي ماگيسترالى مەن ىلە تاس جولىنىڭ اراسىندا ورىن تەپكەن اۋرۋحانا ماڭدايىنداعى ءىرى ارىپتەر كورىنە باستادى.

«ي.س.جەكەنوۆا اتىنداعى قالالىق كلينيكالىق جۇقپالى اۋرۋلار اۋرۋحاناسىنىڭ فيليالى» دەگەن جازۋ.

ايتپاقتاي، بۇل عيمارات بىلتىر قىسقا قاراي اشىلعان. بايزاقوۆ پەن جاندوسوۆ كوشەلەرىنىڭ قيىلىسىندا ورنالاسقان 90 جىلعا جۋىق تاريحى بار قالالىق جۇقپالى اۋرۋلار اۋرۋحاناسىنىڭ ەكىنشى فيليالى. ۇكىمەت 2006 جىلى اۋرۋحاناعا وسىندا 1950-1979 جىلدارى قىزمەت ەتكەن باس دارىگەر يزاتيما جەكەنوۆانىڭ ەسىمىن بەرگەن.

ەسىك اۋزىنداعى كۇزەت بىردەن كىرگىزە قويمادى. باسقارمانىڭ ءباسپاسوز حاتشىسى اقشولپان قالدانقىزى كەلگەن سوڭ عانا «جول اشىلدى».

مومىشۇلى داڭعىلىندا بىرەر اپتادا بوي كوتەرگەن، بيۋدجەتى داۋلى ءمودۋلدى اۋرۋحانانىڭ پاتسيەنتتەرى بىلتىر قاراشادا تولىقتاي تازالانۋ ءۇشىن جابىلىپ، بىلتىر 30 قاراشادا وسىندا كوشىرىلگەن. دەگدار كوشەسىندەگى اۋدانى 28,5 مىڭ شارشى مەتردەن اساتىن ءۇش بىردەي عيمارات 4 گەكتار اۋماقتى الىپ جاتىر. ءبىر ۋاقىتتا 500 ادام قابىلداي الادى: قارقىندى تەراپيا جانە رەانيماتسيا بولىمىندە 45 ورىن بار. اۋرۋحانامەن تىركەس ايتىلاتىن «رۆ-90» ءسوزى ايالادامانىڭ ەسكى اتاۋى ەكەن.

اقپارات قۇرالىنان بار-جوعى ءۇش كىسى جينالعان ەكەنبىز. اكىمدىكتىڭ اقپاراتتىق ساياساتىن ىسكە اسىراتىن «الماتى» تەلەارناسىنىڭ ءتىلشىسى مەن وپەراتورى وسىندا. ۇشەۋىمىزدى مەدقىزمەتكەرلەر اينالىپ-تولعانىپ جارتى ساعات كيىندىردى: قوس-قوستان قولعاپ، جەڭىل سىم-كويلەك پەن سىرتقى كامۋفلياج كيگىزىپ، تىرسەككە دەيىنگى جۇقا شۇلىق تارتقىزىپ، رەزەڭكە ەتىك كيگىزىپ، كوزىلدىرىك تاقتىردى. بارلىعى دا ءبىر رەتكە قولدانۋعا ارنالعان مەديتسينالىق جۇقا ماتەريالدان.

تال ءتۇس كەزى. قابىلداۋ ءبولىمىن ارالاپ ءجۇرمىز. ساعات 12.20.

«ناۋقاستار جەدەل جاردەم كولىگىنەن كەلىپ تۇسكەن بويدا زەرتتەۋ باستالادى. تىنىس ورگاندارى زاقىمدالعان جانە زاقىمدالۋى مۇمكىن بارلىق پاتسيەنت پتر تەستىنىڭ قورىتىندىسىنا قاراماستان ارنايى كەستە بويىنشا كومپيۋتەرلىك توموگرافيادان وتكىزىلەدى. سەبەبى پتر سىناماسى كەيدە سونشالىق سەنىمدى ناتيجە بوماۋى دا مۇمكىن. وكپەدەگى وزگەرىستەر مەن كلينيكالىق بەلگىلەرىن كورۋ ارقىلى پنەۆمونيانىڭ ءتۇرلى دەڭگەيى، ءتىپتى تۋبەركۋلەز، وكپە ىسىكتەرى نە مەتاستازدار انىقتالىپ جاتادى. اۋرۋحانا ءبىرىنشى ەشالونعا جاتقاندىقتان، جەدەل جاردەم، ەمحانا دەڭگەيىندە الدىن الا سۇرىپتاۋ جۇمىسى جۇرگىزىلەدى. بىزگە ءموبيلدى توپتار تەك جاعدايى اۋىر ناۋقاستاردى اكەلەدى»، – دەدى اۋرۋحانا باس دارىگەرىنىڭ ورىنباسارى تامارا ۋتاگانوۆا.

