Adam balası tınbay eñbektenu arqılı bedel qalıptastıradı. Eñbegine say sol jinağan ataq-abıroyı öz atına qızmet etedi. Bwl – däleldeudi qajet etpeytin aksioma. Osı jolda maqsatına ayqın jetip, sanalı ğümırın jurnalistikağa arnağan Opra Uinfridiñ şığarmaşılığı talaydı tañğaldırsa kerek-ti.

Opra Uinfri – düniejüzindegi eñ qımbat telejürgizuşilerdiñ biri. 64 jastağı swhbat «patşayımın» tanımaytın adam kemde-kem. Atalğan teleşou älemniñ 150 memleketine tarap, älemdik televiziyalıq rekord jasadı. Al kün sayın onıñ körermender sanı Amerikanıñ özinde 53 million adamdı qwrağan. Sonday-aq, 2003 jılı Forbes reytingisinde eñ bedeldi tilşiler qatarına qosılıp, qara näsildi dañqtı äyel retinde tarihta qaldı.

Şeşendik önerdiñ has şeberine aynalğan Opra Uinfridi milliondağan körermen «Amerikanıñ bas därigeri», «adasqan jandardıñ periştesi», «üy şaruasındağılardıñ jas qwrbısı», tipti «amerikalıq televiziyanıñ bas keyipkeri» dep ataydı. Az ğana uaqıt işinde Uinfridiñ tok-şouında 5000-ğa juıq bağdarlama efirge şıqqan. Är şıqqan sayın tıñ taqırıppen öz körermenin bauray bilgen Opranıñ avtorlıq bağdarlamasında 30 mıñğa juıq qonaq erkin swhbat bergen. Bir qızığı, üy şaruasımen aynalısatın äyelderge arnalğan qarapayım ğana bağdarlama talay uaqıt boyına telereytingtiñ aldıñğı qatarın bermegen. Osı uaqıt köleminde qara näsildi telejürgizuşi talaydı tañqaldırıp, tañday qaqtırdı. 32 jıl bwrın efirge şıqqan onıñ avtorlıq jobası talaylardıñ ümitin twtatıp, tälkekke tüsken tağdırlardı toğıstırdı. Kün sayın körermenge jol tartatın şou qoğamnıñ barlıq salasın qamtığan. Solardıñ biri «Opranıñ kitaphana klubı» attı aydarında äygili telejürgizuşi halıqtı soñğı ädebi jañalıqtardan habardar etip, jaña kitaptar jayında mol mağlwmat berdi. Bağdarlamanıñ pärmendiligi sonşalıq, sol sätte atalğan kitaptar erteñgi küni-aq kitap sörelerinen tabılmay qalatın jağdaylar bolğan. Mäselen, sonday habardıñ birinde Opranıñ amerikalıqtarğa Lev Tolstoydıñ «Anna Kareninasın» oquğa keñes berui arqasında orıs jazuşısınıñ eñbegi AQŞ halqınıñ jata-jastana oqitın kitabına aynalğan. 2004 jılı küz ayında bağdarlama barısında ataqtı telejürgizuşi är körermenge avtoköliktiñ kiltin tabıstap, tañqalarlıq tosın sıy jasadı. Däl osı jayt televiziya salasındağı qaytalanbas qwbılıs boldı. älbette, adam balası ärqaşan jetistikke jete bermeydi. Opra Uinfridiñ kemşin twsı – jañalıqtar böliminde özin körsete almauı edi. Sebebi, ol qayğılı oqiğanı aytıp otırıp, köz-jasına erik beretin-di.

Opranıñ negizgi janrı – swhbat. 1986 jıldan beri 2011 jılğa deyin jalğasın tapqan «Opra Uinfridiñ şou bağdarlaması» kün sayın adamdardı kerek derekpen qamtamasız etip, darındı twlğalardıñ ömirinen sır şertti. Öz bağdarlamalarında ol qarapayım adamnan belgili twlğağa deyin sırlı swhbat jürgizgen. Telejürgizuşi swhbattı bastamas bwrın aldına qoyğan maqsatın anıqtap aladı jäne onı halıqqa körsete biledi. Jetistikke jetudiñ bastı qwpiyası da osı. Äñgime barısında körermenge qanday belgisiz oqiğanı tanıtu kerek, respondenttiñ qasiet-qabiletinen özgeler qanday ülgi alu kerektigin anıqtap, kök jäşiktiñ quatın ayqındap berdi. Amerikadağı «qara näsildi jwldız» öz mamandığınan läzzat aladı, är bağdarlamanı soñğı şouınday äzirleydi.

Söz soñında, teleekrannan kündelikti körinip, közi aşıq, kökiregi oyau köpşilikke öz oyın, twjırımın jetkizetin jurnalistiñ eñ wlı jetistigi – tañdağan jolınıñ maytalmanı atanuı, öz sferasın qarıştatu, äri sol atmosferanı körermenniñ sezinui. Sonday-aq, mändi oydıñ qarapayım qaraşağa jetui bolsa kerek. Bwl rette qara näsildi swhbat patşayımı Opra Uinfri öz degenine jetti.

"The Qazaq Times"