قازاقستان مەن الەم ءۇشىن مىنە، جاڭا ءبىر تاريحي جىلدىڭ پاراعى اشىلعالى تۇر. جاڭا 2020 جىل باستالىپ، 2019 جىل تاريح قويناۋىنا كەتپەك. "قاراكيىك" جىلى الەم ءۇشىن دە، ەلىمىز ءۇشىن دە ءار قيلى وقيعالار مەن ساياسي ساحناداعى وزگەرىستەرگە تولى بولعانى راس. ەلىمىز تاريحىندا ەكىنشى پرەزيدەنت بولىپ قاسىم-جومارت توقاەۆ سايلاندى. ۇكىمەتتە ءبىراز اۋىس-تۇيىستەر بولدى. ءار ايماقتا نارازىلىق شەرۋلەرى دە ءوتتى.
سايتىمىزدىڭ ەلىمىزدەگى ساناۋلى عانا تاۋەلسىز باق قاتارىندا قوسىلىپ، ءوز وقىرمانىنا بارىنشا ادال قىزمەت كورسەتۋگە تىرىسىپ قىزمەت اتقارعانىنا جاقىندا عانا ءۇش جىل تولدى. وسى ۋاقىت ىشىندە ازاماتتىق قوعامنىڭ قالىپتاسۋىنا، تاۋەلسىز جۋرناليستيكانىڭ نىعايۋىنا كۇش-جىگەرىمىزدى سالىپ كەلەمىز. اسىرەسە، قازاق ءتىلدى اقپارات كەڭىستىگىندە كەنجەلەپ قالعان حالىقارالىق تاقىرىپتاردى، وندا دا الەمگە، حالىقارالىق قاتىناستارعا، الەمدىك ساياسي، ەكونوميكالىق وزگەرىستەرگە قازاق كوزىمەن قاراۋعا تىرىستىق.
قازاقستان سەكىلدى كەشەگى پوستكەڭەستىك، بۇگىنگى بۇيىردەن قىسىپ تۇرعان بيۋروكراتيانىڭ سەيىلە قويماعان قوعامىندا ازاماتتىق قوعامعا قىزمەت كورسەتۋ مەن تاۋەلسىز جۋرناليستيكانى دامىتۋ ءۇشىن دە ەڭ اۋەلى سوعان قىزمەت ەتەتىندەرمەن بىرگە ۇلتتىق بۋرجۋازيا قالىپتاسۋى ەڭ ماڭىزدى. سونىڭ بۇگىنگى كورنىسى رەتىندە ءۇش جىلدان بەرى پورتالىمىزدى ەشكىمنىڭ قولىنا قاراتپاي، ەشكىمنىڭ تاپسىرماسىن ورىنداۋعا ءماجبۇر ەتپەي، قارجىلىق ءھام وزگە دە قاجەتتىلىكتەرگە قولداۋ كورسەتىپ كەلە جاتقان "ەر جانىبەك" حالىقارالىق قوعامدىق قورىنا، سول قوردىڭ پرەزيدەنتى بەلگىلى مەسسانات جەڭىس تۇركيا مىرزاعا مەرەكەگە وراي ايرىقشا العىس ايتامىز!
"ەسكى جىلدى ەسىركە، جاڭا جىلدا جارىلقا", جاڭا 2020 جىل جاقسىلىقتارعا، جەڭىستى دە جەمىستى كۇندەرگە تولى بولسىن! ءار شاڭىراققا قۇت-بەرەكە، ىنتىماق، قىزمەتتە مول تابىس تىلەيمىز! بارلىق سالادا، ساياسات ساحناسىندا قازاقستان ىرگەلى جەتىستىكتەرگە جەتە بەرگەي! جاڭا جىل جاقسى كۇندەر مەن جاڭا مۇمكىندىكتەر سىيلاسىن! سايىت وقىرماندارى مەن بارشا قازاقستاندىقتاردى، الەم حالقىن جاڭا جىلىمەن قۇتتىقتايمىز!
