Omicron: جاڭا شتام، جاڭا تولقىن، جاڭا شەكتەۋلەر

دۇنيەجۇزىلىك دەنساۋلىق ساقتاۋ ۇيىمى كوروناۆيرۋستىڭ سوڭعى مۋتاتسيالانعان ءتۇرى «وميكرون» شتامى الەمنىڭ 89 ەلىنەن انىقتالعانىن حابارلادى. ۇيىمنىڭ مالىمەتىنشە «وميكرون» شتامىنىڭ تارالۋى اسا تەز بولعاندىقتان، ءبىر جارىم كۇن ىشىندە تارالۋ اۋماعى ەكى ەسەگە وسەدى. بۇعان بايلانىستى باتىس ەلدەرى كارانتيندىك شارالاردى ءتىپتى دە كۇشەيتە تۇسپەك.

امەريكا قۇراما شتاتتارىنندا «وميكرون» شتامى تابىلعاننان بەرى كەشە العاش رەت ءولىم تىركەلدى. ەلدىڭ دەنساۋلىق ساقتاۋ سالاسىنىڭ ماماندارى ازاماتتارعا روجدەستۆو كەزىندەگى مەرەكەلىك جوسپارلارىن توقتاتۋعا شاقىرىپ جاتىر. ەگەر مەرەكە كەزىندە ساقتىق شارالارى جاسالماسا رەانيماتسيا بولىمدەرىندە ناۋقاستارعا ورىن جەتىسپەي قالۋى مۇمكىن دەپ ەسكەرتتى.

«وميكرون» شتامى وڭتۇستىك افريكادان بايقالعاننان باستاپ دامىعان باتىس ەلدەرى بىردەن ساقتىق شارالارىن كۇشەيتكەن ەدى، ءتىپتى وڭتۇستىك افريكادان كەلگەن جولاۋشىلاردى شەكتەپ، شەكارالارىنا كىرگىزبەگەن دە. الايدا، سوعان قاراماستان «وميكرون» ەۋروپا مەن امەريكانى قايتادان دۇربەلەڭگە سالدى. ەڭ قيىنى، «وميكرون» اسا جىلدام تارالۋمەن قاتار، ونىمەن اۋىرعاندار اراسىندا كوروناۆيرۋسقا قارسى تولقى ەمدەۋدەن وتكەندەردىڭ دە سانى مول.

ەۋروپا ەلدەرى اراسىندا بريتانيا روجدەستۆو مەرەكەسى قارساڭىندا كارانتيندىك شەكتەۋلەر بولمايتىنىن مالىمدەگەن ەدى. الايدا، بريتانياداعى ىندەت جاعدايىنان ەۋروپانىڭ وزگە ەلدەرى قاۋىپتەنىپ جاتىر. فرانتسيا ازاماتتارىنا بريتانياعا ساياحاتتاۋ مەن وزگە دە ساپارلاردان باس تارتۋعا شاقىرسا، گەرمانيا بريتانيا ازاماتتارىنا شەكاراسىن جاپتى.

دەگەنمەن، اۋەلگىدەي ەمەس، ەۋروپا ەلدەرى شەكتەۋ شارالارىن تىم قاتاڭ ۇستانىپ وتىرعان جوق. گەرمانيانىڭ دەنساۋلىق ساقتاۋ ماماندارى اۋرۋدىڭ بەسىنشى تولقىنى بولماي قويمايتىنىن، قانداي شارالار بولماسىن ونى توقتاتۋدىڭ مۇمكىن ەمەستىگىن ايتادى.

گەرمانيا، فرانتسيا، پورتۋگاليا، شۆەيتساريا، اۆستريا، نيدەرلاند، دانيا، يسلانديا جانە وزگە دە ەۋروپا ەلدەرى دە شەكتەۋ شارالارىن قالپىنا كەلتىردى.

جونس حوپكينس ۋنيۆەرستيەتىنىڭ مالىمەتىنە ساي، كوروناۆيرۋس ىندەتى باستالعاننان بەرى الەمدە 275 ملن شاماسىندا ادام ىندەت جۇقتىرىپ، ونىڭ 5,3 ميلليونى كوز جۇمدى.