بولىمدەردى بەتالدى ارالاۋعا بولمايدى ەكەن. ءار ءبولىمنىڭ ءوز دەڭگەيى بار. ءسپيرالدى جۇيەگە قۇرىلعان اۋرۋحانانى ارالاۋ دا ءبولىمنىڭ ساتىسىنا قاراي ارنايى باعدارمەن ىسكە اسىرىلادى.

«ءتورتىنشى قاباتتاعى رەانيماتسيا بولىمىنەن شىعىپ، ءبىرىنشى قاباتتاعى وبسەرۆاتسيا بولىمىنە كىرۋگە بولمايدى. سوندىقتان تازا كەزىمىزدە قاتەرى تومەن العاشقى ساتىداعى بولىمگە بارىپ العان ءجون».

ونىڭ ايتۋىنشا، وسىعان دەيىن دە، قازىر دە اۋرۋحاناعا كۇنىنە 30-50 شاقتى ادام تۇسەدى. بۇگىنگى تاڭدا 400-دەن استام ناۋقاس بار. اۋرۋحانا 80% جۇكتەمەدە جۇمىس ىستەپ جاتىر.

– اۋرۋحاناداعى 8 كلينيكالىق ءبولىمنىڭ ەكەۋى وبسەرۆاتسيا رەتىندە جۇمىس ىستەيدى. مۇندا 108 ورىن بار. پتر ناتيجەسى تەرىس، كلينيكاسى بويىنشا انىقتالاتىندار دياگنوستيكالانادى. ستاتسيونارلىق ەمگە مۇقتاج ادام جاتادى. جۇكتى ايەلدەرگە بولەك ءبولىم ارنالعان. كەستە بويىنشا شىعارىلادى. جاڭادان تۇسكەن ناۋقاس پەن ەسكى سىرقات بىرگە كەزىكپەۋى، جولى قيىلىسىپاۋى ءتيىس، – دەدى دارىگەر.

قازىر پتر تەستى ارقىلى كوروناۆيرۋس انىقتالعان 340 ادام، ودان باسقا پنەۆمونيا بويىنشا ونداعان ادام ەمدەلىپ جاتىر دەيدى.

اۋرۋحانانى تانىستىرىپ-كورسەتۋ جۇمىسىن ارى قاراي ءبولىم مەڭگەرۋشىسى ابزال مالباسقانوۆ جالعاستىردى. ول رەسمي ەسەپتە «ينفەكتسيا بەلگىلەرى بار پنەۆمونيا» رەتىندە، ددسۇ اۋرۋلاردىڭ حالىقارالىق جىكتەلىمىندە  «U07.2» كودىمەن (بۇل كود بىلتىر اقپان ايىندا بەكىتىلگەنىمەن، قازاقستان ۇكىمەتى حالىقارالىق ستاندارت-ۇسىنىمدى بىردەن قولعا الا قويعان جوق. نەگىزگى ينديكتور بويىنشا ەسەپتى قوعام قىسىمىنان جانە «ماۋسىم-شىلدە قىرعىنىنان» كەيىن تەك 1 تامىزدان جۇرگىزە باستاعان – QT) بەلگىلەنەتىن «كوروناۆيرۋس پنەۆمونياسىنىڭ» تىركەلۋ رەتىن ءتۇسىندىردى.

«ءبىر جانۇيادا ەكى ادامنان پتر كومەگىمەن كوۆيد انىقتالسا، سول ۇيدەگى تاعى ءبىر مۇشەسىنەن تەرىس شىعۋى مۇمكىن. بۇل پتر دۇرىس ەمەس دەگەن ماعىنا ەمەس. تەست الۋ بارىسىندا تاناۋداعى ۆيرۋستىڭ ناق ۇستىنەن تۇسكەن-تۇسپەگەنىنە بايلانىستى. ادامي فاكتور ءرول وينايدى. ونداي جاعدايدا كۆي- جاعدايى دەپ تىركەلەدى»، – دەدى.

