قاجىلىق كەزىندەگى قاۋىپسىزدىك ساۋد ارابياسى ۇكىمەتىن الاڭداتۋدا

الەمنىڭ ءار تۇكپىرىنەن كەلگەن 2 ميلليوننان استام مۇسىلمان ساۋد ارابياسىنداعى مەككە قالاسىنا جينالىپ، قاجىلىعىن باستادى. جەكسەنبى كۇنى قاجىشىلار ءال-قارام مەشىتىنە ورنالاسقان قاعبانى اينالىپ، بيىلعى جىلدىڭ بەس كۇندىك قاجىلىق ءراسىمىن باستادى.

ساۋد اكىمشىلىگى بۇرىنعى قاجىلىق كەزىندەگى وقيعالاردىڭ قايتالانباۋى ءۇشىن قاۋىپسىزدىك شاراسىن كۇشەيتكەنىن مالىمدەدى. ىشكى ىستەر مينيسترلىگىنىڭ مالىمدەۋىنشە قاۋىپسىزدىك كۇشتەرىنىڭ سانىن 100 مىڭعا جەتكىزگەن. كەز-كەلگەن جاعدايدىڭ تۋىلۋىنىڭ الدىن الۋ ءۇشىن بىرقاتار قاۋىپسىزدىكتى ساقتاۋ شارالارى قابىلدانعان.

ساۋد ارابياسىنىڭ ءىىم ءباسپاسوز حاتشىسى ءال-تەرحي سوزىندە: «ساۋد ارابياسىنىڭ جانە ول باسقاراتىن كواليتسيا كۇشتەرى دە قاسيەتتى ورىنعا قاۋىپ توندىرەتىن سىرتقى كۇشتەرگە قارسى تۇرۋعا دايىن»، – دەدى.

 ەستەرىڭىزدە بولسا، 2015 جىلى قاجىلىق كەزىندە 2400-دەن استام ادام باستىرىلىپ ولگەن بولاتىن.

قاجىلىق جاساۋ الەمدەگى بارلىق مۇسىلماندارعا پارىز ەتىلگەنىمەن، ساۋد ارابياسىنىڭ بيلىگى كەيبىر ەلدەردەن كەلەتىن قاجىلاردى قاقپايلاعان كەزى دە بولعان. ايتالىق، ايماقتىڭ ساياسي قايشىلىعىنا بايلانىستى بىلتىر كاتارلىق قاجىشىلاردى شەكاراسىنان كىرگىزبەي قويعان ەدى. بۇدان تىس، يران جانە يەمەن قاجىشىلارى دا ساۋد ارابياسى ۇكىمەتى جاعىنان توسقاۋىلعا ۇشىرايدى. 

ساۋد ارابياسى تاريحىندا قاجىلىق جاساۋ جانە قاجىلىق ەكونوميكاسىنا بىرنەشە رەت رەفورمالار جاسالعان. ساۋد بيلىگى قاجىلىق ەكونوميكاسىن اشىق جاريا ەتپەگەنىمەن شامامەن ءار جىلى قاجىلىقتان 10 ملرد اقش دوللارىنا جۋىق قارجى قۇيىلاتىنى ءمالىم.

“The Qazaq Times”