ءباسپاسوز ءماجىلىسىن اسحات ماەميروۆ باستاپ اشتى. فوتو: QT.

م. اۋەزوۆ اتىنداعى قازاق مەملەكەتتىك اكادەميالىق دراما تەاترىندا قازاقستاننىڭ حالىق ءارتيسى، مەملەكەتتىك سىيلىعىنىڭ لاۋرەاتى انۋاربەك مولدابەكوۆتىڭ 80 جىلدىعىنا ارنالعان ءداستۇرلى «تەاتر كوكتەمى - 2018» اتتى فەستيۆالىنىڭ اشىلۋ سالتاناتى جۋرناليستەرگە ارنالعان پرەسس-كونفەرەنتسياعا ۇلاستى. وعان قازاق تەاتر ونەرىنىڭ نار تۇلعالارى ءاسانالى ءاشىموۆ، ءسابيت ورازباەۆ جانە تەاتر ديرەكتورى اسحات ماەميروۆ قاتىستى.

ءباسپاسوز ءماجىلىسىن باستاپ اشقان اسحات ماەميروۆ سوزىندە: «بيىلعى تەاتر كوكتەمىن ءانۋار مولدابەكوۆتىڭ 80 جىلدىعىنا ارناپ وتىرمىز. اسىرەسە جاس بۋىندار ءۇشىن، ستۋدەنتتەر ءۇشىن، تەاتر سۇيەر قاۋىم ءۇشىن ۇلكەن مەرەكە بولعالى تۇر. ءانۋار مولدابەكوۆتىڭ كينوداعى تولقۇجاتى شەگەنىڭ ءرولى بولعاندىقتان، ءبىز فەسستيۆالدى «قىز جىبەك» سازدى دراماسىنان باستاعالى وتىرمىز. قازىلار القاسى جۇمىس جاسايدى. تەاتردىڭ ىشىندەگى فەستيۆال بولعاندىقتان، ءانۋار اعامىزدىڭ ومىردە دە، ونەردە دە دوسى بولعان قازاقستاننىڭ ەڭبەك ەرى ءاسانالى ءاشىموۆ اعامىز قازىلار القاسىنىڭ توراعاسى بولادى. قويىلىمداردان بولەك، «وزىندىك جۇمىس» دەگەن بولادى. تەاتردىڭ ارتيستەرى ىزدەنەدى، ياعني رەپەرتۋارلىق سپەكتاكلدەردەن بولەك، جاس رەجيسسەرلاردىڭ ىزدەنىسىنەن تۋعان بەس قويىلىم ەرتەڭگى ساعات ون بىردەن باستاپ قويىلادى»، – دەدى.

ءانۋار مولدابەكوۆ تۋرالى ەستەلىكتەر ايتىلدى. فوتو: QT.

ءباسپاسوز جيىنىندا كسرو حالىق ءارتيسى، «قازاقستاننىڭ ەڭبەك ەرى»، جانە تەاتردىڭ كوركەمدىك جەتەكشىسى ءاسانالى ءاشىموۆ پەن قازاقستاننىڭ حالىق ءارتيسى ءسابيت ورازباەۆ ءانۋار مولدابەكوۆتىڭ ءومىر مەن ونەردەگى ىزدەرى تۋرالى ەستەلىكتەر ايتىپ، اتالعان شارانىڭ ماڭىزى تۋرالى توقتالىپ ءوتتى.

جۋرناليستەرگە ارنالعان ءباسپاسوز ماجىلىسىنەن كەيىن، انۋاربەك مولدابەكوۆتىڭ 80 جىلدىعىنا ارنالعان كورمەنىڭ اشىلۋ سالتاناتى بولدى. قازاق ونەرىنىڭ اقساقالدارى ءاسانالى ءاشىموۆ پەن ءسابيت ورازباەۆ كورمەنىڭ لەنتاسىن قيىپ، مولدابەكوۆ مۇرالارىن جۇرتقا اشىق دەپ جاريالادى. كورمەدەن انۋاربەك مولدابەكوۆتىڭ جاساعان وبرازدار گالەرەياسىنا كۋا بولۋعا بولدى. شىن مانىندە قازاق تەاترىنىڭ وركەندەتكەن، ناعىز التىن ءداۋىردى جاساعان التىن تۇلعالاردىڭ، الپىسىنشى جىلدارداعى سۋرەتتەرى مەنمۇندالايدى.

بيىل تەاتر مۋزەيىنىڭ اشىلۋىنا 50 جىل تولادى. مۋزەي 1968 جىلى 24 مامىردا اشىلعان ەكەن. قازىر مۋزەيدە 300 مىڭنان استام جادىگەر، ەكcپوناتتار بار.

جۋرناليستەرگە ارنالعان ءباسپاسوز ءماجىلىسى. فوتو: م. اۋەزوۆ اتىنداعى تەاتر.

ايتا كەتەيىك، وزىندىك جۇمىستا فەستيۆالگە قاتىسۋشى جاس اكتەر، رەجيەسسەرلەر ا.پۋشكيننىڭ «تاس مەيمان» تراگەدياسىن، ر.ەردماننىڭ «ولە قالسام قايتەدى؟!» كومەديالىق قويىلىمىن، ە.ءولبيدىڭ «زووپارك» پسيحوفيزيكالىق دراماسىن، ۆ.گوگولدىڭ «جىندىنىڭ جازبالارى» جانە ۋ.شەكسپيردەن «ياگو» دەگەن اتاۋمەن مونو قويىلىمدار قويىلادى.

سونداي-اق، تەاتر مەن كورەرمەن اراسىنداعى التىن كوپىر – جۋرناليستەرگە دە ارنايى سىيلىقتار مەن العىس حاتتار بار، ول جابىلۋ سالتاناتى كۇنى تابىس ەتىلەتىن بولادى.

مارحابات ءىلياس

“The Qazaq Times”