ۇلتتىق بانك توراعاسى دانيار اقىشەۆ. فوتو: Forbes.kz

قر ۇلتتىق بانكىنىڭ توراعاسى دانيار اقىشەۆ پرەزيدەنت نۇرسۇلتان نازارباەۆتىڭ بانك سەكتورىنا قاتىستى ايتقان سىنىنا جاۋاپ بەردى. 

"مەملەكەت باسشىسىنىڭ ۇكىمەت جيىنىندا ايتقان سىنى ورىندى. ۇلتتىق بانك رەتتەۋشى رەتىندە ەكىنشى دەڭگەيلى بانكتەردىڭ 2008-2009 جىلدارى جينالىپ قالعان ماسەلەلەرىن شەشۋدە كەشىگىپ قالدى. كۆازيمەملەكەتتىك سەكتور قارجىسىنىڭ سەنىمسىز بانكتەرگە قالاي سالىنىپ كەتكەنىن بولەك انىقتاۋ كەرەك", - دەدى اقىشەۆ.

باس بانكير ونلاين كونفەرەنتسيا كەزىندە ەلدەگى بانكتەردى ءۇش توپقا ءبولدى:

  • ءبىرىنشىسى - داعدارىستىڭ اياقتالعانىنا قاراماستان كرەديت بەرۋ ساياساتىن ساقتىقپەن جۇرگىزگەن جانە تاۋەكەلدەردى ءتيىستى دەڭگەيدە باعالاعان بانكتەر.
  • ەكىنشىسى- ەرەجەلەردى ساقتاۋعا تىرىسقانمەن، قارجى پورتفەلدەرىنىڭ ناشار بولۋىنا بايلانىستى كاپيتالداندىرۋ تاپشىلىعىنا تاپ بولعان بانكتەر. ماسەلەنى بانك اكتسيونەرلەرى وزدەرى شەشە الماعان. ونىڭ ۇستىنە ول بانكتەردىڭ الەۋمەتتىك ماڭىزى بولعاندىقتان، مەملەكەت ولارعا كومەكتەسۋ تۋرالى شەشىم قابىلدادى.
  • ءۇشىنشىسى - ءوز اكتسيونەرلەرىنە كرەديت بەرىپ، بتا بانكتىكىنە ۇقساس ساياسات جۇرگىزگەن بانكتەر. بۇل توپقا  Bank RBK جاتادى. جاسىرىن جاتقان پروبلەمالارى سىرتقا شىعا باستادى.

ەندى ۇلتتىق بانك باقىلاۋ ساياساتىن قاتاڭداتىپ، ەشقانداي پروبلەماعا اسەر ەتە الماعان اۋديتورلاردىڭ جۇمىسىن باعالاۋعا كىرىسكەن.

ايتا كەتەيىك، بۇدان بۇرىن قر پرەزيدەنتى نۇرسۇلتان نازارباەۆ ۇكىمەتتىڭ كەڭەيتىلگەن وتىرىسىندا: " ءابىليازوۆتىڭ باستاماسىمەن "بتا" بانك بارلىعىنىڭ كوز الدىندا حالىق پەن مەملەكەتتىڭ اقشاسىن ۇرلاپ وتىر. ءبىز بۇكىل الەمگە مۇنىڭ مەملەكەت قارجىسى ەكەنىن دالەلدەدىك. ال قازىر نە بولدى؟ بانك قۇردىق، وعان ادامدار، ۇلتتىق كومپانيالار بارىپ جاتىر. ەندى سول بانك اكتسيونەرلەرى اقشانى ول جەردەن شىعارىپ جاتىر،  ال ۇلتتىق بانك وتىرىپ الىپ، ونى باقىلاۋدا. بۇل قالاي بولعانى؟", - دەپ ۇلتتىق بانك توراعاسىن سىناعان ەدى.

وسىلايشا پرەزيدەنت ۇلتتىق بانك جۇمىسىن تۇزەتۋ بويىنشا زاڭعا وزگەرىس ەنگىزۋدى جەدەلدەتۋ تۋرالى تاپسىرما بەرگەن.

“The Qazaq Times”