Baspasöz mäjilisin Ashat Maemirov bastap aştı. Foto: QT.

M. Äuezov atındağı Qazaq Memlekettik akademiyalıq drama teatrında Qazaqstannıñ halıq artisi, memlekettik sıylığınıñ laureatı Änuarbek Moldabekovtıñ 80 jıldığına arnalğan dästürli «Teatr köktemi - 2018» attı festivaliniñ aşılu saltanatı jurnalisterge arnalğan press-konferenciyağa wlastı. Oğan qazaq teatr öneriniñ nar twlğaları Asanäli Äşimov, Säbit Orazbaev jäne teatr direktorı Ashat Maemirov qatıstı.

Baspasöz mäjilisin bastap aşqan Ashat Maemirov sözinde: «Biılğı teatr köktemin Änuar Moldabekovtıñ 80 jıldığına arnap otırmız. Äsirese jas buındar üşin, studentter üşin, teatr süyer qauım üşin ülken mereke bolğalı twr. Änuar Moldabekovtıñ kinodağı tölqwjatı Şegeniñ röli bolğandıqtan, biz fesstival'di «Qız Jibek» sazdı dramasınan bastağalı otırmız. Qazılar alqası jwmıs jasaydı. Teatrdıñ işindegi festival' bolğandıqtan, Änuar ağamızdıñ ömirde de, önerde de dosı bolğan Qazaqstannıñ eñbek eri Asanäli Äşimov ağamız qazılar alqasınıñ törağası boladı. Qoyılımdardan bölek, «Özindik jwmıs» degen boladı. Teatrdıñ artisteri izdenedi, yağni repertuarlıq spektakl'derden bölek, jas rejisserlardıñ izdenisinen tuğan bes qoyılım erteñgi sağat on birden bastap qoyıladı», – dedi.

Änuar Moldabekov turalı estelikter aytıldı. Foto: QT.

Baspasöz jiınında KSRO Halıq artisi, «Qazaqstannıñ Eñbek Eri», jäne teatrdıñ körkemdik jetekşisi Asanäli Äşimov pen Qazaqstannıñ halıq artisi Säbit Orazbaev Änuar Moldabekovtiñ ömir men önerdegi izderi turalı estelikter aytıp, atalğan şaranıñ mañızı turalı toqtalıp ötti.

Jurnalisterge arnalğan baspasöz mäjilisinen keyin, Änuarbek Moldabekovtiñ 80 jıldığına arnalğan körmeniñ aşılu saltanatı boldı. Qazaq öneriniñ aqsaqaldarı Asanäli Äşimov pen Säbit Orazbaev körmeniñ lentasın qiıp, Moldabekov mwraların jwrtqa aşıq dep jariyaladı. Körmeden Änuarbek Moldabekovtiñ jasağan obrazdar galereyasına kuä boluğa boldı. Şın mäninde qazaq teatrınıñ örkendetken, nağız altın däuirdi jasağan altın twlğalardıñ, alpısınşı jıldardağı suretteri menmwndalaydı.

Biıl teatr muzeyiniñ aşıluına 50 jıl toladı. Muzey 1968 jılı 24 mamırda aşılğan eken. Qazir muzeyde 300 mıñnan astam jädiger, ekcponattar bar.

Jurnalisterge arnalğan baspasöz mäjilisi. Foto: M. Äuezov atındağı teatr.

Ayta keteyik, özindik jwmısta festival'ge qatısuşı jas akter, rejiesserler A.Puşkinniñ «Tas meyman» tragediyasın, R.Erdmannıñ «Öle qalsam qaytedi?!» komediyalıq qoyılımın, E.Olbidiñ «Zoopark» psihofizikalıq dramasın, V.Gogol'dıñ «Jındınıñ jazbaları» jäne U.Şekspirden «YAgo» degen ataumen mono qoyılımdar qoyıladı.

Sonday-aq, teatr men körermen arasındağı altın köpir – jurnalisterge de arnayı sıylıqtar men alğıs hattar bar, ol jabılu saltanatı küni tabıs etiletin boladı.

Marhabat İliyas

“The Qazaq Times”