Biıl şamamen 2 mln-nan astam mwsılman qajılıq öteydi. Foto: IRNA.

Älemniñ är tükpirinen kelgen 2 millionnan astam mwsılman Saud Arabiyasındağı Mekke qalasına jinalıp, qajılığın bastadı. Jeksenbi küni qajışılar äl-Qaram meşitine ornalasqan Qağbanı aynalıp, biılğı jıldıñ bes kündik qajılıq räsimin bastadı.

Saud äkimşiligi bwrınğı qajılıq kezindegi oqiğalardıñ qaytalanbauı üşin qauipsizdik şarasın küşeytkenin mälimdedi. İşki ister ministrliginiñ mälimdeuinşe qauipsizdik küşteriniñ sanın 100 mıñğa jetkizgen. Kez-kelgen jağdaydıñ tuıluınıñ aldın alu üşin birqatar qauipsizdikti saqtau şaraları qabıldanğan.

Saud Arabiyasınıñ İİM baspasöz hatşısı äl-Terhi sözinde: «Saud Arabiyasınıñ jäne ol basqaratın koaliciya küşteri de qasietti orınğa qauip töndiretin sırtqı küşterge qarsı twruğa dayın», – dedi.

 Esteriñizde bolsa, 2015 jılı qajılıq kezinde 2400-den astam adam bastırılıp ölgen bolatın.

Qajılıq jasau älemdegi barlıq mwsılmandarğa parız etilgenimen, Saud Arabiyasınıñ biligi keybir elderden keletin qajılardı qaqpaylağan kezi de bolğan. Aytalıq, aymaqtıñ sayasi qayşılığına baylanıstı bıltır katarlıq qajışılardı şekarasınan kirgizbey qoyğan edi. Bwdan tıs, Iran jäne Yemen qajışıları da Saud Arabiyası ükimeti jağınan tosqauılğa wşıraydı. 

Saud Arabiyası tarihında qajılıq jasau jäne qajılıq ekonomikasına birneşe ret reformalar jasalğan. Saud biligi qajılıq ekonomikasın aşıq jariya etpegenimen şamamen är jılı qajılıqtan 10 mlrd AQŞ dollarına juıq qarjı qwyılatını mälim.

“The Qazaq Times”