اقش كونگرەسىنىڭ وكىلدەر پالاتاسى قۇنى 1,9 ترلن دوللار بولاتىن «امەريكانى قۇتقارۋ جوسپارىن» ماقۇلدادى. قۇجات ەلدە ءارتۇرلى رەاكتسيا تۋدىردى جانە رەسپۋبليكاشىلداردىڭ قارسىلىعىنا قاراماستان ماقۇلداندى. دەموكراتتار بايدەن ۇسىنعان جوسپار ىندەتتىڭ ەكونوميكاعا كەرى اسەرىن جويادى دەسە، رەسپۋبليكاشىلدار قوماقتى قاراجات قۇيۋ قالپىنا كەلە باستاعان ەكونوميكانى رەگرەسكە اكەلەدى دەيدى.

امەريكانىڭ ۇلتتىق ەكونوميكاعا كومەك جوسپارى الەمدە كوروناۆيرۋستىڭ ءورشۋى «پاندەميا» دەپ تانىلعاننان ءبىر جىل وتكەن سوڭ قابىلداپ وتىر. قۇجاتقا پرەزيدەنت دجو بايدەن بۇگىن قول قويدى. وسىلايشا اقش ۇكىمەتىنىڭ كەيىنگى جىلدا ەكونوميكانى ىنتالاندىرۋعا بولگەن قاراجاتى 6 تريلليون دوللارعا جۋىقتايدى. جوبانى سىناۋشىلار مەن رەسپۋبليكاشىلداردىڭ باسىم بولىگى بايدەن ۇسىنعان جوسپاردىڭ اۋقىمى تىم كەڭ جانە اقشانىڭ ءبىر بولىگى كوروناۆيرۋسقا قاتىسى جوق ماسەلەلەردى شەشۋگە جۇمسالۋى مۇمكىن دەپ قاۋىپتەنەدى.

قاراجات كوروناۆيرۋسقا قارسى ۆاكتسينا ەگۋگە، شاعىن بيزنەستى قولداۋعا، جۇمىسسىزدار مەن بالاسى بارلارعا تولەنەتىن جاردەماقىعا جۇمسالماق. امەريكا اقپارات قۇرالدارىنىڭ حابارلاۋىنشا، بۇل كومەك وتباسىلاردىڭ شامامەن 90%-ىن قامتيدى.  ياعني قاراجاتتىڭ جارتىسىنان كوبى – شامامەن 1 ترلن-ى جىلدىق كىرىسى 80 مىڭ دوللاردان اسپايتىن ازاماتتارعا كومەك رەتىندە بەرىلەدى. ەل تۇرعىندارىنىڭ 85%-ىنا 1,4 مىڭ دوللار قاراستىرىلعان.

قىركۇيەككە دەيىن قوسىمشا ازىق-تۇلىك كومەگى باعدارلاماسىنا بولىنەتىن قارجى 15%-قا وسەدى. كامەلەتكە تولماعانداردىڭ اتا-انالارى ءۇشىن تاعى ءبىر جىل سالىق شەگەرىمدەرى ۇلعايتىلدى: التى جاسقا دەيىنگى ءار بالاعا 3,6 مىڭ دوللاردان، التى جاستان 17 جاسقا دەيىن 3 مىڭ دوللاردان.

جەرگىلىكتى بيلىك ورگاندارىنا 350 ميلليارد دوللار، باستاۋىش جانە ورتا مەكتەپتەرگە 120 ميلليارد دوللار، كافەلەر مەن مەيرامحانالارعا شامامەن 30 ميلليارد دوللار سۋبسيديا بولىنەدى. سونداي-اق، قوسىمشا قاراجات تۇرعىن ءۇي مەن جۇمىس ورىندارىن جالعا بەرۋدى سۋبسيديالاۋعا جانە يپوتەكالىق تولەمدەرگە بولىنەدى.

كوروناۆيرۋسقا قارسى ۆاكتسينالاردى ءوندىرۋ جانە تاراتۋ شىعىندارى $20 ملرد-قا، تەستىلەۋگە بولىنەتىن قارجى $50 ملرد-قا ارتادى. كاسىپورىندار ءۇشىن قىزمەتكەرلەرگە سالىق تولەۋ شارتتارى جەڭىلدەتىلەدى.

اقش ەلدىڭ مەملەكەتتىك قارىزى 28 ترلن دوللارعا جەتسە دە، قارىز نارىعىندا جوسپاردى جۇزەگە اسىرۋ ءۇشىن قاراجات الۋدى جوسپارلاپ وتىر. رەسپۋبليكاشىلدار بايدەننىڭ بۇل جوسپارى ينفلياتسيانىڭ وسۋىنە جانە اقشانىڭ قۇنسىزدانۋىنا اكەلەدى دەپ سانايدى. ال بۇل ءبىرىنشى كەزەكتە ورتا تاپقا قاۋىپ ءتوندىرۋى مۇمكىن.

بۇعان دەيىن ەكس-پرەزيدەنت دونالد ترامپ قۇنى $0,8-دەن 1,8 ترلن-عا دەيىن جەتەتىن «Make America great again!» ەكونوميكانى قالپىنا كەلتىرۋ جوسپارىن ۇسىندعان بولاتىن. ول پاندەمياعا بايلانىستى شەكتەۋلەردى بىرتىندەپ الىپ تاستاۋ يدەياسىنا نەگىزدەلگەن.

ترامپ ەكونوميكانى قالپىنا كەلتىرۋ بويىنشا $1,4 ترلن جانە $0,9 ترلن-دىق ەكى زاڭعا قول قويدى. ءۇش ايلىق پارتياارالىق تالقىلاۋلاردان كەيىن قابىلدانعان ەكىنشى قۇجات ەرەجەلەرىنىڭ قولدانىلۋى بيىل 14 ناۋرىزدا اياقتالادى. ترامپ ۇسىنعان جوسپار ناتيجەسىندە جىلدىق كىرىسى 75 مىڭ دوللاردان تومەن ءار ازاماتقا 600 دوللاردان بەرىلىپ، مەملەكەت قوردان 166 ميلليارد دوللار جۇمسادى. سونىمەن قاتار، كومپانيالار نەسيە مەن سالىق جەڭىلدىكتەرىن تولەۋگە سۋبسيديا الدى.

"The Qazaq Times"