تاجىكستاننىڭ تاۋلى باداحشان اۆتونوميالى وبىلىسىندا 16 مامىردان بەرى نارازىلىق دۇمپۋلەرى باسىلماي كەلەدى. جەرگىلىكتى اقپارات قۇرالدارى نارازىلىق شاراسى اۋەلدە جەرگىلىكتى وپپوزيتسيا ليدەرلەرىنىڭ قامالۋىنان بولعانىن جازعان ەدى. 

16 مامىردا تاۋلى باداحشان وبلىسىنىڭ ورتالىعى حوروگتا نارازى توپ ەرەۋىلگە شىقتى. نارىزىلىقتى باسۋ ءۇشىن تاجىكتىڭ كۇشتىك قۇرىلىمدارى ارنايى تەحنيكالار مەن قۇرالداردى پايدالانعانى حابارلانعان، ناتيجەسىندە 6 ادام جاراقات العان. تاجىكستان ىشكى ىستەر مينيسترلىگى بولسا، حوروگتاعى نارازىلىقتى مامودباكير ەسىمدى جەرگىلىكتى قىلمىستىق توپ جەتەكشىسىنىڭ جەلىكتىرۋىمەن بولدى دەپ مالىمدەدى. رەسمي تاراپ ەرەۋىلدە نارازىلاردىڭ جاراقات الۋىنا دا اتالعان تۇلعانى ايىپتايدى، مالىمدەمەدە ميتينگ كەزىندە قول گراناتاسىن جارىپ، بيلىك پەن نارازى توپ اراسىنا ىرىتكى سالماق بولدى دەگەن ايىپتار دا كەزدەسەدى.

بۇنىڭ الدىندا تاۋلى باداحشان سوتى جەرگىلىكتى بەلسەندى اميريددين الوۆاتشوەۆقا ادامداردى بارىمتاعا الدى، ەركىنەن اجىراتتى دەگەن ايىپپەن 18 جىلعا، بلوگەر چورشانبى چورشانباەۆيچتى سەگىز جارىم جىلعا باس بوستاندىعىنان ايىرعان بولاتىن. چورشانباەۆيچ رەسەيدەن دەپورتتسيالانىپ كەلگەننەن كەيىن قاماۋعا الىنعان. وعان ۇلتارالىق، دىنارالىق ارازدىق تۋدىردى، بيلىكتى قۇلاتۋعا تالپىندى دەگەن ايىپتار تاعىلدى. ەكەۋىنىڭ سوت ۇكىمىنەن كەيىن وبلىس ورتالىعىندا نارازىلىق ميتينگى ءوتىپ، جاعداي بىردەن ۋشىققان.

حوروگتا اعداي ۋشىققان كەزدە تاجىكستان ءىىم كۇشتەرى مەن اسكەري كۇشتەر بىردەي تارتىلىپ، ساۋىتتى اسكەري تەحنيكالار دا ورنالاستىرعان. كۇنى كەشەگە دەيىن وبلىس ورتالىعىنا كىرەتىن بارلىق جولداردىڭ جابىق ەكەنى حابارلانعان.

تاۋل باداحشان تاجىكستانداعى ازاماتتىق سوعىس كەزىندە دەربەستىكتى تالاپ ەتكەن ايماقتاردىڭ ءبىرى. تاجىكستاندىق جانە وتاندىق ساراپشىلاردىڭ پىكىرىنشە، نارازىلىقتىڭ تۇپكى سەبەبى ءبىر عانا وپپوزيتسيا ليدەرلەرىنە قاتىستى سوت ۇكىمىندە ەمەس، وڭىردەگى الەۋمەتتىك تەڭسىزدىك پەن جۇمىسسىزدىق، الەۋمەتتىك جاعدايدىڭ ناشارلىعىنا بايلانىستى ءوڭىر حالقىنىڭ دۋشانبە بيلىگىنە دەگەن نارازىلىعى ۇزاق جىلدان بەرى ساقتالىپ كەلگەن. قىرعىزستاندىق ەكسپەرتتەر تاۋلى باداحشانداعى جاعدايدىڭ ءدىني، ساياسي جانە قىلمىستىق سەبەپتەردەن ۋشىعا تۇسكەنىنە باسا نازار اۋدارادى.

The Qazaq Times