پرەزيدەنتتەن تارتىپ، مەملەكەتتىك حاتشىعا دەيىن «قاڭتار وقيعاسىنا» قاتىستى تەرگەۋ، سوت ىستەرىنىڭ ءادىل بولاتىنىن ۋادە ەتكەن ەدى. الايدا، كۇللى ەل ازاماتتارى كوز تىگىپ وتىرعان اتالمىش وقيعاعا قاتىستى العاشقى سوت ۇكىمىنىڭ ءوزى كۇدىكتى ءارى تالاستى پىكىرلەرگە تولى بولدى.

ەل تاريحىنداعى ەلەۋلى وقيعاعا قاتىستى العاشقى سوت ۇكىمىندە وجەت جەڭىسحان مەن باقىت وڭتاي قاتارلى الماتى وبلىسى ەسىك قالاسىنىڭ تۇرعىندارىنا المالى اۋداندىق سوتى قىلمىستىق كودەكستىڭ 291 بابى 3 بولىگى بويىنشا («قارۋلى، وق-دىرىلەردى، جارىلعىش زاتتار مەن جارىلىس قۇرىلعىلارىن جىمقىرۋ نە قورقىتىپ الۋ») ايىپ تاعىپ 5 جىل جازا كەسكەن.

"قارۋ-جاراق ۇرلاۋ" بابىمەن سوتتالعان باقىت وڭتاي جانە وجەت جەڭىسحان. فوتو: Azattyq.org

سوتتالۋشىلاردىڭ جاقىندارى سوت ۇكىمىمەن كەلىسپەيتىنىن، بالالارىنىڭ تەرورريست ەمەس ەكەنىن ايتىپ، پرەزيدەنت توقاەۆتىڭ ىسكە ارالاسۋىن سۇراپ وتىر. ايتالىق، وجەت جەڭىسحاننىڭ اكەسى جەڭىسحان اكرامۇلى پرەزيدەنتتىڭ اتىنا جولداعان ۆيدەو ۇندەۋىندە: «مەنىڭ ۇلىم تەرروريست ەمەس. ەشقانداي قىلمىستىق ۇيىمعا قاتىسى جوق. الاڭعا ءوزىنىڭ تالابىن ايتۋ ءۇشىن شىقتى. بەيبىت شەرۋگە قاتىستى. سول كەزدە الدەكىمدەر قارۋ كەزەپ، قورقىتىپ، قولىنا قارۋ ۇستاتىپ جىبەرگەن. ول قارۋدان وق اتىلماعان. قۇرمەتتى پرەزيدەنت، سىزدەن ۇلىمىزعا اراشا ءتۇسۋدى ءتۇسۋدى سۇرايمىز. جاڭا قازاقستانداعى سوت جۇيەسى ءادىل شەشىم شىعارارىن ايتىپ ەدىڭىز، ءبىزدىڭ بالامىزعا ادىلەتسىز ۇكىم شىعارىپ وتىر”، – دەيدى.

ايىپتالعان ازاماتتاردىڭ جاقىندارى ولار ۇستالىپ كەتكەننەن سوت ۇكىمى شىققانعا دەيىن جاقىندارىمەن كەزدەستىرمەگەنىن ايتادى. ال، مەملەكەت جاعىنان تاعايىندالعان ادۆوكات قۇرالاي قالياسقاروۆ ايىپتالۋشىلاردىڭ ايىپتى مويىنداعانىن مالەمدەگەن.

جاسى جيىرمادان ەندى عانا اسقان، تەپسە تەمىر ۇزەتىن ەكى جىگىتتىڭ ىسىنە قاتىستى سوت شەشىمى ەلەۋلى وقيعاعا قاتىستى العاشقى سوت ۇكىمى ەكەنىن ەسكەرسەك، بەيبىت نارازىلىق بىلدىرگەنى ءۇشىن نەمەسە كەزدەيسوق الاڭدا بولىپ قالعانى ءۇشىن تەرگەۋ اباقتىلارىنا تۇسكەن، پوليتسيادان قيىنداۋ، ازاپتاۋ كورگەن ازاماتتاردىڭ ىسىنە قاتىستى سوت ۇكىمدەرىنىڭ شىنايىلىعى مەن ادىلدىگى تۋرالى كۇدىككە جول اشادى.

قازىرگى تاڭدا، «قاڭتار وقيعاسى» كەزىندە الاڭعا بەيبىت تۇردە بارىپ ءوزىنىڭ ازاماتتىق پىكىرىن جەتكىزبەك بولعان تالايلاعان ازاماتتىڭ ءىستى بولىپ، ءتىپتى تەرگەۋ اباقتىلارىندا ازاپتاۋعا ۇشىراپ جاتقانى بەلگىلى. تەرگەۋ اباقتىلارىندا ازاپتاۋ فاكتلەرىنىڭ بولعانىن مەملەكەت تارابى دا مويىنداعان. ەڭ قيىنى ازاپتاۋ ارقىلى قىلمىستىق جاۋاپكەرشىلىكتى مويىنىنا جۇكتەپ جاتقاندارى دا بولۋى ابدەن مۇمكىن. بۇل پرەزيدەنت توقاەۆ ايتقان «جاڭا قازاقستاننىڭ» سوت جۇيەسىنە دەگەن حالىق سەنىمىنە دە قاتىستى ءىس بولىپ وتىر.

The Qazaq Times