تامىز كەڭەسى: ۇكىمەت تاپسىرماعا كومىلگەن كۇن

بۇل كەڭەس بۇرىنعىدان وزگەرەك... وزگەشەلىكتىڭ باستى پارامەترى – سۋ جاڭا پرەزيدەنت قاسىم-جومارت توقاەۆ پەن ونىڭ نوكەرلەرى ءارى 16-شى ءبىلىم ءمينيسترى اسحات ايماعامبەتوۆتىڭ قاتىسۋى. 9 ماۋسىم سايلاۋدا ەل پرەزيدەنتى بوپ سايلانعان توقاەۆ سول ايدىڭ 13-ءى كۇنى باس مۇعالىم رەتىندە ايماعامبەتوۆتى تاعايىنداۋ جارلىعىن شىعارعان بولاتىن. بۇل جولعى القالى جيىنعا ەلىمىزدىڭ ءار ايماعىنان كەلگەن 2000-نان اسا مۇعالىم قاتىستى.

بۇگىن ۇكىمەت اپاسى تويدان كەلگەن بالاداي «تاپسىرما سارقىتقا» قارق بولدى.

جىلداعى ءداستۇر بويىنشا جاڭا وقۋ جىلى قارساڭىنداعى تامىز كەڭەسى تاۋەلسىزدىك سارايىندا ءوتتى.

 

انا ءتىلى تۋرالى ءافوريزمى بار توقاەۆ بايانداماسىنىڭ تەك 29,4%-ى عانا مەملەكەتتىك تىلدە

«ءار حالىقتىڭ انا ءتىلى – ءبىلىمنىڭ كىلتى» – دەيدى اكادەميك احمەت جۇبانوۆ. بۇل ءسوز ءبىز ءۇشىن نەگىزگى ۇستانىمعا اينالۋى ءتيىس» دەپ شەگەلەي ايتقان قازاقستان پرەزيدەنتى بايانداماسىنىڭ 29,4%-ى عانا مەملەكەتتىك تىلدە جازىلعان. تاۋەلسىزدىك سارايىندا وقىلعان كولەمدى مالىمدەمەدەگى 2414 ءسوزدىڭ (بايانداما اتاۋىن قوسپاعانداعى)  تەك 711-ءى عانا قازاق تىلىندە. 3/1-ىنە دە جەتپەيتىن بولىگى مەملەكەتتىك تىلدە جاريالاعان بايانداماسىندا توقاەۆ اعىلشىن ءتىلىن وقىتۋدى «2-3-ءشى سىنىپتان نەمەسە اتا-انالاردىڭ قالاۋىنا قاراي 5-ءشى سىنىپتان باستاۋ ورىندى ءارى ءتيىمدى» ەكەنىن ايتتى. پرەزيدەنت حالىقتىڭ انا ءتىلى – ءبىلىمنىڭ كىلتى ەكەندىگى تۋرالى دايەكسوزدى كەلتىرە وتىرىپ، جوعارى سىنىپتارداعى جاراتىلىستانۋ-تەحنيكالىق پاندەردى اعىلشىن تىلىندە وتكىزۋدى مەكتەپتەردىڭ دايىندىعىنا قاراي جۇرگىزۋ قاجەت ەكەنىن مالىمدەدى. باياندامانىڭ تولىق نۇسقاسىن اقوردا باستاپ، بىرقاتار باق جاريالاپ، الەۋمەتتىك جەلى قولدانۋشىلارى مەن پرەزيدەنتتىڭ ءباسپاسوز حاتشىسى بەرىك ءۋالي بولىسكەن. كوپقىرلى باياندامادا ءار ءتۇرلى كۇردەلى ماسەلەلەر كوتەرىلگەن. كەڭەس بارىسىندا ءبىلىم ءمينيسترى دە وتكىر پىكىرلەرىن جاريالادى.

