اياز اتا جۇمىسسىز قالماق

بولاشاقتاعى بالالار ساناسىندا اياز اتا ۇمىت بولماق

قازاقستاندا، اسىرەسە قازاق حالقى اراسىندا اياز اتا تۋرالى ەكىجاردى كوزقاراس بار. بىرەۋلەر جات مادەنيەتتىڭ قاڭسىعى كورسە، بىرەۋ تاڭسىق كورەدى. ءار رەتكى جاڭا جىلدى قارسى الۋ كەشىندە بالالارىنا «اياز اتا» ارقىلى تارتۋلار ۇسىنىپ، اياز اتا بالالاردىڭ تىلەگىن ورىندايدى دەگەنگە بالالارىن دا، ءوزىن دە سەندىرىپ اۋرە بولىپ جاتاتىندار دا بار.

جاراتقاننىڭ ىقىلاس-شاراپاتىن اكەلەتىن قىدىر (قىزىر) اتا سىندى وبرازى كەيىپكەرى بار حالىقتىڭ ساناسىنا «اياز اتا» جارىلقاۋشى بولا قالعانى دا كوپ بولعان جوق. جاتتىڭ قاعىندى-سوعىندى ادەتتەرىمەن ءداستۇردىڭ بۇلعانىپ كەتۋىن قالامايتىن جاندار ءۇشىن، ءار رەتكى جاڭا جىلدى قارسى الۋ تۇنىندەگى قىزىل كيىمدى اقساقال كوڭىلىن ءبىر اۋىرتپاي قويماس ەدى.

الايدا، وسى اياز اتا ەرتەگىسى شىققان باتىس جۇرتىنىڭ وزىندە، قازىر، «بولاشاقتا بالالار اياز اتانى ۇمىتىپ كەتەدى» دەگەن ءسوز ايتىلىپ ءجۇر. سەبەبى، قازىر باتىس بالالارى مەرەكەلىك سىيلىعىنا قول جەتكىزۋ ءۇشىن، جاڭا جىل، رودجەستۆو سىندى مەرەكەلەرمەن اياز اتانى كۇتىپ وتىرمايدى. ولار، بار بولعانى، اتا-اناسىنىڭ كوزىنەن تاسا بولىسىمەن ۇيالى تەلەفوندارداعى ينتەرنەت-دۇكەننەن تاپسىرىس بەرە سالسا جەتكىلىكتى. بۇل ۇدەرىس جىلدار وتە كەلە بالالار ساناسىنان اياز اتانى ۇمىتتىرىپ، اق ساقالدى «جارىلقاۋشىنى» «جۇمىسسىز» قالدىرماق.

ونىڭ ۇستىنە، بۇگىنگى بالالاردىڭ پسيحولوگياسى مۇلدە باسقا، اياز اتا تۋرالى ەرتەگىگە سەنبەيدى. قازىرگى كەزدە ايات اتا كەلگەندە بالالاردىڭ ايتىپ جۇرگەن تاقپاقتارىندا دا «قىزىل شاپاندى قارتقا» دەگەن قۇرمەتتىڭ ازايعانىن بايقاۋعا بولادى.

اياز اتا قاندايسىڭ،

توقسانداعى شالدايسىڭ.

وترىك ساقال تاعىپ اپ،

نەگە ءبىزدى الدايسىڭ؟! – دەگەن سىندى تاقپاقتار بالالار ساناسىندا اياز اتا وبرازىنىڭ مەيلىنشە وشكىندەلىپ بارا جاتقانىن ايعاقتايدى.

زۇلھار اباي

"The Qazaq Times"