كەشە، الماتىداعى قر ۇلتتىق كىتاپحاناسىندا بەلگىلى اقىن-جازۋشى، پۋبليتسيست، اۋدارماشى، فيلولوگيا عىلىمدارىنىڭ كانديداتى، قازاقستان جازۋشىلار وداعىنىڭ جانە قازاقستان جۋرناليستەر وداعىنىڭ مۇشەسى باقىتبەك ءبامىشۇلىنىڭ شىعارماشىلىق كەشى ءوتتى. كەش اقىننىڭ اسقارالى 60 جاسقا تولعان مەرەيتويى قارساڭىندا ءوتتى.

سەكەن تۇرىسبەك اقىننىڭ كەشىنە كۇيدەن شاشۋ شاشتى. فوتو: QT.

كەشكە اقىننىڭ عىلىم مەن ادەبيەتتەگى ۇستازدارى، قالامداس-زامانداس سەرىكتەرى، اۋىلداس اعايىن-جۇرتى، وقىرماندارى جانە ونەرپازدار مەن باق وكىلدەرى قاتىستى. كەش تىزگىنىن حالىقارالىق "الاش" سىيلىعىنىڭ يەگەرى، ايتىسكەر اقىن داۋلەتكەرەي كاپۇلى ۇستاپ، القالى ءسوزدىڭ شىمىلدىعىن جازۋشىلار وداعى باسقارما توراعاسى ۇلىقبەك ەسداۋلەتوۆ اشتى. ولەڭ مەن ونەردەگى اعا بۋىن قاسقا مەن جايساڭ كەزەگىمەن ءسوز الىپ، ءبامىشۇلى شىعارمالارىنىڭ قىر-قاتپارلارى، ەڭبەك جولىنىڭ بەل-بەلەستەرى تۋرالى ەستەلىكتەر مەن القاۋلى سوزدەر سويلەدى.

"ەر جانىبەك" قوعامدىق قورىنىڭ قۇرمەتتى پرەزيدەنتى ماقسۇت تەمىرباەۆ قور اتىنان سىيلىق تابىستادى. فوتو; QT,

سونداي-اق، كەشتە اقىننىڭ سوزىنە جازىلعان اندەر ورىندالىپ، "وسپان باتىر" پوەماسىنىڭ نەگىزىندە شاعىن سپەكتاكل قويىلدى.

ونەر اكادەمياسىنىڭ ستۋدەنتتەرى "وسپان باتىر" پوەماسى نەگىزىندە سپەكتاكل قويدى. فوتو: QT

باقىتبەك ءبامىشۇلىنىڭ ەلىنە بەرگەن شىعارماشىلىق كەشى "ەر جانىبەك" حالىقارالىق قوعامدىق قورى جاعىنان حالىقارالىق دەڭگەيدە اتالىپ ءوتىلىپ جاتقان وسپان باتىردىڭ 120 جىلدىق مەرەيتوي اياسىندا وتكەنىن، كەشكە "ەر جانىبەك" قورىنان تىس، قازاقستان جازۋشىلار وداعى مەن قر ۇلتتىق كىتاپحاناسىنىڭ قولداۋ كورسەتكەنىن اتاپ وتكەن ءجون.

اقىن جانە ونەرپازدار. فوتو: QT.

اقىن تۋرالى از ايال

ءبامىشۇلى باقىتبەك اقىن  بايان-ولگەي ايماعىنىڭ بۇلعىن سۇمىنىندا ۇلكەن تەمىرتىنىڭ نورتى جايلاۋىندا  1958 جىلى 25 مامىردا دۇنيەگە كەلگەن. 1975 جىلى بۇلعىن سۇمىندىق 8 جىلدىق، 1977 جىلى ۇلانباتىر قالاسىندا حوسە مارتە اتىنداعى 52- ءشى ون جىلدىق ورتا مەكتەپتى بىتىرگەن.  1977 جىلى رەسەيدىڭ لەنينگراد (سانكت-پەتەربۋرگ) قالاسىندا پوليتەحنيكالىق ينستيتۋتتىڭ دايىندىق كۋرسىندا وقىپ، اكادەميك وبرازتسوۆ اتىنداعى تەمىر جولدار ينستيتۋتىن 1983 جىلى تامامداپ، ينجەنەر-ەلەكتريك ماماندىعى بويىنشا «اۆتوماتيكا، تەلەمەحانيكا جانە بايلانىس» مامانى بولىپ شىعادى. موڭعوليانىڭ مەملەكەتتىك ۋنيۆەرسيتەتى جانىنداعى باسقارۋ قىزمەتكەرلەرىن دايارلاۋ ينستيتۋتىن تامامداعان. فيلولوگيا عىلىمدارىنىڭ كانديداتى، اقىن-جازۋشى، پۋبليتسيست، اۋدارماشى،  قازاقستان جازۋشىلار وداعىنىڭ جانە قازاقستان جۋرناليستەر وداعىنىڭ مۇشەسى.  حالىقارالىق «كوش» گازەتىن بىرنەشە جىل باسقاردى. «Minber.kz» ۇلتتىق ينتەرنەت گازەتىنىڭ اتقارۋشى رەداكتورى. الماتى «مەتروپوليتەن قىزمەتكەرى. «ماحمۋد قاشقاري جانە موڭعول ءتىلى» جانە «موڭعوليا قازاعىنىڭ ءتىلى: الەۋمەتتىك قىرى» اتتى مونوگرافيالار جازدى. و.سۇلەيمەنوۆتىڭ «از ي يا» كىتابىن موڭعول تىلىنە، ال موڭعول اقىنى ر.چوينومنىڭ «التاي» داستانىن، تۇرىكتىڭ حالىق اقىنى قاراوجالان، تۇركىمەن اقىنى وراز ياگمۋروۆ ولەڭدەرىن قازاق تىلىنە اۋداردى. «ماڭگى كوك اسپان استىندا» (1998 ج), «تۇمارلى تاڭ» (2003 ج), «باي بۇلعىن جەرىم-اي» (2008 ج), «وسپان باتىر» (2008 ج), «ايتورى عۇمىر» (2012 ج), «ازانباي ابىز» (2013 ج), «زۋقا باتىر – الاساپىران زامانا ارىستانى» اتتى ولەڭدەر مەن پوەمالار جيناقتارى، «اجالسىز ادام» (2016 ج) اتتى اڭگىمەلەر مەن حيكاياتتار، «التىن ارالدىڭ ارعىماقتارى» (2018 ج) ولەڭ-رومان كىتابى جارىق كوردى. «بايبەسىك تۇمالارى» (ە.اقبەرەنمەن بىرىگىپ), «شەر – شەجىرە»، «تارازى»، «ءلاۋ» قاتارلى جيناقتاردى قۇراستىردى. وننان استام ولەڭدەرىنە ءان جازىلدى.

كەشكە قوناقتارى. فوتو: QT. 

“The Qazaq Times”