ج. شانيننىڭ 215 جىلدىعىنا وراي وتكەن دوڭگەلەك ۇستەل. فوتو: QT.

كەشە، 17 قاڭتار كۇنى الماتىداعى م. اۋەزوۆ اتىنداعى قازاق مەملەكەتتىك اكادەميالىق دراما تەاترىندا، قازاقستانداعى تەاترلاردىڭ اتاسى، العاشقى قۇرۋشىلارىنىڭ ءبىرى، رەجيسسەر، دراماتۋرگ جۇمات شانيننىڭ 125 جىلدىعىنا وراي دوڭگەلەك ۇستەل ءوتتى. تالقى وتىرىسىنان كەيىن ع. مۇسىرەپوۆتىڭ «قىز جىبەك» مۋزىكالىق دراماسى كورەرمەندەرگە ۇسىنىلدى.

ج. شانيننىڭ 125 جىلدىعىنا وراي دوڭگەلەك ۇستەلگە قاتىسۋشىلار. فوتو: QT.

دوڭگەلەك ۇستەلگە رەسپۋبليكاعا تانىمال تەاتر اكتەرلەرى، تەاترتانۋشىلار، سىنشىلار، زەرتتەۋشىلەر جانە ج. شانيننىڭ ۇرپاقتارى قاتىسىپ، تەاتر الىبىنىڭ ءومىرى تۋرالى قۇندى دەرەكتەردى ورتاعا سالدى. سونىمەن بىرگە ج. شانيننىڭ قالامىنان تۋعان «ارقالىق باتىر» كىتابى قايتالاي باسىلىپ، تۇساۋىن كەسىلدى.

جازۋشى، عالىم بەيبىت قويشىباەۆ. فوتو: QT.

جۇمات شانين ءومىرى مەن ول ءومىر سۇرگەن ءداۋىر تۋرالى جازۋشى، عالىم، پۋبليتسيست بەيبىت قويشىباەۆ: «شىنداپ كەلگەندە، تەاتردىڭ العاشقى قۇرىلعان كەزدەگى تاعدىرى دا، ج. شانيننىڭ تاعدىرى دا تاريحىمىزداعى ەڭ ءبىر قيىن كەزدەرگە تۋرا كەلدى. سول كەزدە ەسەڭگىرەگەن حالىقتىڭ ەڭسەسىن كوتەرۋگە تەاتردىڭ ءرولى زور بولدى، وعان قىزمەت ەتكەن وسى جۇمات شانين قاتارلى ەرلەردىڭ دە ەڭبەگى زور. سول كەزدە تەمىربەك جۇرگەنوۆ باستاپ مادەنيەتتىڭ ۇلكەن ءبىر رەۆوليۋتسياسىن جۇرگىزىپ وتىردى. سونداي كەزدە جارتىسى قىرىلىپ قالعان حالىقتىڭ شاشىراپ كەتكەن ونەرپازدارىن جيناپ، مۋزىكا تەاترىن ۇيىمداستىرىپ، ەل ەڭسەسىن تىكتەگەن وسى جۇمات شانين بولاتىن. ءتىپتى رەسەيدىڭ قۇرامىنداعى قازاق اۆتونوميالى رەسپۋبليكاسىنىڭ وداقتاس رەسپۋبليكا رەتىندە تانىلۋىنا دا وسى تەاتردىڭ ەڭبەگى زور بولدى. سەبەبى ول كەزدە ۇلتتىق ەكونوميكاسى كۇيرەگەن، حالقىنىڭ سانى ازايعان ەلىمىزدى تەڭ، وداقتاس رەسپۋبليكا دەپ تانىتاتىن ءبىر عانا وسى مادەنيەت سالاسى تۇرىپ ەدى»، – دەگەن پىكىرىن ورتاعا سالدى.

"بەكەجان" "قىز جىبەك" مۋزىكالىق دراماسىنىڭ كورەرمەنى بولدى. فوتو: QT.

تەاتر اتاسى، قازاق تەاتر ونەرىنىڭ، دراماتۋرگياسىنىڭ الىبىن ەسكە الۋ جيىنىندا ا. ءاشىموۆ، ە. وباەۆ، ءا. بوپەجانوۆا، ز. اساباەۆ، ءا. كوپىش قاتارلى، ونەر مەن ادەبيەت قايراتكەرلەرى جانە ج. شانينا، قايرات شانين قاتارلى ج. شانين اتانىڭ ءىزىن جالعاستىرۋشى ۇرپاقتارى ءسوز تىزگىنىن ۇستادى.

ەلىك نۇرسۇلتان ساحنالاعان "قىز جىبەك". فوتو: QT.

دوڭگەلەك ۇستەلدەن كەيىن، ج. شانيننىڭ شوبەرەسى ەلىك نۇرسۇلتاننىڭ ساحنالاۋىمەن  ع. مۇسىرەپوۆتىڭ «قىز جىبەك» مۋزىكالىق دراماسى كورەرمەندەرگە ۇسىنىلدى.

“The Qazaq Times”