«وبسەرۆاتسيادا پتر قورىتىندىسى بەلگىسىز، پنەۆمونياعا شالدىققاندار جاتادى. دياگنوزى ناقتىلانعانشا، ساپارلاس نەمەسە ءبىر ۇيدە تۇراتىن ادامدار ءبىر پالاتادا بولادى. قورىتىندىسى بەلگىلى بولعاننان كەيىن اركىم ءوزىنىڭ دەڭگەيىنە لايىق بولىمگە جايعاسادى. ەگەر ءتۇرلى جاعدايداعى ناۋقاستاردى ارالاستىرار بولساق، ءبىر-بىرىنە جۇقتىرىپ، كوللاپسقا ۇشىرايدى. سيمپتومسىز ناۋقاستار ءۇي جاعدايىندا امبۋلاتوريالىق دەڭگەيدە ەمدەلەدى. ءحالى اۋىر، جانساقتاۋ ءبولىمىنىڭ كومەگىنە مۇقتاجدار بىزگە تۇسەدى»، – دەدى ول.

ناۋقاستان پتر تەستى ءبىر رەت الىنادى. قاتەلىك كەتكەن-كەتپەگەنىن انىقتاۋ ماقساتىندا وبسەرۆاتسيا بولىمىندە قان قۇرامىنداعى انتيدەنە تەكسەرىلەدى. مۇنداي يممۋندى فەرمەنتتىك اناليز (يفا) قانداعى انتيدەنەنىڭ دامۋىن، ياعني ءورشىپ تۇرعان نە اۋىرىپ «بولعاننان كەيىنگى كەزىن، جاسۋشاداعى وزگەرىستەردى» كورسەتەدى.

«ءبىر ادامنان الىنعان پتر تەستىنىڭ ەكى لابوراتوريادا ءارتۇرلى ناتيجە كورسەتۋىنىڭ سەبەبى – زەرتحانانىڭ انتيگەن الۋەتىنە بايلانىستى. دامىعان-ۇلكەن لابوراتوريالار سىنامانى 4 انتيگەن بويىنشا زەرتتەيدى. ال جاي، سپەكتىرى قاراپايىم لابوراتوريا 2 انتيگەن ۇلگىسىندە انىقتايدى. پارامەتر مۇمكىندىگى از، موديفيكاتسيالانباعان جاعدايدا مۋتاتسيالانعان شتامداردى تابا الماي قالۋى مۇمكىن».

ءبىر كىرگەن ەسىكتەن شىعۋعا بولمايدى. بولىمدە ەمدەلىپ جاتقان جانە جاڭا تۇسكەن ناۋقاستاردىڭ كىرىپ-شىعاتىن ەسىگى بولەك-بولەك دەيدى مەكەمە باسشىلىعى.

ءبولىم مەڭگەرۋشىسىنىڭ سوزىنشە، اۋرۋحانا ستاندارتقا سايكەس جارتى جىل سايىن تولىقتاي جۋىپ-تازالانادى.

№2 ءبولىم. كوروناۆيرۋس جۇققانى پتر تەستى ارقىلى ناقتىلانعان سىرقاتتار جاتاتىن ءبولىم.

«تاماقتى ءار پالاتاعا الىپ كەلىپ بەرەدى. ۇلەستىرىلەدى. ءار بولىمدە ءبىر پوست بولادى. وندا مەدبيكە، كىشى مەيىربەكە، پالاتا سانيتارى، ءدالىز سانيتارى، بۋفەتكە جاۋاپتى اسسيستەنت بولادى. ولار ەدەن جۋعا ارالاسپايدى. ءار بولىمدە 64 پاتسيەنتكە دەيىن ەم الا الادى. ءار دارىگەر ورتا ەسەپپەن ءبىر مەزەتتە 15 دارىگەرگە قارايدى.

بارلىق جاعىنان جابدىقتالعان: ءار توسەكتىڭ جانىندا وتتەك كوزى، اجەتحانا مەن دۋش، تەرەزەسى ۇلكەن، پالاتا كەڭ ءارى جارىق، ءۇش ادامعا 18 شارشى مەتر. تاۋلىگىنە ءۇش مارتە تازالانادى، سونشا رەت كۆارتس قوسىلادى».

ەسىگى اشىق تۇرعان پالاتاعا كىردىك. ءۇش كىسى تاماقتانىپ وتىر. ساۋ ەتىپ كىرگەن اقكيىمدىلەرگە اڭتارىلا قاراپ قالعان.

