Men Qazaqstanda bolğan kezderimde «Şäkärimniñ Ör Altayda izi bar» degen maqalamdı oqığan Şäkärimdi zertteuşi ğalımdar tarabınan «Şäkärimniñ Şınjañda basılğan şığarmaları boldı ma?» degen swraq qoyılğan edi. Men olarğa: «bar, biraq, bwl swraqqa atüsti jauap beru qiın, qazirşe mınanı aytayın: 1982 jıldan beri qaray «Altay ayası» jurnalında birqanşa öleñderi basılğan. Onıñ datasın anıqap, keyin naqtıraq aytıp beruime boladı» degen edim.

Tömende biraz söz osı turalı; Şınjañda qazaq tilinde şığıp kele jatqan gazet-jurnaldar az emes. Bir adamnıñ onıñ barlığın körip twruı da mümkin emes. Men özim twrğan Altay aymağında şığatın «Altay ayası» dep atalatın ädebi jurnal 1982 jıldan bastap «Ağa-buındar äueni» degen aydarmen («Şäkärimniñ öleñderinen» degen qosımaşa taqırıp qoyıp) köp öleñ jariyalağan.

Atap körsetsek, 1982 jıl 1 sanında osı jurnal Şäkärimniñ «Nasihat» qatarlı 75 şumaq öleñin basqan, kelesi №2 sanında tağı seksen neşe şumaq öleñin berdi. Redakciya Jemeney audanınan Zäkihan Omarwlı degen azamat jibergendigin eskertti. Köñil bölerlik bir jayt, sol №1 sanında basılğan öleñderdiñ soñında 4 şumaq qoljazba nwsqası bar. Joldauşı adam: «Osı Şäkärimniñ öz qoljazbası» degendi aytıptı. Ol öleñ oğan qaydan kelgen? Kim saqtağan? Ol turalı tüsinik joq. Men swrastırsam, Zäkihan qaytıs bolğalı talay jıl bolıptı. Anıqtau mümkindigi bolmadı.

1986 jılı №1 sanında «Altay ayası» Şäkärimniñ «Bwl än bwrınğı ännen özgerek» degen öleñin bastı. Öleñdi jazıp jiberuşi Jemeney audanınan Bisara Äbdihalımqızı dep eskertken.

«Altay ayası» mausımdıq ädebi jurnal. Jurnaldıñ 1980 jıldar işindegi basqa sandarında da «Şäkärim öleñderi» («Materialdan alındı» degen eskertumen) atımen birqatar öleñderin basqan. Ol qanday material? Tağı da qoljazba ma? Basqa bir basılımnan köşirilip aldındı ma? Ol jeri anıq aytılmağan.

Mağan anıq bir faktı mınau: sol jariyalanğan öleñderdiñ basım köbi, tipti barlığı – Qazaqstandağı baspasözde Şäkärimniñ ädebi mwrasına qanday mämile boların bilmey «äliptiñ artın bağıp» otırğan kezde basılğan bolatın. Al, Qazaqstanda Şäkärim şığarmaların 1988 jıldan keyin ğana jappay jariyalay bastağanı belgili. 1995 jılı 7 qañtar küni «Şınjañ gazeti» «Şıñğıs tauındağı üş zañğar şıñ» degen tamaşa maqala bastı. Avtorı Su Ju Çioñ dege qıtay jazuşısı eken. Qıtayşadan audarğan Qanatbek Jwmabaywlı. Bwl maqalada Abaydıñ 150 jıldıq mereytoyı qarsañında jäne qıtay tilinde basılğandıqtan onı milliondağan adam kördi deuimizge boladı. Maqalağa qosıp üş zañğardıñ – Abaydıñ, Şäkärimniñ jäne Mwhtardıñ sureti basılğan. Meniñ közim şalğan Şäkärim şığarmalarınıñ basılu faktileri osılar. Qıtay azat bolardan bwrın qıtaydağı baspasözde Şäkärim şığarmalarınıñ basılğandığına közimiz jetpeydi.

“The Qazaq Times”