فوتو: UBR

بۇگىن ءماجىلىس دەپۋتاتتارى پلەنارلى جيىندا مەنشىك قۇقىعىن جانە اربيتراجدى قورعاۋدى كۇشەيتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى زاڭ جوباسىن ماقۇلدادى. زاڭدى تانىستىرعان ادىلەت ءمينيسترى مارات بەكەتاەۆ تۇزەتۋلەر مەنشىك قۇقىعىن قورعاۋعا باعىتتالعانىن اتاپ ءوتتى.

"كرەديت بەرۋ جانە قىزمەت كورسەتۋ كەزىندە الىناتىن كوميسسيانى جويۋ ۇسىنىلىپ وتىر. وسى ماقساتتا  كاسىپكەرلىك قىزمەتپەن بايلانىسى جوق بانك كرەديتىن بەرۋ تۋرالى كەلىسىم جاسالعان جاعدايدا بانكتەردىڭ كوميسسيا الۋىنا تىيىم سالۋ قاراستىرىلعان. سونداي-اق، بانك شوتىنا قارىزدى اۋدارۋعا جانە بانك شوتىن جۇرگىزگەنى ءۇشىن كوميسسيا الۋعا شەكتەۋ قويىلادى. اتالعان وپەراتسيالار كرەديت پروتسەسىنىڭ ءبىر بولىگى بولعاندىقتان جەكە تۇلعالاردان قوسىمشا كوميسسيا الىنباۋ كەرەك", - دەدى بەكەتاەۆ دەپۋتاتتار الدىندا سويلەگەن سوزىندە.

سونداي-اق، يپوتەكالىق كرەديتتى  تولەۋ مەرزىمى 6 ايدان كەشىكتىرىلگەن جاعدايدا، يپوتەكالىق كەلىسىم بويىنشا الىناتىن بانك پروتسەنتى توقتاتىلادى. بۇدان بولەك، كەپىل بەرۋشىنىڭ كەپىلدىككە قويعان مۇلكىن ساتۋ بويىنشا قوسىمشا جاعدايلار كاراستىرىلادى.

"بۇل بورىشكەردى ءوز مۇلكىن جوعارى باعادا ساتا الۋعا ىنتالاندىرادى", - دەيدى مينيستر.

الايدا، بۇل نورما قازىردىڭ وزىندە تۇزەتۋدەن وتكەن. دەپۋتاتتار بانكتەر قارىز الۋشىعا ءتيىمسىز بولاتىن قىسقا مەرزىم بەلگىلەۋى مۇمكىن ەكەنىن العا تارتىپ،  مۇلىكتى دەربەس ساتۋعا زاڭدى تۇردە ۋاقىت بەلگىلەۋدى ۇسىندى.

زاڭداعى تۇزەتىلۋى ءتيىس تاعى ءبىر بلوك - مەملەكەتتىك قاجەتتىككە بايلانىستى جەر ۋچاسكەلەرىن ماجبۇرلەپ الۋ سىندى داۋلى ماسەلەلەردى رەتتەۋ. ياعني بەكەتاۆتىڭ سوزىنشە، جەر ۋچاسكەسىن مەملەكەتتىك قاجەتتىككە الۋعا نارىقتىق باعا بويىنشا نەمەسە باسقا جەر تەلىمىن بەرۋ سىندى شارتتار ساقتالعان جاعدايدا عانا  رۇقسات ەتۋ ۇسىنىلىپ وتىر.

“The Qazaq Times”