2 مامىردا بەس ايعا جۋىق قارالعان «ارۋاقتار سوتىنا» ۇكىم وقىلدى. الماتى قالاسىنىڭ بوستاندىق اۋداندىق №2 سۋدياسى داۋرەن ماۋكەەۆ قاڭتاردا قازا تاپقان بەس مارقۇمنىڭ ءبارىن ايىپتى دەپ تاپتى. 

سەرىك كەريموۆ، قانات اۋباكىروۆ، نۇربولات قاسىمجانوۆ، اسلان ۆاليەۆ، شىڭعىس تاستانبەكوۆتەردىڭ ءبارىن قىلمىستىق كودەكستىڭ 272-بابى 2-بولىگىمەن جاپپاي تارتىپسىزدىككە قاتىستى جانە تاستانبەكوۆتەن وزگەسىن 269-بابىنىنىڭ 2-بولىگىمەن مەملەكەتتىك عيماراتقا ءسوز بايلاسىپ شابۋىلدادى دەپ تانىدى.  

وسىلايشا سۋديا پروكۋرور ارمان نۇگىربەكوۆتىڭ سوڭعى ايىپتاۋ اكتىسىن تولىعىمەن قاناعاتتاندىردى.

مارقۇمداردىڭ تۋىستارى – قوعامدىق قورعاۋشىلار. فوتو: QT / كۇلتەگىن اسپانۇلى

الايدا قاڭتار قۇرباندارىنىڭ تۋىستارى مەملەكەتتىك ايىپتاۋمەن كەلىسپەيدى. ولار وسىعان دەيىن ءجارىسسوزدىڭ ەكى وتىرىسىندا دا تەرگەۋ-پروكۋراتۋرا ورگاندارىنىڭ ءىستى قاراۋ-قابىلداۋ جانە تولىقتىرۋ كەزەڭىندە ورەسكەل قاتەلىكتەر مەن كەمشىلىكتەر كەتكەنىن ناقتى كورسەتكەن. ءىس تەرگەۋىندەگى شيكىلىكتەر مەن زاڭبۇزۋشىلىقتاردى سوتقا ءتىزىپ ۇسىنعان.

شىڭعىس تاستانبەكوۆتىڭ اكەسى ابايحان جانە اپكەسى شىنار تاستانبەكوۆتەر.

مارقۇمداردىڭ ادۆوكاتتارى مەن قوعامدىق قورعاۋشىلار پروكۋرور تاققان ايىپتار دالەلدەنبەگەنىن، جالعان-جاساندى جولمەن جانە جالپىلاما بولجامدارمەن نەگىزسىز جۇرگىزىلگەنىنە شاعىنادى.

جىل باسىندا باستالعان «ارۋاقتار سوتىنىڭ» ۇكىمى سوتقا قاتىسۋشىلاردىڭ نارازىلىعىن تۋدىردى. 14-وتىرىستا ءمالىم بولعان اۋداندىق ينستانتسيانىڭ ۇكىمىنە نارازىلار اپپەلياتسياعا شاعىم تۇسىرەتىنىن ايتتى.

«ارۋاقتار سوتى» قوعام مەن قۇقىق قورعاۋشىلار تارابىنان قاتاڭ سىنالسا دا بىرنەشە وڭىردە ءجۇرىپ جاتىر. ءدال وسىعان ۇقساس قاڭتار قۇرباندارىن سوتتاۋ تاجىريبەسى جۋىردا تاراز قالالىق سوتىندا بولدى. 7 اقپاندا سۋديا باعدات تورەبەكۇلى 5 مارقۇم مەن 4 ءتىرى ادامدى كىنالى دەپ تانىعان ۇكىم شىعارعان. تەرگەۋ جالا مەن بۇرمالاۋمەن، سوت ادىلەتسىز ءجۇردى دەگەن مارقۇمداردىڭ تۋىستارى ولاردىڭ كەيبىرى كەزدەيسوق، ەندى ءبىرى بەيبىت نارازى بولعانىن ايتىپ، وبلىستىق سوتقا اپەللياتسيا شاعىمىن تۇسىرگەن. «ارۋاقتار سوتىنىنىڭ» الماتىلىق نۇسقاسىن قاراپ جاتقان سۋديا داۋرەن ماۋكەەۆتىڭ وندىرىسىندە قاڭتارشىلارعا قاتىستى تاعى ءبىر كۇردەلى «24+1 ءىسى» بار. وندا 24 ءتىرى جانە ءبىر مارقۇم قاڭتارشى ايىپتالۋدا. بىراق قاڭتارشىلاردىڭ كەمى 18-ءى وزىنە تاعىلعان ايىپپەن مۇلدە كەلىسپەيدى، جالا دەپ ەسەپتەيدى. ماۋكەەۆ وسىعان دەيىنگى قىزمەت بابابىندا 2017 جىلى جۋرناليست جانبولات مامايعا ايىپتاۋ ۇكىمىن شىعارعان.

The Qazaq Times