ءاربىر قازاقستاندىقتىڭ بانك الدىنداعى قارىزى 3 ايلىق جالاقىعا تەڭ

قازاقستاندا 2017 جىلدىڭ قىركۇيەك ايىنىڭ سوڭىندا جەكە تۇلعالارعا بەرىلگەن تۇتىنۋشىلىق كرەديت 2,9 ترلن تەڭگەنى قۇراعان جانە ءبىر جىل ىشىندە ءوسىم 14,9% بولعان، دەپ حابارلايدى Ranking.

ال بىلتىرعى جىلى تۇتىنۋشىلىق كرەديت كەرىسىنشە، 6,5%-عا نەمەسە 2,5 ترلن تەڭگەگە ازايىپ كەتكەن. جەكە تۇلعالارعا بەرىلگەن جالپى بولشەك كرەديتتەردىڭ كولەمى  61,2%-دان 64,4%-عا دەيىن ۇلعايعان.

جالپى قازاقستاننىڭ 16 وڭىرىندەگى تۇرعىندار تۇتىنۋشىلىق قاجەتتىلىك ءۇشىن كرەديتتى بەلسەندى تۇردە العان. كورسەتكىش بويىنشا الماتى الدىڭعى ورىندا - ءوسىم 83,6 ملرد تەڭگەدەن 1,1 ترلن تەڭگەگە دەيىن بولعان.

قاراعاندى وبلىسىندا تۇتىنۋشىلىق كرەديتتىڭ كولەمى 21,7%-دى قۇرادى نەمەسە 32,1 ملرد تەڭگەدەن 180,2 ملرد تەڭگەگە دەيىن ۇلعايعان. ءوڭىر تۇتىنۋشىلىق نەسيە الۋشىلار ۇلەسى بويىنشا قازاقستاندا ءتورتىنشى ورىندا.

استانا جىلدىق ءوسىم بويىنشا ءۇشىنشى ورىندا تۇر. باس قالانىڭ كورسەتكىشى 30,8 ملرد تەڭگەدەن 231,5 ملرد تەڭگەگە دەيىن كوبەيگەن. قازاقستان بويىنشا ۇلەسى وزگەرىسسىز  – 8,1%.

2017 جىلدىڭ 3 توقسانىنىڭ سوڭىنا قاراي تۇتىنۋشىلىق نەسيەنىڭ دەڭگەيى 14,3%-عا وسكەن جانە قىزمەتكەر ءبىر ادام ءۇشىن 447 300 تەڭگەنى قۇرايدى. وسىلايشا جۇمىس ىستەيتىن ءبىر عانا قازاقستاندىقتىڭ تۇتىنۋشىلىق قارىزى ورتاشا ەسەپپەن ونىڭ 3 ايلىق جالاقىسىنا تەڭ.

مىسالى الماتىدا ءبىر جۇمىسشىنىڭ بانك الدىنداعى تۇتىنۋشىلىق قارىزى 1,3 ملن تەڭگەنى نەمەسە 7,3 ايلىق جالاقىسىن قۇرايدى. ال ماڭعىستاۋ وبلىسىنىڭ ءبىر عانا تۇرعىنى تۇتىنۋشىلىق قارىزىن جابۋعا 556 800 تەڭگە نەمەسە 2,1 ايلىق جالاقىسىن جۇمسايدى.

“The Qazaq Times”