دابىرالى وقيعالارىنا قيىنشىلىعى قاتار كەلگەن، زاڭدىلىعىنا ساي قۋانىشى دا، جۇبانىشى دا قاتار جۇرگەن 2021 جىلدى تاريحتىڭ ەنشىسىنە ۇزاتىپ سالعالى تۇرمىز. وتكەلى تۇرعان جىلدا الەمدە جانە ەلىمىزدە ەلەۋلى وقيعالار، ءتۇرلى وزگەرىستەر از بولعان جوق. ۋاقىتتىڭ تىنىمسىز دوڭگەلەگى ونىڭ ءبارىن "وتكەن"-گە اينالدىردى. ەندى مىنە، الدىمىزدا ءۇمىت ارتقان تاعى ءبىر جىل كەلە جاتىر!

قازاقتىڭ ەسكى سوزىندە "ەسكى جىل ەسىركە، جاڭا جىل جارىلقا" دەپ جاتادى. ول دا بولسا ەسكى جىلعا وكپە ارتپايتىن، جاڭا جىلعا سىن تاقپايتىن حالىق دۇنيەتانىمىنىڭ سوزگە اينالعان فورماسى بولسا كەرەك.  جالپى جاھاندىق بولمىستان الىپ قاراعاندا، سوڭعى بىرنەشە جىلدا الەمدىك ەكونوميكالىق دامۋ تۇرالاپ، پاندەميا قىرسىعى شىرماپ، كوپتەگەن ەلدەردە الەۋمەتتىك جانە ساياسي داعدارىستار بولعانى بەلگىلى. ءبىر قاراعاندا الەم ءتۇپسىز شىڭىراۋعا بەت العانداي كورىنگەنىمەن، شىن مانىسىندە ادامزات قوعامى مۇنداي سىن-سىناقتان بۇعان دەيىن دە تالاي رەت وتكەن، الدادا تالاي سىنعا ءدوپ كەلەرى ءسوزسسىز. سانالى تىرشىلىك بولاشاعىن قالاي ەلەستەتەدى، قازىرگى سىندارلى كەزەڭ سوعان بايلانىستىداي. ءار جاڭا جىلعا ىزگى ۇمىتپەن قارايتىنىمىز سەكىلدى، بولاشاققا دا جارقىن ۇمىتپەن كوز تاستايمىز.

وسىعان وراي، بارشا وتانداستارىمىزدى، الىس-جۋىق شەتەلدەگى قانداستارىمىزدى، بارشا ادامزات بالاسىن كەلە جاتقان جاڭا جىلىمەن شىن جۇرەكتەن قۇتتىقتايمىز! جاڭا جىل جاقسىلىعىمەن، يگىلىگىمەن، قايىرىمەن كەلسىن! الەمدە بولىپ جاتقان قيىنشىلىقتار، قايشىلىقتار، داعدارىستار سوعىسسىز، بەيبىت شەشىمىن تاۋىپ، بارشامىزدىڭ ورتاق الەمىمىز گۇلدەنە بەرسىن! جاراتۋشى سىن ساعاتتاردا ادامزات بالاسىنىڭ جۇرەگىندەگى ىزگىلىك، مەيىرىم، ماحاببات سەزىمدەرىن الا كورمەسىن! ەلىمىز امان، جۇرتىمىز تىنىش بولىپ، بارىس جىل باقىت اكەلسىن!

The Qazaq Times