«العاش تۇسكەنىمدە وكپەمنىڭ 25%-ى بۇلىنگەن ەدى. قازىر جاعدايىم جاقسى. تابەتىم جامان ەمەس»، – دەدى ءبىر پاتسيەنت.

جەكە باسىن تاسپالاۋعا رۇقسات سۇراعانىمىزدا باس تارتقان پاتسيەنتتەردىڭ بەت-ءجۇزى تۇسىرىلمەدى. اڭگىمەگە ارالاسقان تاعى ءبىر ايەلدەن ءحال-كۇيىن سۇراستىردىق.

«وكپەم 25%-بەن ءتۇستىم. السىزدىك بيلەپ، تابەتىم بولمايتىن...»

– شەتەلگە شىقپاپ پا ەدىڭىز؟

«جوق».

– مەديتسينالىق بەتپەردەنى ۇنەمى تاعىپ ءجۇرۋشى مە ەدىڭىز؟

«اندا-ساندا ماسكانى يەككە ءتۇسىرىپ، مۇرىندى اشىپ جۇرەتىنمىن».

ءۇشىنشى ناۋقاستىڭ قاسىندا تۇرعان قوسىمشا جاساندى تىنىستاۋ قۇرىلعىسىن كورىپ، ورتا جاستاعى ايەلدى سوزگە تارتتىق.

«جاتقانىما ءبىر اپتاداي بولدى. ءبىرىنشى كۇنى وتتەك قۇرىلعىسىمەن تىنىستادىم. شەتەلگە شىققانىم جوق. دەنە قىزۋىم 38,5-كە دەيىن كوتەرىلىپ، وكپەم 60%-عا جارامسىزدانىپ، اۋىر حالدە ءتۇستىم. پتر وڭ بولىپ شىقتى. قازىر ءبىرشاما جاقساردىم. ەشقايدا بارعانىم جوق» دەدى شارشاڭقى وتىرعان ول.

ءدالىزدىڭ تۇكپىرىندەگى سوڭعى پالاتاعا اياڭدادىق. كىرە بەرە ءۇش توسەكتىڭ ءتور جاقتاعىسىندا ەنتىگىپ وتىرعان زەينەت جاسىنداعى ايەل كوزگە ءتۇستى.

وتتەككە قوسۋعا الدەبىر دارىگەردى اتاپ شاقىرىپ جاتتى. ءبولىم باسشىسى پالاتادان شىعۋعا ۇگىتتەپ باقتى.

«بۇل ناۋقاس 8 كۇن ۇيدە ءوز بەتىنشە ەمدەلگەن. جازدا ەستىپ-كورگەن نارسەسىن جاساۋعا تىرىسقان. زيكماك، ازەتراماتسين دەگەندى جاتتاپ العان ءبارى. ءۇش كۇن بۇرىن كت-2 دەڭگەيىندە، وكپەسى 50% حالدە ءتۇستى. وكپەسى اسقىنىپ تۇر. ۇيدەن شىقپاعان. جاقىندارى 8 ناۋرىزدا قۇتتىقتاپ كەلگەندە جۇقتىرعان بولۋى مۇمكىن»، – دەيدى دارىگەرى ساۋلە امانگەلدى.

دارىگەردىڭ ايتۋىنا قاراعاندا، قايتىس بولعانداردىڭ باسىم بولىگى ون كۇن، كەيبىرى ەكى اپتا بويى ۇيىندە جاتىپ الادى. سول سەبەپتى «بۇل دەرتتىڭ ەڭ قيىنى، قيامەت سانالۋى  – ادام وكپەسىنىڭ جەلىنىپ جاتقانىن سەزبەۋىندە».

ءتارتىپ بويىنشا، ءۇشىنشى قاباتتا جاعدايى اۋىر، ال ءتورتىنشى قاباتتاعى رەانيماتسيا بولىمىندە وتە اۋىر حالدەگىلەر جاتادى ەكەن. ليفتكە كىردىك. سۇراقتى قايدا جاۋدىردىق. ءسوزدىڭ اۋانى ستاتسيونار قىزمەتكەرلەرى «ءار ەكى اپتادا پتر تەستىن تاپسىرىپ وتىرادى» دەگەنگە كەلدى. سيمپتوم بايقالسا، كت-عا تۇسەدى، دارىگەردىڭ كوبى «ەرىكتى تۇردە» ۆاكتسينا العان دەدى مالباسقانوۆ.

