قاڭتار قىرعىنىندا الماتى قالاسى پوليتسيا دەپارتامەنتىندە ازاپتالىپ ولتىرىلگەن جاسۇلان انافياەۆتىڭ ءىسى ۇكىم وقىلدى.

ءبىر كۇن ىشىندە ۇكىم وقيتىن ۋاقىت ءتورت مارتە وزگەردى. المالى اۋداندىق سوتىنىڭ سۋدياسى ەسەن ۇستەلباەۆ 7 كۇدىكتىنىڭ ءبارىن كىنالى دەپ تانىدى. الماتى قالاسى پوليتسيا دەپارتامەنتى ۋاقىتشا ۇستاۋ يزولياتورىنىڭ جەتى قىزمەتكەرىنە شىققان ۇكىم مىناداي:

• ايان ەلۋبەكوۆ – 10 جىل تۇرمە جازاسى;

• ماحامبەت شىنجىرباەۆ – 10 جىل تۇرمە جازاسى;

• زاكير يبراگيموۆ – 9 جىل تۇرمە جازاسى;

• نۇرلان تورىباەۆ – 8 جىل تۇرمە جازاسى;

• ارداق ازىمبەكوۆ – 8 جىل تۇرمە جازاسى;

• بەيبىت جاقىپباەۆ – 8 جىل تۇرمە جازاسى;

• ارنات ميراديلوۆ – 5 جىل تۇرمە جازاسى;

ولاردىڭ بارلىعى قىلمىستىق كودەكستىڭ 146-بابى («ازاپتاۋ») 3-بولىگىمەن، ياعني «جابiرلەنۋشiنى ابايسىزدا ءولتىرىپ العان» دەپ ايىپتالعان.

پروكۋرور عابيتوۆ سوڭعى ايىپتاۋ اكتىسىندە ەكس-پوليتسەيلەرگە 6-10 جىل جازا سۇراعان. 

سوت ايىپتالۋشىلارعا جابىرلەنۋشى جاسۇلان انافياەۆتىڭ قارىنداسى مەن جارىنا 20 ميلليون تەڭگە مورالدىق زالالدى بىرىگىپ تولەۋدى مىندەتتەدى. سوتتالۋشىلار پروتسەسس شىعىندارىن دا تولەۋگە ءتيىس.

مارقۇمنىڭ تۋىستارى سوت ۇكىمىنە كەلىسپەيدى. جاسۇلان انافياەۆتىڭ قارىنداسى ءلاززات انافياەۆا سوتقا اپەللياتسيالىق شاعىم تۇسىرمەك. جابىرلەنۋشى تاراپ ەكس-پوليتسەيلەر قىلمىستىق كودەكسىنىڭ 146-بابىمەن («ازاپتاۋلار») ەمەس، ءاۋ باستان تالاپ ەتىلگەندەي 99-باپپەن («ادام ءولتىرۋ») جازالانۋى كەرەك دەپ ەسەپتەيدى.

قاڭتاردا كىسى ولىمىنە قاتىستى سوتتالعان جاي ازاماتتار كەمى 15 جىلدان جوعارى، ال ءدال وسى ايىپپەن جاۋاپقا تارتىلعان ورگان قىزمەتكەرلەرى كوپ دەگەندە 10 جىلعا جازالانعانىن قۇقىق قورعاۋشىلارى سوت بيلىگىنىڭ الالاۋى، قوس ستاندارت ۇستانىم دەپ سىنايدى.

The Qazaq Times