ادام بالاسى تىنباي ەڭبەكتەنۋ ارقىلى بەدەل قالىپتاستىرادى. ەڭبەگىنە ساي سول جيناعان اتاق-ابىرويى ءوز اتىنا قىزمەت ەتەدى. بۇل – دالەلدەۋدى قاجەت ەتپەيتىن اكسيوما. وسى جولدا ماقساتىنا ايقىن جەتىپ، سانالى عۇمىرىن جۋرناليستيكاعا ارناعان وپرا ءۋينفريدىڭ شىعارماشىلىعى تالايدى تاڭعالدىرسا كەرەك-ءتى.

وپرا ۋينفري – دۇنيەجۇزىندەگى ەڭ قىمبات تەلەجۇرگىزۋشىلەردىڭ ءبىرى. 64 جاستاعى سۇحبات «پاتشايىمىن» تانىمايتىن ادام كەمدە-كەم. اتالعان تەلەشوۋ الەمنىڭ 150 مەملەكەتىنە تاراپ، الەمدىك تەلەۆيزيالىق رەكورد جاسادى. ال كۇن سايىن ونىڭ كورەرمەندەر سانى امەريكانىڭ وزىندە 53 ميلليون ادامدى قۇراعان. سونداي-اق، 2003 جىلى Forbes رەيتىنگىسىندە ەڭ بەدەلدى تىلشىلەر قاتارىنا قوسىلىپ، قارا ءناسىلدى داڭقتى ايەل رەتىندە تاريحتا قالدى.

شەشەندىك ونەردىڭ حاس شەبەرىنە اينالعان وپرا ءۋينفريدى ميلليونداعان كورەرمەن «امەريكانىڭ باس دارىگەرى»، «اداسقان جانداردىڭ پەرىشتەسى»، «ءۇي شارۋاسىنداعىلاردىڭ جاس قۇربىسى»، ءتىپتى «امەريكالىق تەلەۆيزيانىڭ باس كەيىپكەرى» دەپ اتايدى. از عانا ۋاقىت ىشىندە ءۋينفريدىڭ توك-شوۋىندا 5000-عا جۋىق باعدارلاما ەفيرگە شىققان. ءار شىققان سايىن تىڭ تاقىرىپپەن ءوز كورەرمەنىن باۋراي بىلگەن وپرانىڭ اۆتورلىق باعدارلاماسىندا 30 مىڭعا جۋىق قوناق ەركىن سۇحبات بەرگەن. ءبىر قىزىعى، ءۇي شارۋاسىمەن اينالىساتىن ايەلدەرگە ارنالعان قاراپايىم عانا باعدارلاما تالاي ۋاقىت بويىنا تەلەرەيتينگتىڭ الدىڭعى قاتارىن بەرمەگەن. وسى ۋاقىت كولەمىندە قارا ءناسىلدى تەلەجۇرگىزۋشى تالايدى تاڭقالدىرىپ، تاڭداي قاقتىردى. 32 جىل بۇرىن ەفيرگە شىققان ونىڭ اۆتورلىق جوباسى تالايلاردىڭ ءۇمىتىن تۇتاتىپ، تالكەككە تۇسكەن تاعدىرلاردى توعىستىردى. كۇن سايىن كورەرمەنگە جول تارتاتىن شوۋ قوعامنىڭ بارلىق سالاسىن قامتىعان. سولاردىڭ ءبىرى «وپرانىڭ كىتاپحانا كلۋبى» اتتى ايدارىندا ايگىلى تەلەجۇرگىزۋشى حالىقتى سوڭعى ادەبي جاڭالىقتاردان حاباردار ەتىپ، جاڭا كىتاپتار جايىندا مول ماعلۇمات بەردى. باعدارلامانىڭ پارمەندىلىگى سونشالىق، سول ساتتە اتالعان كىتاپتار ەرتەڭگى كۇنى-اق كىتاپ سورەلەرىنەن تابىلماي قالاتىن جاعدايلار بولعان. ماسەلەن، سونداي حاباردىڭ بىرىندە وپرانىڭ امەريكالىقتارعا لەۆ تولستويدىڭ «اننا كارەنيناسىن» وقۋعا كەڭەس بەرۋى ارقاسىندا ورىس جازۋشىسىنىڭ ەڭبەگى اقش حالقىنىڭ جاتا-جاستانا وقيتىن كىتابىنا اينالعان. 2004 جىلى كۇز ايىندا باعدارلاما بارىسىندا اتاقتى تەلەجۇرگىزۋشى ءار كورەرمەنگە اۆتوكولىكتىڭ كىلتىن تابىستاپ، تاڭقالارلىق توسىن سىي جاسادى. ءدال وسى جايت تەلەۆيزيا سالاسىنداعى قايتالانباس قۇبىلىس بولدى. البەتتە، ادام بالاسى ارقاشان جەتىستىككە جەتە بەرمەيدى. وپرا ءۋينفريدىڭ كەمشىن تۇسى – جاڭالىقتار بولىمىندە ءوزىن كورسەتە الماۋى ەدى. سەبەبى، ول قايعىلى وقيعانى ايتىپ وتىرىپ، كوز-جاسىنا ەرىك بەرەتىن-ءدى.

وپرانىڭ نەگىزگى جانرى – سۇحبات. 1986 جىلدان بەرى 2011 جىلعا دەيىن جالعاسىن تاپقان «وپرا ءۋينفريدىڭ شوۋ باعدارلاماسى» كۇن سايىن ادامداردى كەرەك دەرەكپەن قامتاماسىز ەتىپ، دارىندى تۇلعالاردىڭ ومىرىنەن سىر شەرتتى. ءوز باعدارلامالارىندا ول قاراپايىم ادامنان بەلگىلى تۇلعاعا دەيىن سىرلى سۇحبات جۇرگىزگەن. تەلەجۇرگىزۋشى سۇحباتتى باستاماس بۇرىن الدىنا قويعان ماقساتىن انىقتاپ الادى جانە ونى حالىققا كورسەتە بىلەدى. جەتىستىككە جەتۋدىڭ باستى قۇپياسى دا وسى. اڭگىمە بارىسىندا كورەرمەنگە قانداي بەلگىسىز وقيعانى تانىتۋ كەرەك، رەسپوندەنتتىڭ قاسيەت-قابىلەتىنەن وزگەلەر قانداي ۇلگى الۋ كەرەكتىگىن انىقتاپ، كوك جاشىكتىڭ قۋاتىن ايقىنداپ بەردى. امەريكاداعى «قارا ءناسىلدى جۇلدىز» ءوز ماماندىعىنان ءلاززات الادى، ءار باعدارلامانى سوڭعى شوۋىنداي ازىرلەيدى.

ءسوز سوڭىندا، تەلەەكراننان كۇندەلىكتى كورىنىپ، كوزى اشىق، كوكىرەگى وياۋ كوپشىلىككە ءوز ويىن، تۇجىرىمىن جەتكىزەتىن ءجۋرناليستىڭ ەڭ ۇلى جەتىستىگى – تاڭداعان جولىنىڭ مايتالمانى اتانۋى، ءوز سفەراسىن قارىشتاتۋ، ءارى سول اتموسفەرانى كورەرمەننىڭ سەزىنۋى. سونداي-اق، ءماندى ويدىڭ قاراپايىم قاراشاعا جەتۋى بولسا كەرەك. بۇل رەتتە قارا ءناسىلدى سۇحبات پاتشايىمى وپرا ۋينفري ءوز دەگەنىنە جەتتى.

"The Qazaq Times"