رەانيماتسيا زالىنا بەتتەدىك. عيماراتتار اراسىنداعى وتكەلمەن ءجۇرىپ كەلەمىز.

ول «300 قىزمەتكەردىڭ پتر تەستىلەۋدەن ءوتۋىن، قورعانىش كيىممەن قامتىلۋىن، مونيتورينگ جۇرگىزۋ، سانيتارلىق قىزمەتكە ەسەپ بەرۋ، بوس ورىندار تۋرالى اقپاراتتى جولداۋ ت.ب. ىسپەن اينالىساتىن» ەپيدەميولوگ دارىگەر ميراس نارتايۇلىن تانىستىردى.

«قولدانىلعان مەديتسينالىق زاتتار ۋتيليزاتسيالانادى. قاۋىپتى مەديتسينالىق قالدىقتار اۆتوكلاۆ اپپاراتىندا زالالسىزداندىرىلادى. سودان كەيىن فيزيكالىق كۇيىن جويۋ ءۇشىن ۇگىتتەلەدى، ءشپريتستىڭ ءوزى 1 مم-گە دەيىن ۋاتىلادى. وسىدان سوڭ ورتەلەدى. اسا قاۋىپتى قالدىقتار ستاتسيونار اۋماعىندا زالالسىزدانىپ، ۋتيليزاتسياعا شىعارىلادى. بولىمدەردەگى سۋ اعىنى دا ورتالىقتاندىرىلعان كاناليزاتسيا جۇيەسىنە جەتكەنگە دەيىن حيميالىق كۇردەلى تازارتۋ پروتسەستەرىنەن وتەدى. بۇدان اقپان ايىندا قاتتى جانە جۇمساق قالدىقتار 2,3 توننا بولسا، قازىرگى ەپيداحۋالعا بايلانىستى ناۋرىز ايىندا 3,6 تونناعا ۇلعايدى»، – دەدى اۋرۋحانا ەپيداحۋالىنا جاۋاپتى مامان ميراس.

بۇل ۋاقىتتا №2 رەانيماتسيا زالىنا كەلىپ قالعان ەك.

قىزىل تاقتايشاعا جازىلعان 15 ورىندى «رەانيماتسيا زالى».

جۇمىس ىستەپ تۇرعان قۇرىلعىلاردىڭ دىبىسى، جوتەلگەن، پلاستماسس جەلىمەن تىنىستاعان سىرقاتتار، قاۋلاپ جۇرگەن دارىگەرلەر… «جاعدايى اۋىر…» دەي بەرگەنىمدە ءسوزىمدى مالباسقانوۆتىڭ «كوۆيدتىڭ ءىسى عوي» دەگەنى ءبولدى.

توسەككە تاڭۋلى جانداردىڭ كەيبىرىنىڭ جانارى جۇمۋلى، جۇزىندە تىرشىلىك ىزىنەن بەلگى جوق. مەلشيىپ تۇردىم دا قالدىم. بويدان ءجۇرىپ وتكەن ءبىر سۋىق تولقىن سىزعىتىپ ءوتتى.

سوڭعى رەسمي مالىمەتكە قاراعاندا، قالا كولەمىندە رەانيماتسيا جانە قارقىندى تەراپيا بولىمدەرىندە 277 ورىننىڭ 173-ىندە ءحالى ناشار ناۋقاس جاتىر.

«كوروناۆيرۋس پنەۆمونياسىنىڭ سىرقاتتارىنا، يممۋنيتەتى السىرەيتىن جۇكتى ايەلدەرگە ارنالعان زالدار جەكە-جەكە ورنالاسادى. رەانيماتسيادا ۆيرۋسپەن قوسا تۋبەركۋلەزبەن جاتقان نەبىر ناۋقاس بولۋى مۇمكىن، سوندىقتان اعزاسى بوتەن باكتەريامەن بىلعانباس ءۇشىن بولەك ەمدەلەدى»، – دەدى ءبولىم جەتەكشىسى ابزال دۇيسەنبەكۇلى.

رەانيماتسيا بولىمىندە كوپ كىدىرتپەي، «شىقتا-شىقپەن» باسقا پالاتاعا الىپ كەتتى.

