الماتىدا جاڭا زاماناۋي كىتاپحانا اشىلدى

الماتى شاھارانىڭ وڭتۇستىك ورتالىعىندا مەملەكەتتىك كىتاپحانا اشىلدى. قالاداعى 29-شى نىسان زاماناۋي-كوۋوركيڭ فورماتىندا قىزمەت كورسەتەدى. ەل ستۋدەنتتەرىنىڭ ۇشتەن ءبىرى شوعىرلانعان قالا، ياعني 200 مىڭنان اسا ستۋدەنتى بار الماتى ءۇشىن كىتاپحانا ماڭىزدى ماسەلە. كىتاپسۇيەر قاۋىم مەن وقىرمان جاستاردىڭ شىعارماشىلىق ورتاسىنا اينالادى دەپ ۇمىتتەنەمىز.

بۇگىن الماتى قالاسىندا قازاقستان رەسپۋبليكاسىنىڭ تاۋەلسىزدىك كۇنىنە وراي جاڭا ءارى زاماناۋي كىتاپحانانىڭ سالتاناتتى اشىلۋ ءراسىمى ءوتتى. ماڭىزدى مادەني وقيعاعا قوعام قايراتكەرى احمەتجان اشيري، ادەبيەتتانۋشى قانسەيىت ابدەزۇلى، قازاق راديوسىنىڭ ۇنجارعى ديكتورى جانە ارداگەرى ساۋىق جاقانوۆا، ساۋلە دوسجان، بەيبىت سارىباي، مۇراتحان شوقان سىندى بىرقاتار قالامگەرلەر، قوعام جانە مەملەكەت قايراتكەرلەرى، عىلىم مەن مادەنيەت وكىلدەرى، اكىمدىكتەن جاۋاپتى قىزمەتكەرلەر قاتىستى.

شارا بارىسىندا قوناقتار ءۇشىن ارنايى ەكسكۋرسيا ۇيىمداستىرىلىپ، جاڭا كىتاپحانانىڭ مۇمكىندىكتەرى مەن ينفراقۇرىلىمى تانىستىرىلدى. كىتاپحانا ءداستۇرلى كىتاپ مادەنيەتى مەن زاماناۋي تسيفرلىق تەحنولوگيالاردى ۇشتاستىرا وتىرىپ، قالا تۇرعىندارىنا ارنالعان كوپفۋنكتسيونالدى مادەني ءارى ءبىلىم بەرۋ الاڭى رەتىندە جوبالانعان. مۇندا كەلۋشىلەردىڭ جايلى ءارى ءتيىمدى ۋاقىت وتكىزۋىنە بارلىق جاعداي جاسالعان.

اتاپ ايتقاندا، ەرەكشە قاجەتتىلىكتەرى بار ازاماتتار ءۇشىن ارنايى بەيىمدەلگەن جۇمىس ورىندارى قاراستىرىلعان. كورۋ قابىلەتى تومەن وقىرماندارعا ارنالعان ءىرى قارىپتەگى جانە ارنايى فورماتتاعى ادەبيەتتەر قورى جيناقتالعان. سونىمەن قاتار زاماناۋي كومپيۋتەرلىك زال، جەكە جۇمىس ىستەۋگە ارنالعان تىنىش وقۋ ايماقتارى، توپتىق كەزدەسۋلەر مەن شىعارماشىلىق جوبالارعا ارنالعان كەڭىستىكتەر جابدىقتالعان. كىتاپحانانىڭ باي كىتاپ قورى مەن دامىعان ماتەريالدىق-تەحنيكالىق بازاسى ءارتۇرلى جاستاعى جانە قىزىعۋشىلىعى سان الۋان وقىرمانداردىڭ سۇرانىسىن قاناعاتتاندىرۋعا باعىتتالعان.

سالتاناتتى جيىندا ادەبيەتتانۋشى، قازاقستاننىڭ ەڭبەك سىڭىرگەن قايراتكەرى قانسەيىت ابدەزۇلى دا ءوز پىكىرىن ءبىلدىرىپ، كىتاپحانانىڭ تاربيەلىك جانە مادەني ماڭىزىنا توقتالدى:

«كىتاپحانا – بولاشاق وقىرماندى تاربيەلەيتىن ماڭىزدى مادەني ورتا. مۇنداي زاماناۋي ءارى تولىق قولجەتىمدى كەڭىستىكتىڭ اشىلۋى جاستاردى كىتاپقا جاقىنداتىپ، وقىرمان مادەنيەتىن جاڭا دەڭگەيگە كوتەرەدى»، – دەدى ادەبيەتشى قانسەيىت ابدەزۇلى.

