كەشە II دۇنيەجۇزىلىك «استانا» تەاتر فەستيۆالىنىڭ العاشقى قويىلىمى كورەرمەن نازارىنا ۇسىنىلدى. فەستيۆالدىڭ شىمىلدىعىن "استانا ميۋزيكل" مەملەكەتتىك تەاترى "قىز جىبەك" ەتنو-فولكلورلىق ميۋزيكلىمەن اشتى.

قويىلىمدى قالىڭ كوپشىلىكپەن قاتار قازاقستان تەاترلارى قاۋىمداستىعىنىڭ پرەزيدەنتى، "قازاقستاننىڭ ەڭبەك ەرى" ءاسانالى ءاشىموۆ، قازاقستاننىڭ xالىق ءارتىسى مەرۋەرت وتەكەشوۆا، ەۋروپا مەن ازيانىڭ بەلگىلى تەاتر سىنشىلارى مەن دراماتۋرگتەرى يوناس ۆايتكۋس، فرانتسيادان ارنايى كەلگەن داۆيد اساتياني، تەاترتانۋشى امانكەلدى مۇقان تاماشالادى.

"قازاقكونتسەرت" مكۇ جانىنان قۇرىلعان تەاتردىڭ رەپەرتۋارىندا وتاندىق جانە الەمدىك ميۋزيكلدەر بار. ال باستى قويىلىمدارىنىڭ ءبىرى " قىز جىبەك" ەتنو-فولكلورلىق ميۋزيكلى. قويۋشى-رەجيسسەر تەاتردىڭ كوركەمدىك جەتەكشىسى، م.اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ ديرەكتورى اسxات ماەميروۆ. اتالعان ميۋزيكل ەۋروپانىڭ فرانتسيا، بەلگيا، اۆستريا، جانە رەسەي كورەرمەندەرىن تاڭقالدىرىپ ۇلگەرگەن.

ايتا كەتەيىك، استانانىڭ 20 جىلدىق مەرەيتويىنىڭ اياسىندا ءوتىپ جاتقان تەاتر فەستيۆالىنىڭ اشىلۋ سالتاناتى بۇگىن " قازاقستان" وكز-دا ساعات 16:00-دە باستالادى. فەستيۆالعا شەتەلدىك جانە وتاندىق تەاترلار قاتىسادى. ەكى اپتاعا سوزىلاتىن تەاتر مەرەكەسىنىڭ قارساڭىندا 12 مەملەكەتتەن كەلگەن الەمدىك تەاتر ۇجىمدارى ونەر كورسەتەدى. ولار: «Piccolo di Milano» تەاترى (يتاليا), «1927» تەاترى (ۇلىبريتانيا), «Meno Fortas» (ليتۆا), «Warszawa» (پولشا), «Nakamura Gekijo» (جاپونيا), تاۋەلسىز ينتەرناتسيونالدى «11» تەاترى (گەرمانيا), ش.رۋستاۆەلي اتىنداعى گرۋزيا مەملەكەتتىك اكادەميالىق تەاترى (گرۋزيا), بەيجىڭ حالىقتىق كوركەم تەاترى (قىتاي), وزبەك ۇلتتىق اكادەميالىق دراما تەاترى (وزبەكستان), لەنسوۆەت اتىنداعى سانكت-پەتەربۋرگ اكادەميالىق تەاترى، ماسكەۋ گۋبەرنيالىق تەاترى (رەسەي), ش.تەرميچيكوۆ اتىنداعى شۋ وبلىستىق تەاترى(قىرعىزستان), ت.ابدۋمومۋنوۆ اتىنداعى اكادەميالىق دراما تەاترى (قىرعىزستان).

وتاندىق تەاترلاردان م.اۋەزوۆ اتىنداعى قازاق مەملەكەتتىك اكادەميالىق دراما تەاترى، ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترى، ع.مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترى، «Astana Musical» قاتىسادى. بارلىعى– 17 تەاتر، 18 سپەكتاكل. اتالعان ءىس شارانىڭ باستى قوناعى - وسكار سىيلىعىنىڭ يەگەرى دۇنيەجۇزىنە بەلگىلى كينو جانە تەاتر اكتريساسى جيۋلەت بينوش.

اۋقىمدى ءىس شارانى قر مادەنيەت جانە سپورت مينيسترلىگى ۇيىمداستىرۋىمەن " قازاقكونتسەرت" مەملەكەتتىك كونتسەرتتىك ۇيىمى جانە قازاقستان تەاترلارى قاۋىمداستىعى وتكىزۋدە.

“The Qazaq Times”