ساننان ساپاعا: زەلەنسكي ۋكراينا كونستيتۋتسياسىنا وزگەرىستەر ەنگىزدى

وسى اپتادا ۋكراينا پرەزيدەنتىنىڭ تاپسىرماسىمەن جوعارعى رادا كونستيتۋتسياعا وزگەرىستەر ەنگىزۋ تۋرالى شەشىمدى ماقۇلدادى. پارلامەنتتىڭ 373 مۇشەسى قولداپ داۋىس بەرگەن سەگىز وزگەرىستىڭ ءبىرى – دەپۋتاتقا تيىسپەۋشىلىك قۇقىعىن شەكتەۋ.

ۆلاديمير زەلەنسكيدىڭ كونستيتۋتسياعا قاراستى جاڭا زاڭ جوبالارىن ۇسىنۋى – پرەزيدەنت پەن جوعارعى رادا دەپۋتاتتارى اراسىندا قىزۋ ديسكۋسسياعا ۇلاستى. اسىرەسە، تالقىلاۋ بارىسىندا رەگلامەنت بۇزىلدى دەپ «سىنىققا سىلتاۋ» ىزدەگەن رەسەيشىل باعىتتاعى «وپپوزيتسيالىق پارتيا – ءومىر ءۇشىن» پارتياسىنىڭ دەپۋتاتتارى جاڭا وزگەرىستەردى ماقۇلداۋدان باس تارتتى. وسىعان قاتىستى زەلەنسكي: «ۋكراينا دەپۋتاتتارى بۇگىنگى كۇنگە دەيىن عاجايىپ جاڭالىق ەنگىزدى: ولار ساياساتتا كۇشىن جويمايتىنداي «قۇرىلعى» ويلاپ تاپتى. ونىڭ قىزمەتى وتە وڭاي: الدىمەن، كانديداتتار حالىق الدىندا ۋادەسىن ءۇيىپ-توگەدى، جوباسىن تانىستىرادى، بىراق كەيىننەن ۋادە ورىندالمايدى. مۇنىمەن قوسا، ولار تيىسپەۋشىلىك قۇقىعىن يەلەنەدى. حالىق ۇمىتقاننان كەيىن، قايتادان سايلاۋعا تۇسەدى. ەندى بۇل قۇرىلعىنى تاريح قوقىستارىنىڭ قاتارىنا قوسار كەز كەلدى»، – دەپ مالىمدەدى.

سونىمەن، ۋكراينا جوعارعى راداسى ماقۇلداعان وزگەرىستەر بويىنشا، بىرىنشىدەن, كونستيتۋتسيادا جازىلعان «پارلامەنت دەپۋتاتىن تۇتقىنداۋعا نەمەسە رادانىڭ كەلىسىمىنسىز قىلمىستىق جاۋاپكەرشىلىككە تارتۋعا بولمايدى» دەگەن ءماتىن ماڭىزىن جويدى;

ەكىنشىدەن, «ساننان ساپاعا» ۇسىنىسىنا سايكەس، رادا دەپۋتاتتارىنىڭ سانى 450-دەن 300-گە ازايدى. سونىمەن قاتار، ءار دەپۋتات مەملەكەتتىك ءتىلدى جەتىك مەڭگەرۋگە مىندەتتى;

ۇشىنشىدەن, پارلامەنتكە قوعام ءومىرىنىڭ ءتۇرلى سالالارىندا زاڭدار مەن كونستيتۋتسيانىڭ ساقتالۋىن قاداعالايتىن ۋاكىلدەردى تاعايىنداۋ قۇقىعى بەرىلدى;

تورتىنشىدەن, رادا شەندىلەرى تالاپتاردى بۇزىپ، قىزمەتىنە سەلقوس قاراعان جاعدايدا، دەپۋتاتتىق مانداتىنان ايىرىلادى;

بەسىنشىدەن, بيلىك جۇرگىزۋ كەزىندە حالىقتىڭ ءرولىن ءبىر ساتىعا جوعارىلاتۋ. زەلەنسكي بۇل جونىندە: «حالىقتىڭ مەملەكەت ساياساتىنا ارالاسۋى، ايتارلىقتاي دارەجەگە يە بولۋى، پىكىرىنە قۇلاق اسۋ – مەنىڭ سايلاۋالدى جوبامنىڭ نەگىزگى كىلتى بولاتىن. مۇنداي وزگەرىستەر دەموكراتياسى مىعىم باتىستىق ەلدەرگە ءتان. ءتۇپتىڭ تۇبىندە، ءدال وسى حالىق كونستيتۋتسيانىڭ نەگىزگى قاينار كوزى سانالادى»، – دەدى.

التىنشىدان, پرەزيدەنت تاۋەلسىز، ەركىن ۇيىمدار قۇرىپ، ۇلتتىق انتيكوررۋپتسيا جانە مەملەكەتتىك زەرتتەۋ بيۋروسىنىڭ باسشىسىن سايلاۋ، وتستاۆكاعا جىبەرۋ قۇقىعىنا يە بولدى;

جەتىنشىدەن, كونستيتۋتسيا حالىق دەپۋتاتىنا داۋىس بەرۋ ناتيجەسى نەمەسە جوعارعى رادا مەن ونىڭ ورگاندارىندا ايتقان ءسوزى ءۇشىن زاڭ الدىندا جاۋاپقا تارتىلمايتىندىعىنا (ار-نامىسقا تيۋ نەمەسە جالا جابۋدى قوسپاعاندا) كەپىل بەرەدى;

سەگىزىنشىدەن, جوعارعى راداعا جەكە كەڭەسشىلىك ورگاندارىن قۇرۋعا مۇمكىندىك بەرىلدى.

ءسوز سوڭىندا، ۋكراينانىڭ دەموكراتيالى، باتىستىق دامىعان ۇلگىدەگى مەملەكەت ەكەنىن تىلگە تيەك ەتكەن ۆلاديمير زەلەنسكي جوعارىدا اتالعان وزگەرىستەردىڭ حالىق، مەملەكەت ءۇشىن ماڭىزىنا توقتالدى.

"The Qazaq Times"