تاجىكستان ۇكىمەتىنىڭ «كيىم رەفورماسى» سىنعا ۇشىرادى

تاجىكستاننىڭ مادەنيەت مينيسترلىگى جاڭا جوبا دايىنداپ، ەلدەگى ايەلدەرگە كيىنۋ مادەنيەتىن ۇيرەتپەك. بۇل تۋرالى Asia-Plus اقپاراتتىق اگەنتتىگى حابارلايدى.

ساراپشىلاردىڭ پىكىرىنشە، تاجىك ۇكىمەتى يسلام دىنىنە ءتان دەپ سانالعان كيىمدەرگە تىيىم سالۋعا تىرىسىپ كەلەدى. الايدا ۇكىمەتتىڭ جاساپ جاتقان شارالارىنا قاراماستان، حالىقتىڭ ءدىني كوزقاراسىمەن يسلام دىنىنە ءتان كيىمدەردى كيۋ داعدىسى وزگەرمەگەن.

اتالعان ەلدىڭ مادەنيەت مينيسترلىگى «ۇسىنىستار كىتابىن» قۇراستىرىپ شىعاردى. وندا ءارتۇرلى جاستاعى ايەلدەردىڭ كيىم ۇلگىلەرى كورسەتىلگەن. بۇل ارقىلى تاجىكستان ۇكىمەتى ەلدەگى ايەلدەرگە قارا ءتۇستى كويلەكتەر مەن حيدجاب كيمەۋدى دارىپتەدى. 

مادەنيەت مينيسترلىگىنىڭ ۇسىنىسىندا باتىس مادەنيەتىنە ءتان كيىمدەر دە شەكتەلگەن. ايتالىق قىسقا بەلدەمشە، اشىق-شاشىق كيىمدەردى كيۋگە دە شەكتەۋ قويىلعان. مينيسترلىكتىڭ ۇسىنىسىندا تاجىكتىڭ ۇلتتىق بوياۋى باسىم ۇلگىدەگى كيىم-كەشەك كوبىرەك دارىپتەلىپتى.

اتالعان «ۇسىنىستار كىتابىندا»: «دەنەنى اشىق كورسەتىپ تۇراتىن كيىمدەر، دەنەگە جابىسقان شالبار-كويلەكتەردى جانە دەنساۋلىققا زياندى سينتەتيكا كيىمدەردى كيىپ، الەۋمەتتىك ورتالارعا بارۋدان باس تارتۋعا شاقىرامىز»، – دەپ جازىلعان.

مينيسترلىكتىڭ بۇل ۇسىنىسى تاجىكستانداعى الەۋمەتتىك جەلىلەردە كۇشتى تالقىنىڭ تاقىرىبىنا اينالدى. الەۋمەتتىك پىكىرلەردىڭ باسىم كوبى ۇلتتىق ۇلگىدەگى كيىمدەردى جاقتاعانىمەن، بۇل كيىمدەردىڭ باعاسى قىمبات، كوپشىلىككە بىردەي قولجەتىمدى ەمەس ەكەنىن العا تارتتى. سونىڭ اراسىندا "مينيسترلىك تەگىن كيىم تاراتا ما ەكەن؟!" دەگەن مىسقىلدار دا ءجۇردى. 

تاجىكستاندا جۇمىسسىزدىق ماسەلەسى ۇزاق ۋاقىتتان بەرى شەشىم تاپپاعان ماسەلەنىڭ ءبىرى. ميگراتسيالىق اعىم، كەدەيشىلىك تە كوپتەن بەرى ەل بيلىگىنىڭ باس اۋرۋى بولىپ كەلەدى. سوندىقتان دا بيلىكتىڭ بۇل ۇسىنىسىن سىنعا العان پىكىرلەر باسىم ءتۇستى. ولار ۇكىمەتتىڭ اۋەلى الەۋمەتتىك قيىنشىلىقتاردى شەشپەي جاتىپ، قيسىنسىز رەفورمالاردى جاساعالى وتىرعانىن ايىپتاۋدا. 

“The Qazaq Times”