27 قاڭتار. الماتى قالالىق سوتىنىڭ اپەللياتسيالىق القاسى ازاماتتىق بەلسەندى ميربولات مىرزاتايۇلىنا قاتىستى ۇكىمدى وزگەرىسسىز قالدىردى. ءبىرىنشى ينستانتسيا سوتى شىعارعان ءتورت جىل تۇرمە جازاسى سول كۇيى ساقتالدى. اپەللياتسيا ءۇمىت بولدى. بىراق سوت ونى دا جاۋىپ تاستادى.

بۇل ءىستىڭ فورمۋلاسى قاراپايىم: ءبىر ادام مەملەكەتتىك مەكەمەدە قازاق تىلىندە قىزمەت كورسەتۋدى تالاپ ەتتى، ال مەملەكەت ونى «ۇلتارالىق ارازدىقتى قوزدىردى» دەپ تانىدى. مەدەۋ اۋداندىق سوتى وسى ايىپپەن ميربولات مىرزاتايۇلىن ءتورت جىلعا باس بوستاندىعىنان ايىردى. اپەللياتسيالىق سوت بۇل شەشىمدى زاڭدى دەپ تانىپ، قورعاۋ تاراپىنىڭ بارلىق ءوتىنىشىن قاناعاتتاندىرمادى.

اپەللياتسيالىق سوت وتىرىسىنا بەلسەندىنىڭ ءوزى قاتىستىرىلعان جوق. ونىڭ تاعدىرى تالقىلانعان ساتتە، سول تاعدىر يەسىنىڭ داۋىسى ەستىلمەدى. بۇل جاي تەحنيكالىق جايت ەمەس، قورعانۋ قۇقىعىنىڭ مازمۇنىنا قاتىستى اۋىر سۇراق. سوت ادىلدىگى ەڭ الدىمەن ادامدى تىڭداۋدان باستالۋى ءتيىس ەدى.

قورعاۋشىلار سوتتا ءىستىڭ قولدان قۇراستىرىلعانىن، ايىپتاۋدىڭ ناقتى دالەلدەرگە ەمەس، سۋبەكتيۆتى تۇسىندىرۋگە سۇيەنگەنىن ايتتى. ولار ميربولات مىرزاتايۇلىنىڭ ارەكەتىن ازاماتتىق ۇستانىم، زاڭدى تالاپ دەپ باعالاۋدى سۇرادى. پروكۋرور بۇعان قارسىلىق ءبىلدىردى. سوت القاسى پروكۋرور پوزيتسياسىن قابىلداپ، ۇكىمدى وزگەرىسسىز قالدىردى.

بۇل شەشىم تەك ءبىر ادامنىڭ تاعدىرىنا قاتىستى ەمەس. بۇل مەملەكەتتىك ءتىلدىڭ ناقتى مارتەبەسىنە قويىلعان سۇراق. ەگەر قازاقستاندا مەملەكەتتىك تىلدە سويلەۋدى تالاپ ەتۋ قىلمىسقا تەڭەستىرىلسە، وندا كونستيتۋتسياداعى ءتىل تۋرالى باپتىڭ ءوزى قاعاز جۇزىندە عانا قالماي ما؟ مەملەكەتتىك ءتىل زاڭمەن بەكىتىلگەن نورما ما، الدە تەك سالتاناتتى ۇران با؟

ميربولات مىرزاتايۇلىنىڭ ءىسى قوعامدا ۇلكەن رەزونانس تۋدىردى. ونىڭ جاقتاستارى بەلسەندىنى بوساتۋدى تالاپ ەتىپ، بۇل ءىستى ءسوز بوستاندىعى مەن ازاماتتىق قۇقىقتارعا قىسىم دەپ باعالادى. قۇقىق قورعاۋشىلار دا ءىستىڭ ساياسي جانە سيمۆولدىق سيپاتىنا نازار اۋدارىپ وتىر. الايدا سوت جۇيەسى بۇل داۋىستاردى ەستىمەگەندەي كەيىپ تانىتتى.

15 قاڭتاردا ميربولات مىرزاتايۇلى الماتىدان تاراز قالاسىنداعى تۇزەۋ مەكەمەسىنە اۋىستىرىلدى. ءبىر ادامنىڭ گەوگرافياسىن وزگەرتۋ وڭاي. ال ادىلەتتىڭ ورنىن اۋىستىرۋ مۇمكىن ەمەس. ادىلەت نە بار، نە جوق. بۇل ىستە سوت ونىڭ بار ەكەنىن دالەلدەي المادى.

ۇكىم وزگەرمەدى. بىراق قوعامنىڭ سۇراعى وزگەردى. مەملەكەتتىك ءتىلدى تالاپ ەتكەن ادام تۇرمەگە جابىلاتىن ەلدە زاڭ كىم ءۇشىن جۇمىس ىستەيدى؟ سوت كىمنىڭ ءسوزىن تىڭدايدى؟ ال ادىلەت قايدا؟

بۇل سۇراقتارعا اپەللياتسيالىق سوت جاۋاپ بەرگەن جوق. بىراق ولاردى قوعام ۇمىتپايدى.

The Qazaq Times