اقش ستۋدەنتتىك قارىزدى قايتارۋ تالاپتارىن قايتا قاراستىرىپ جاتىر

امەريكالىق جاستاردىڭ كوپشىلىگى كوللەدجدە ءبىلىم الۋ ءۇشىن مەملەكەتتەن نەسيە الادى دا، كوللەدجدى بىتىرگەننەن كەيىن بىرنەشە جىل كولەمىندە (جۇمىس ىستەپ ءجۇرىپ) ونى وتەۋگە مىندەتتەلەدى. قازىرگى تاڭدا اقش ازاماتتارىنىڭ كوبىسى بانكروتتىق تۋرالى ارىز جازعان كۇننىڭ وزىندە وزدەرىنىڭ ستۋدەنتتىك قارىزدى وتەۋگە ءماجبۇر (قارجىلىق جاعدايىنىڭ تىم مۇشكىل ەكەنىن دالەلدەي الماسا). فەدەرالدىق زاڭعا ساي، قارىز الۋشىلار باسىندا "تولىققاندى ءومىر سۇرۋگە كەلمەيتىن" قيىندىقتارى بار ەكەنىن كورسەتۋ كەرەك، - دەپ حابارلايدى CNN اقپارات اگەنتتىگى.

ءبىلىم بەرۋ دەپارتامەنتى وسى تالاپتى قاراستىرىپ، قوعامنىڭ وسى ماسەلەگە قاتىستى پىكىرىن بىلۋگە تىرىسىپ جاتىر.

دەپارتامەنت بۇل زاڭدى وزگەرتە المايدى. ونى كونگرەسس وزگەرتە الادى. بىراق دەپارتامەنت بۇل "قيىندىقتارعا" نە جاتاتىنىن انىقتاي الادى. ادەتتە سوت قارىز العان ادامنان "تولىققاندى ءومىر سۇرۋگە كەلمەيتىن" قيىندىقتارى ءبىراز ۋاقىتقا سوزىلىپ كەتكەنىن نەمەسە ونىڭ راسىمەن جاعدايىن جوندەۋگە تىرىسقانىن، شىنىمەن بانكروتتىق جاعدايدا ەكەنىن دالەلدەۋدى تالاپ ەتەدى.

زاڭگەرلەر "سوتتىڭ "قيىندىقتارعا" قاتىستى تالاپتارى تىم قاتاڭ" دەگەن ويدا. تۇتىنۋشىلار قوعامداستىعىنىڭ زاڭگەرى دجون راو (John Rao): سەبەبى حالىقتىڭ باسىم كوپشىلىگى شىن مانىندە ستۋدەنتتىك قارىزىن تولەۋدەن بوساۋ مۇمكىندىگىنە يە بولا وتىرىپ، سوتتىڭ شەشىمىن ءوز بەتىنشە بولجاعاندىقتان، شاعىمدانۋعا تىرىسپايدى دا. ال بانكروتتىق تۋرالى ارىزدانعاندار ءبىر ۋاقىتتا اي سايىن قارىزدارىن وتەپ وتىرۋعا شاماسى كەلمەي، سوتقا جۇگىنۋگە دە قاراجاتى بولماۋى مۇمكىن، - دەيدى.

قارىز العان ادام ستۋدەنتتىك قارىزىن وتەۋدى 9 اي جانە ودان ۇزاق مەرزىمگە سوزعان بولسا، ول كەلىسىم شارتتارىن بۇزعان بولىپ سانالادى. قازىر ەلدە 4 ملن-نان استام ستۋدەنتتىك قارىز وتەلمەگەن.

بۇل ماسەلەگە قاتىستى قوعامنىڭ وي-پىكىرى ۇكىمەتكە ونلاين نەمەسە پوشتامەن مامىردىڭ 22-نە دەيىن جىبەرىلۋ كەرەك.

“The Qazaq Times”