Foto: sputniknews-uz.com

Özbekstan Qazaqstanğa äli de elektr energiyası üşin 11,3 mln teñge qarız. Bwl turalı KEGOC basqarma tötağası Baqıtjan Qajiev mälimdedi. 

Bwdan bölek, körşi eldiñ energetika ökilderi qazaqstandıq KEGOC elektr jelilerin basqaru kompaniyasına  140 mln dollardan artıq (47,6 mlrd teñge) somada qarız bolğan. Alayda qazirgi uaqıtta qarızdıñ köp böligi jabılğan.

"Biz atalğan elmen özara qarım-qatınas kelisimin jasağanda, özbekterdiñ energetika jüyesimen kelispeuşilikter boldı. Olar bizge 140 million dollardan astam qarız bolğan. Qazir bwl mäseleni şeşu jwmıstarı jürgizilude jäne osı borıştıñ basım böligi öteldi. Qazirgi kezde qarız qaldığı - 11,3 mln teñge. Bwl kestege säykes, jıldıñ soñına deyin tölenedi", - dedi Qajiev.

Sonday-aq, ol KEGOC tarifteri 2020 jılğa deyin bekitilgendikten, qazaqstandıq twtınuşılar üşin elektr energetikasınıñ bağası äzirge özgermeytinin ayttı. Onıñ sözinşe, kompanya jılu mausımına tolıq dayın.

"Qazirgi kezde Qazaqstanda aldağı qısqı kezeñde öndiretin quattıñ aytarlıqtay rezervi bar. Sondıqtan Qazaqstanda twtınuşılardı elektrmen jabdıqtauğa qatıstı mäseleler joq. Jalpı jılu mausımına dayındıq ayaqtaldı. Negizgi energetika orındarı qalpına keltirilip, tehnikalıq qızmet körsetu jwmıstarı jürgizildi", - dedi ol.

Ayta keteyik, osı aptada QR Wlttıq ekonomika vice-ministri Serik Jwmanğarin 2018 jıldan bastap Qazaqstanda kommunaldıq qızmet tarifteri josparlı türde qımbattaytının mälimdegen edi. Ol "Jaña jıldan bastap biz wzaq merzimdi jospar boyınşa tarifterdi kötere bastaymız. Biraq köp emes, bağanı köteru 10 payızdan aspaydı" degen. Bwdan bölek Prezident Nwrswltan Nazarbaev ta qırküyek ayınıñ basında eldegi "kommunaldıq tarifterdi qımbattau" turalı mälimdeme jasağan bolatın.

“The Qazaq Times”