6 qırküyek küni Almatı oblısı Talğar audanında tağı da adam şoşırlıq qılmıs boldı. Köz aldımızda tağı bir otbasınıñ qasireti men policiyanıñ salğırttığı twtas eldiñ nazarın özine audardı.  Talğar audanı Qızılqayrat aulında belgisiz bireu jäbirlenuşiniñ bauırın atıp öltirip, onıñ eki jasar qızın wrlap äketti.

Säbi keyin arnayı jasaqtıñ operaciyası arqılı qwtqarılıp, anasına tapsırıldı, al küdikti wstaldı. Biraq bastı swraq aşıq qalıp otır: bwl qandı oqiğanıñ aldın aluğa bolatın ba edi?

Advokattıñ ayğağı: eskerilmegen şağımdar

Advokat Gauhar Sarieva oqiğağa qatıstı aşı şındıqtı aştı. Onıñ aytuınşa, jäbirlenuşiniñ tuısı küdiktini bir ay bwrın zorladı dep policiyağa şağımdanğan. Biraq işki ister organdarı eşqanday şara qoldanbağan.

Jäbirlenuşiler küdiktini özderi wstap, policiyağa äkeldi.

Küdikti erteñinde-aq bosatılıp şıqtı.

Sol bosatılğan adam qayta kelip, qaru qoldanıp, bir otbasınıñ şañırağın ortasına tüsirdi.

Bwl qwqıq qorğau jüyesiniñ salğırttığı men jauapsızdığınıñ ayğağı.

Resmi organdar ne deydi?

Almatı oblıstıq policiyası mälimdemesinde:

Qılmıstıq ister qozğalğanın,

Jäbirlenuşi men küdiktiniñ «bwrın jaqın qarım-qatınasta bolğanın»,

Qız balanıñ aman-esen qwtqarılğanın habarladı.

Bwl — qoğamdı sabırğa şaqıruğa bağıttalğan mälimdeme. Biraq qoğamdağı aşu-ıza men senim dağdarısın seyiltpedi. Sebebi halıq «nege uaqıtında äreket etpediñder?» degen zañdı saualğa jauap ala almadı.

Bwrınğı rezonanstı oqiğalarmen sabaqtastıq

Bwl jağday Talğardağı alğaşqı rezonanstı qılmıs emes.

Bıltır Şerzat Polattıñ ölimi bükil eldi dür silkindirgen. Jasöspirimniñ qazası boyınşa ükim biıl jazda şıqtı. Biraq sol iste de policiya men qadağalau organdarınıñ äreketsizdigi sınğa alınğan edi.

Şerzat isi kezinde jäbirlenuşilerdiñ şağımdarına qaramastan, Qarjaubaydıñ üyi örtenip, Şerzattıñ ağası Nwrğanat kümändi jağdayda qaytıs boldı.

Osı tizbekke bügingi tragediya qosıldı. Bwl — kezdeysoqtıq emes, jüyelik dağdarıs.

Policiyanıñ ärketsizdiginiñ saldarı

Jıldar boyı şeşilmey kele jatqan tüyinder, jazasız qalğan şeneunikter men policeyler — osınday tragediyalardıñ qaytalanuına jol aşıp otır.

Birinşi qatelik – şağımdı elemeu.

Ekinşi qatelik – wstalğan küdiktini bosatıp jiberu.

Üşinşi qatelik – qoğamğa «biz jağdaydı baqılauda wstap otırmız» degen qwrğaq sözben şektelu.

Osınıñ bäri bir adamnıñ ömirin qidı, bir säbidiñ tağdırın qaterge tikti.

Qoğamdıq senimniñ küyreui

Talğardağı jağday — eldegi işki ister jüyesine degen senimniñ qanşalıqtı älsiregenin körsetti.

Qarapayım halıq «qılmıskerdi özimiz wstap bermesek, ädildik bolmaydı» degen küyge jetti.

Jäbirlenuşilerdiñ şağımın elemegen policiyağa halıq senim artudan qaldı.

Resmi organdardıñ «säbi qwtqarıldı, qauip joq» degen aqtaluı şındıqtı bürkey almadı.

QR işki ister salasınıñ jüyelik dağdarıs

Talğardağı qandı oqiğa — bir audandıq policiya böliminiñ qateligi emes, Qazaqstandağı işki ister salasınıñ jüyelik dağdarısınıñ aynası.

Uaqıtılı äreket etilse, bwl qılmıstıñ aldın aluğa bolatın edi.

Jazasızdıq pen salğırttıqtıñ saldarı — adam qazası men bala wrlığı.

Bilik şınayı reformanı qolğa almasa, mwnday qayğılı oqiğalar qaytalana beredi.

Bwl jolı da «jabulı qazan jabulı küyinde» qala ma, älde qandı oqiğa jüyeni özgertudiñ soñğı dabılı bola ma? Bwl swraq keşe «Şerzat isinde de» qozğalğan bolatın. Oğan jauaptı bügingi Talğardağı qandı oqiğa berip otır.

Qayğı jwtqan otbasınıñ qasiretine ortaqtasıp, köñil aytamız. Qılmıskerdiñ qatañ jazalanuın, sonday-aq osınday qasiretke jol bergen jauaptı twlğalardıñ da zañ aldında qatañ jauapqa tartıluın talap etemiz.

The Qazaq Times