جاڭا كىتاپحانا بارلىق كەلۋشىلەر ءۇشىن، سونىڭ ىشىندە مۇمكىندىگى شەكتەۋلى جاندار ءۇشىن دە تولىق قولجەتىمدى ورتا قالىپتاستىرىپ، ينكليۋزيۆتى قوعام قۇرۋعا باعىتتالعان ماڭىزدى قادام بولىپ وتىر. بۇل جەر الداعى ۋاقىتتا كىتاپ پەن شىعارماشىلىقتى قادىرلەيتىن، ءبىلىم مەن رۋحاني دامۋعا ۇمتىلاتىن قالا تۇرعىندارىنىڭ باسىن قوساتىن تانىمال مادەني ورتالىققا اينالماق.

كىتاپحانانىڭ اشىلۋىنا كەلگەن كوپشىلىك. فوتو: وكج بولىمشەسى

«كىتاپحانا – قالانىڭ رۋحاني تىنىسىن ايقىندايتىن ورىن. ءبىز ءوز تاراپىمىزدان قالا تۇرعىندارىنا جاڭا ءبىلىم ءنارىن سۋسىنداۋعا، جان-جاقتى دامۋىنا جاعداي جاساپ وتىرمىز. بۇل كىتاپحانا – تەك كىتاپ وقيتىن ورىن عانا ەمەس، وي مەن يدەيا توعىساتىن زاماناۋي مادەني ورتالىق»، – دەدى اكىم ورىنباسارى ابزال نۇكەنۇلى.

كىتاپحانانىڭ ەرەكشە جوبالارىنىڭ ءبىرى – بالالار مەن جاسوسپىرىمدەردىڭ كىتاپ وقۋعا دەگەن قىزىعۋشىلىعىن ارتتىرۋعا باعىتتالعان «وقى – وينا!» جوباسى. وسى جوبا اياسىندا بالالار ايماعىندا PlayStation 5 ورناتىلىپ، ويىن مەن وقۋدى ۇيلەستىرەتىن جاڭا فورمات ۇسىنىلعان. بۇل باستاما بالالاردى كىتاپحانا كەڭىستىگىنە تارتۋعا جانە ولاردىڭ وقۋ مادەنيەتىن ەرتە جاستان قالىپتاستىرۋعا مۇمكىندىك بەرەدى.

بۇل باستاما الماتى قالاسىنىڭ مادەني ينفراقۇرىلىمىن دامىتۋعا، وقىرمان مادەنيەتىن جاڭعىرتۋعا جانە ۇلتتىڭ رۋحاني قۇندىلىقتارىن نىعايتۋعا باعىتتالعان ماڭىزدى قادام رەتىندە باعالانادى.

روزىباكيەۆ كوشەسى 247-ءۇي، 7-ءشى عيماراتتا ورنالاسقان جانە قالا تۇرعىندارى مەن قوناقتارى ءۇشىن كۇندەلىكتى 08:30-20:00 ۋاقىت ارالىعىندا دەمالىسسىز جۇمىس ىستەيدى.

بۇگىنگى تاڭدا جاڭا تولىققان كىتاپحانانى قوسا العاندا، الماتى قالاسىندا 38 كىتاپحانا جۇمىس ىستەيدى، ولاردىڭ 29-ى – الماتى كىتاپحانالارىنىڭ بولىمشەلەرى، ال 9-ى – رەسپۋبليكالىق كىتاپحانا. سونىمەن قاتار، 35 جوعارى وقۋ ورنىنىڭ ارقايسىندا كىتاپحانا بار.

قالا بويىنشا ءۇش كىتاپحانا تاۋلىك بويى (24/7 رەجيمىندە) جۇمىس ىستەيدى: Alatau Creative Hub ورتالىعى، مۇحتار اۋەزوۆ اتىنداعى كىتاپحانا جانە جامبىل اتىنداعى قالالىق جاسوسپىرىمدەر كىتاپحاناسى.

The Qazaq Times