فوتو: mestopodsolntsem.ru

وسى جىلدىڭ مامىر ايىندا قازاقستاندا يپوتەكالىق كرەديت كولەمى بىردەن ارتىپ، 13,4 پايىزعا نەمەسە 118 ملرد تەڭگەگە كوبەيگەن. مۇنداي مالىمەتتى  Ranking ساراپتاما اگەنتتىگى كەلتىرىپ وتىر. 

اگەنتتىكتىڭ مالىمەتىنشە، ءبىر ايداعى يپوتەكالىق كرەديتتىڭ مۇنشا جوعارى دارەجەدە بولۋى سوڭعى بەس جىلدا بايقالماعان. سوڭعى رەت 2012 جىلدىڭ مامىرىندا ەكىنشى دەڭگەيلى بانكتەردىڭ يپوتەكالىق كرەديتى ءساۋىر ايىنا قاراعاندا 120 ملرد تەڭگەگە ارتقان. ال وتكەن جىلعا ءمان بەرسەك، ءبىر ايداعى ءوسىم بار بولعانى 6,9 ملرد تەڭگە نەمەسە 0,8 پايىز بولعان.

يپوتەكا نارىعىنىڭ جاندانۋى جىلجىمايتىن مۇلىك وبەكتىلەرى ساتىلىمىنىڭ كوبەيۋىمەن بايلانىستى. ويتكەنى وسى جىلدىڭ ءبىرىنشى جارتىسىندا تۇرعىن ۇيلەردى ساتۋ جانە ساتىپ الۋ بويىنشا 111 800 كەلىسىم جاسالعان جانە بۇل وتكەن جىلدىڭ سايكەس كەزەڭىنە قاراعاندا 27,3 پايىزعا جوعارى.

يپوتەكالىق كرەديتتى ءجيى العاندار ادەتتەگىدەي الماتى تۇرعىندارى. ءبىر ايدا يپوتەكا بويىنشا الىنعان كرەديت كولەمى 44,5 ملرد تەڭگەگە نەمەسە 17,4 پايىزعا ارتقان. ناتيجەسىندە الماتى قالاسىنىڭ يپوتەكا نارىعىنداعى ۇلەسى 29,9 پايىزعا دەيىن وسكەن.

استانا تۇرعىندارى يپوتەكا الۋ بويىنشا ەكىنشى ورىندا. باس قالادا يپوتەكاعا جۇمسالعان قاراجات 16,3 ملرد تەڭگەگە ارتقان. الايدا وڭىردەگى قارىز پورتفەلىنىڭ كولەمى الماتىعا قاراعاندا تومەن.

ال ءۇشىنشى ورىندا قاراعاندى وبلىسى. بۇل وبلىستا تۇرعىندارعا بەرىلگەن يپوتەكالىق كرەديتتىڭ كولەمى 12,2 ملرد تەڭگەگە نەمەسە 28 پايىزعا ارتقان. قازاقستاننىڭ يپوتەكا نارىعىنداعى وبلىستىڭ ۇلەسى 5 پايىزدان 5,6 پايىزعا دەيىن ۇلعايدى.

ايتا كەتەيىك، 2015 جىلدىڭ تامىزىنان باستاپ دوللار باعاسى كۇرت كوتەرىلگەننەن كەيىن كوپتەگەن بانكتەر يپوتەكا بەرۋدى توقتاتقان. سونداي-اق، دوللار ەكۆيۆالەنتىمەن يپوتەكالىق كرەديت العان ازاماتتاردىڭ قارىزدارى قايتا قارجىلاندىرىلعان بولاتىن.

“The Qazaq Times”