وتكەن جىلدىڭ ماۋسىم ايىندا جەتسۋ وبلىسى، بالاساز اۋىلىندا كۇيەۋنىڭ قولىنان قازا بولعان ايزات جۇمانوۆانىڭ ولىمىنە قاتىستى سوت ۇكىمى 09 قاڭتار كۇنى تالدىقورعان قالاسىنداعى مامانداندىرىلعان سوت زالىندا وقىلدى. بۇل قازاقستانداعى تۇرمىستىق زورلىق-زومبىلىق ىستەرىنىڭ قالاي قارالاتىنىن تاعى ءبىر مارتە كۇن تارتىبىنە شىعاردى. سوت ايبار جانبولاتتى قىلمىستىق كودەكستىڭ 99-بابى 1-بولىگى بويىنشا كىنالى دەپ تانىپ، 14 جىلعا باس بوستاندىعىنان ايىردى. الايدا بۇل ۇكىمنىڭ ءوزى داۋلى ماسەلەلەردى تولىق جاپتى دەۋ قيىن.

بىرىنشىدەن، ءىستىڭ باستاپقىدا 106-باپپەن («دەنساۋلىققا قاساقانا اۋىر زيان كەلتىرۋ») قوزعالىپ، كەيىن عانا 99-باپقا قايتا سارالانۋى تەرگەۋ كەزەڭىندەگى ولقىلىقتاردى ايقىن كورسەتتى. جابىرلەنۋشى تاراپتىڭ ايتۋىنشا، ەكسگۋماتسياسىز بۇل وزگەرىس مۇلدە بولماۋى مۇمكىن ەدى. بۇل — ولىممەن اياقتالعان زورلىق-زومبىلىق ىستەرىندە باستاپقى قۇقىقتىق باعا بەرۋدىڭ قانشالىقتى ماڭىزدى ەكەنىن كورسەتەتىن مىسال.

ەكىنشىدەن، جابىرلەنۋشى تاراپ ءىستى 99-باپتىڭ 2-بولىگىمەن سارالاۋ جونىندەگى تالابى سوتتا قاناعاتتاندىرىلمادى. ال بۇل باپقا سارالانعان جاعدايدا جازا نەعۇرلىم قاتاڭ قاراستىرىلار ەدى. پروكۋرور 15 جىل سۇراعانىمەن، سوت 14 جىلمەن شەكتەلدى. فورمالدى تۇردە بۇل – زاڭ شەڭبەرىندەگى شەشىم. الايدا مارقۇمنىڭ تۋىستارى مەن قوعام ءۇشىن بۇل جازا ادىلەتتىلىك سەزىمىن تولىق وتەي المادى.

ۇشىنشىدەن، ۇكىمنەن كەيىنگى اپەللياتسيا ماسەلەسى بۇل ءىستىڭ ءالى دە جالعاساتىنىن اڭعارتادى. جابىرلەنۋشى تاراپتىڭ ادۆوكاتتارى اۋرۋحاناعا جەتكىزۋ ساتىندەگى جاعدايعا كۇمان كەلتىرىپ وتىر. ەگەر بۇل ءۋاج اپەللياتسيالىق ينستانتسيادا دالەلدەنسە، ءىستىڭ قۇقىقتىق باعاسى قايتا وزگەرۋى مۇمكىن.

بۇل سوت پروتسەسى ءبىر ادامنىڭ تاعدىرىنان الدەقايدا كەڭ ماسەلەنى كورسەتىپ بەردى. ول – تۇرمىستىق زورلىق-زومبىلىققا قاتىستى ىستەردىڭ دەر كەزىندە ءارى قاتاڭ سارالانباۋى، تەرگەۋدىڭ باستاپقى كەزەڭىندەگى نەمقۇرايلىلىق جانە جابىرلەنۋشى تاراپتىڭ ۇزاق كۇرەسۋگە ءماجبۇر بولۋى.

ايزات جۇمانوۆانىڭ ءىسى قوعامعا ءبىر سۇراقتى اشىق قالدىردى: قازاقستاندا وتباسىنداعى زورلىق-زومبىلىق ولىممەن اياقتالعان كەزدە، ادىلەت تەك سوت زالىندا ەمەس، تەرگەۋدىڭ العاشقى كۇنىنەن باستاپ تولىق قامتاماسىز ەتىلە مە؟ الدە ءىستىڭ ىلگەرى جىلجۋىنا ءاردايىم قوعامدىق رەزانس تۋىپ وتىرۋى شارت پا؟ ءاس اۋەلدە 106 باپپەن قوزعالعان، ارتىنشا جۇرت شۋ كوتەرگەن سوڭ بارىپ 99 باپقا اۋىسقان-تۇعىن.