تاعى دا وق اتىلدى. وتكنە تۇندە قىرعىزستان مەن تاجىكستان شەكاراسىندا قايتالاي اتىس بولدى. بۇل سوڭعى ءبىر تاۋلىك ىشىندە قىرعىز-تاجىك شەكاراسىنداعى ەكىنشى وق اتىسۋ.

قىرعىز شەكارا قىزمەتى تاراتقان مالىمەتكە قاراعاندا وق اتىسۋ 11 ناۋرىز تۇنكى ساعات 02:50-دە باتكەن-يسفانا ءاۆتودالىزىنىڭ ەكى-تاش دەگەن جەرىندە بولعان. مالىمەتكە قاراعاندا، وسى جەردەن ءوتىپ بارا جاتقان قىرعىزستاندىق كولىكتەرگە تاجىك شەكاراشىلارى تاس لاقتىرعان. قىرعىز شەكاراشىلارىنىڭ تاس لاقتىرۋدى توقتاتۋ تۋرالى تالابىن ەلەمەگەن. قىرعىز تاراپ ەسكەرتۋ رەتىندە اسپانعا وق اتۋعا ءماجبۇر بولعان. بۇدان كەيىن تاراپتار 20 مينۋت بويى ءبىر-ءبىر ءبىرىن اتقىلاعان.

قىرعىزستان ۇقمك مالىمەتىنە قاراعاندا ءوز تارابىنان زارداپ شەككەندەر جوق.

جاعدايدى ۋشىقتىرماۋ ءۇشىن ەكى ەلدىڭ شەكارا قىزمەتى ءبىر-بىرىنە قوڭىراۋ شالىپ، اتىستى توقتاتقان. بۇدان كەيىن اتىس بولعان جەردە كەزدەسىپ، ماسەلە بويىنشا سويلەسكەن.

بۇل باتكەن شەكارالىق ايماقتا ءبىر تاۋلىك ىشىندەگى ەكىنشى وق اتىسۋ. كەشە تۇستەن بۇرىن تەسكەي دەگەن جەرىندە تاراپتار وق اتىسىپ، سوڭىندا ديالوگقا كەلگەن بولاتىن. قازىر ەكى ەلدىڭ دە شەكاراشىلارى كۇشەيتىلگەن رەجيمدە جۇمىس ىستەپ تۇر.

The Qazaq Times