Qırğızstan keden qızmetiniñ jwmısın jaqsartpasa, Qazaqstan şekara baqılauın odan äri küşeytedi – dedi QR Qarjı ministrligine qarastı memlekettik kirister komiteti törağasınıñ orınbasarı Gosman Ämrin jurnalister aldında söylegen sözinde.

Gosman Ämrin jurnalister aldında qazaq-qırğız qarım-qatınasındağı jağdaylardı tüsindiru barısında: «Biz Qırğızstan tarapına bwl mäseleniñ bir ğana şeşu jolı bar ekenin tüsindirgimiz keledi. Ol – birlesip jwmıs isteu. Bwl barlıq kedergilerdi joyıp, aşıq jwmıs isteuge mümkindik beredi. Eger olar bizge aqparat beruden bas tartatın bolsa, bizben qosılıp jwmıs istemeytin bolsa, onda Qazaqstan tarapı şekara baqılauın äri qaray da küşeytuge mäjbür boladı. Biz bwğan deyin Qırğızstanmen eki el arasındağı tauarlardıñ bağası jayındağı aqparatpen almasuğa kelisken bolatınbız. Biz olarğa osı mäselege baylanıstı qwjattardı jiberdik, al olar bizge qwjattarın äli jibergen joq. Onıñ üstine şekara dauına baylanıstı mäselelerdi şeşuge bağıttalğan «Jol kartası» bağdarlamasına da qol qoyılğan joq» - degen.

Esteriñizge salayıq, qazan ayınıñ 10-ınan beri Qazaqstannıñ Qırğızstanmen aradağı şekarası küşeytilgen rejimde jwmıs isteude. Bes birdey qırğız süt öndiruşi kompaniyasına Qazaqstan aumağına önimderin eksporttauğa tıyım salınğan. Köpşilik jwrt qazaq-qırğız şekarasındağı daudı Qırğızstan keden qızmetiniñ dwrıs jwmıs istemey otıruımen nemese qırğız süt önimderiniñ sanitarlıq talaptarğa say emestigimen emes, Atambaev pen Nazarbaev teketiresimen baylanıstıradı. Qoğamda bwnday pikir qalıptasuına sebepte joq emes. Öytkeni bwğan deyin Almazbek Atambaev Nazarbaevtı qatañ sınğa alıp, qazaq biligin «jemqorlar» dep ayıptağan bolatın.

“The Qazaq Times”