اتىراۋ وبلىسىندا ءبىر وتباسى مۇشەلەرىن ءولتىردى دەگەن كۇدىكپەن ىزدەۋدە جۇرگەن ادامعا قاتىستى رەسمي اقپارات جاريالاندى. قۇقىق قورعاۋ ورگاندارىنىڭ مالىمەتىنشە، كۇدىك مارقۇم زەينەتكەر ەرلى-زايىپتىلاردىڭ كۇيەۋ بالاسى — سۇلتان سارسەماليەۆكە ءتۇسىپ وتىر. تەرگەۋ دەرەكتەرىنە سايكەس، قازا تاپقان ەرلى-زايىپتىلاردىڭ مايىتتەرى ءۇي ىرگەسىندەگى قورانىڭ ەدەنىنىڭ استىنان تابىلعان.

پوليتسيا حابارلاماسىندا سۇلتان ساميعوللاۇلى سارسەماليەۆتىڭ ءبىر تاۋلىكتەن بەرى ىزدەۋدە جۇرگەنى ايتىلدى. ول 1996 جىلعى 24 ساۋىردە تۋعان، قازاقستان رەسپۋبليكاسىنىڭ ازاماتى. ىزدەستىرۋ شارالارىن قازاقستان رەسپۋبليكاسى ىشكى ىستەر مينيسترلىگى باستاعان، ال جەدەل-ىزدەستىرۋ جۇمىستارىن اتىراۋ وبلىسىنىڭ پوليتسيا دەپارتامەنتى جۇرگىزىپ جاتىر. پوليتسيا ازاماتتاردى كۇدىكتىنىڭ جۇرگەن جەرى تۋرالى قانداي دا ءبىر اقپارات بولسا، جەدەل تۇردە 98-21-55 نومىرىنە حابارلاۋعا شاقىرادى.

بۇل ءىس بويىنشا بۇعان دەيىن دە قوعام نازارىن اۋدارتقان دەرەكتەر بولعان. 2025 جىلدىڭ قازان ايىنان بەرى **جانگەلدين اۋىلى**نىڭ تۇرعىندارى — ماقسوت قارابالين، ونىڭ جۇبايى ءناسىپ وتەشقاليەۆا جانە بالالارى ميراگۇل قارابالينا مەن ناۋرىز قارابالين تۋرالى ەشقانداي اقپارات بولماعان. تۋىستارىنىڭ ايتۋىنشا، وتباسى اياق استىنان جوعالىپ كەتكەن، سودان بەرى ولارمەن بايلانىس ۇزىلگەن.

6 قاڭتار كۇنى ەكى ادامنىڭ ءمايىتى تابىلىپ، 7 قاڭتاردا جەرلەۋ ءراسىمى وتكەن. قالعان وتباسى مۇشەلەرىنىڭ تاعدىرىنا قاتىستى تەرگەۋ جالعاسىپ جاتىر. قۇقىق قورعاۋ ورگاندارى ءىستى اسا اۋىر قىلمىستار ساناتىنا جاتقىزىپ، بارلىق نۇسقانى تەكسەرىپ وتىرعانىن حابارلادى.

اتىراۋداعى بۇل وقيعا قوعامدا ۇلكەن الاڭداۋشىلىق تۋعىزىپ وتىر. ءبىر وتباسىنىڭ بىرنەشە مۇشەسىنە قاتىستى جاسالعان قىلمىس دەرەگى وڭىردەگى قاۋىپسىزدىك ماسەلەسىن قايتا كوتەرىپ، قۇقىق قورعاۋ جۇيەسىنىڭ جەدەل ارەكەتى مەن اشىقتىعىنا دەگەن سۇرانىستى كۇشەيتتى. تەرگەۋدىڭ الداعى بارىسى مەن ىزدەۋدە جۇرگەن كۇدىكتىنىڭ ۇستالۋىنا قاتىستى رەسمي اقپارات الداعى ۋاقىتتا جاريالانباق.