«ۆيرۋس مۋتاتسيالاندى دەيدى، ءبىز دە قاراپ وتىرعامىز جوق. ۋاقىت وتە بىلىك-تاجىريبەمىزدى دە جەتىلدىرىپ جاتىرمىز. كوۆيد بولسا، اۋرۋحانادان قورقۋدىڭ قاجەتى جوق. قازىر ەمدەلىپ شىعىپ جاتقاندار كوپ» دەدى مالباسقانوۆ ەلدىڭ ۆيرۋس جوق نەمەسە اۋرۋحاناعا تۇسكەندەر قايتا شىقپايدى دەگەن قاۋەسەتكە سەنبەۋ كەرەكتىگىن ايتىپ.

«بىلتىر ورازا كەزىندە ءبىر اۋلەتتەن 18 ادام تۇسكەنىن» ەسكە العان مەيىربيكەنىڭ ءبىرى الداعى ايدا جۇرت اۋىزاشار جيىنىنا بارماسا دەيدى.

– قالادا كوۆيدكە ارنالعان ءبىر ءمايىتحانا بار. سوندا تاسىمالدايتىن ارنايى كولىك بار. ولار دا قورعانىش كيىمىمەن، ديزينفەكتسيالىق-سانيتارلىق تالاپپەن جەتكىزەدى، – دەيدى ابزال دۇيسەنبەكۇلى.

«قىزىل ءارى لاس ايماقتان» شىعاردا ەپيدەميولوگ ميراس نارتايۇلى نۇسقاۋلىق كورسەتتى.

«قورعانىش كيىمىن كيىپ-شەشۋ وتە ماڭىزدى. كيىنگەن وڭاي، شەشۋ قيىن. سول ءۇشىن قولىڭىزعا ەكى قولعاپ تارتتىڭىز. جەكە قورعانىش كيىمدەرىنىڭ ءبىر رەتتىك جانە كوپ قولدانىلۋعا ارنالعان تۇرلەرى بولادى» دەدى.

وسىلايشا 2,5 ساعاتقا جۋىق ۋاقىتقا سوزىلدى. شامامەن 370-تەي ماماننىڭ 70-ءى دارىگەر كورىنەدى. قىزمەت بارىسىندا جۇققاندار بولمادى دەيدى اۋرۋحانا باسشىسىنىڭ ورىنباسارى.

ي.س.جەكەنوۆا اتىنداعى قالالىق كلينيكالىق جۇقپالى اۋرۋلار اۋرۋحاناسىنىڭ ورتالىعى مەن فيليالدارىن قوسا العاندا، بارلىعى 940 ورىننىڭ 740-ىندا ادام ەمدەلىپ جاتىر. بۇدان وزگە باسقا دا ونداعان پروۆيزورلىق ستاتسيونارلار بار. جالپى قالادا 5610 توسەك-ورىن دايىندالعان. وندا 3263 سىرقات ەمدەلۋدە. 2,5 مىڭ ادامنىڭ جاعدايى ناشار، 638-ءى اۋىر جانە 67 ناۋقاس تىم اۋىر حالدە. 103 بالا جەڭىل جانە ورتاشا كۇيدە.

الماتىدا ءبىر جىلدا سىرقاتتار قاتارى 42,5 مىڭعا دەيىن جەتتى. كوكتەم تۋعالى، ياعني كەيىنگى بەس اپتادا بۇل كورسەتكىشتىڭ 12 مىڭى نەمەسە 28%-ى تىركەلىپ ۇلگەردى.

بىلتىر 13 ناۋرىزدان بەرى COVID-19 ينفەكتسياسىن جۇقتىرعاندار قاتارى 255 مىڭنان اسسا، 1 تامىزدان بىلايعى كوروناۆيرۋس پنەۆمونياسى 51 مىڭعا جۋىقتاعان. ددسۇ دەرەكقورى مەن ۇلتتىق ستاتيستيكادا قازاقستاندا اۋىرعاندار سانى 306 مىڭعا جاقىنداعان. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى. سونداي-اق پاندەميا كەزىندە جالپى ۆيرۋس جۇققانداردىڭ 5,4 مىڭى (كۆي+ / U07.1 – 3110, كۆي- / U07.2 – 702, ىلەسپە اۋرۋلاردان – 1619) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەندەردى جالپى ستاتيستيكاعا ەنگىزبەيدى.

قازاقستان ۆيرۋس تارالۋى بويىنشا الەمدە Worldometers دەرەكقورى، دجونس حوپكينس ۋنيۆەرسيتەتى جانە ددسۇ تىزىمىندەگى 221 ەل مەن ايماقتىڭ اراسىندا 49-ورىندا تۇر.

"The Qazaq Times"