ەل باسشىسى ءوز سوزىندە ابايدان، ءال-فارابي، ا.بايتۇرسىنوۆ، ماعجاننىڭ «پەداگوگيكا» ەڭبەگىنەن، ا.جۇبانوۆتان، ۆ.سۋحوملينسكيلەردەن ءبىر-بىردەن افوريزم كەلتىرسە، حالىق فولكلورىنان 2 مارتە ناقىل ءسوز قولدانعان. سونداي-اق ەكس-پرەزيدەنت ن.نازارباەۆتىڭ ەسىمىن ءۇش جەردە اتاپ، ءبىر رەت ءسوزىن مىسالعا كەلتىرگەن.

سوندا ۇستازدار ءوز قاراجاتىمەن كەلىپ، قاتىسقانى ما؟

 ءبىر قىزىعى، پرەزيدەنتپەن وتەتىن القالى كەڭەسكە ساراپشىلىق ورەدە ايتارى بار، كەيبىر بەلسەندى ۇستازدار شاراعا تاقاعاندا، ەشبىر ءىس-ساپارلىق شىعىنداردى قولداۋسىز كەشتەتىپ شاقىرىلعان. مىسالى، ۇزاق جىلدار بويى ءبىلىم بەرۋ سالاسىنا قاتىستى وتكىر ويلارى مەن كاسىبي ۇسىنىستارىن اشىق جاريالاپ جۇرگەن ۇستاز، قر ءبىلىم سالاسىنىڭ قۇرمەتتى قىزمەتكەرى، جۋرناليستەر وداعىنىڭ مۇشەسى، تاريحشى ءومىر شىنىبەكۇلىنا وتكەن اپتا شاقىرۋ كەلگەنىمەن، جول مەن جاتىن جاي تۋرالى ەشبىر اقپارات كورسەتىلمەگەن. دەمەك مينيسترلىكتىڭ ايتۋلى شاراسىنا قاتىسقان 2000-نان استام پەداگوگ ءوز قالتاسىنان قاراجات جۇمساپ بارعانى ما؟ قالىپتاسقان جاعدايعا بايلانىستى زاڭدى ساۋال تۋادى.

2023 جىلعا قاراي بۇگىنگىدەن ەكى ەسە جالاقى...

مەملەكەت باسشىسى الداعى 4 جىل كولەمىندە پەداگوگتاردىڭ جالاقىسى 2 ەسەگە وسەتىنىن مالىمدەدى. مۇعالىمدەردىڭ ەڭبەكاقىسى بازالىق لاۋازىمدىق جالاقى ارقىلى ەسەپتەلۋىنە بايلانىستى ەلدەگى 500 مىڭ ۇستاز ايلىعىنىڭ ەلەۋلى مولشەردە وسكەنىن سەزىنە الماي وتىرعاندىعى ايتىلدى. جانە ەڭ باستىسى پرەزيدەنت ۇستازداردىڭ تابىسىنا قاتىستى قازىرگى تولەمگە كوڭىلى تولمايتىنىن جەتكىزدى. «مۇعالىمدەردىڭ ەڭبەكاقىسى ەڭ تومەنگى ايلىقتاردىڭ ءبىرى بولىپ تۇر. ەكونوميكاداعى ورتاشا ەڭبەكاقىنىڭ 65 پايىزىن عانا قۇرايدى. ارينە، مۇنىمەن كەلىسپەيمىز. سوندىقتان ۇكىمەتكە ءبىلىم جۇيەسىنە بىلىكتى ماماندار تارتۋ ماقساتىندا جانە پەداگوگتاردىڭ مارتەبەسىن كوتەرۋ ءۇشىن مۇعالىمدەردىڭ ەڭبەكاقىسىن 4 جىلدىڭ ىشىندە 2 ەسەگە ارتتىرۋدى تاپسىرامىن»، – دەدى سايلانعانىنا 69 كۇن بولعان پرەزيدەنت.

دەسەك تە ەكونوميست ساراپشىلاردىڭ پايىمداۋىنشا، اتالعان «ءسۇيىنشى» حاباردىڭ 2023 جىلعا قاراي بۇگىنگى  قۇنىنان پارقى بولمايدى. الەۋمەتتىك جەلى قولدانۋشى، بەلسەندى ساياساتتانۋشى باۋىرجان سەرىكباەۆ فەيسبۋك پاراقشاسىندا «الداعى 4 جىلدا ينفلياتسيا قانشاعا وسەدى، باعا قانشاعا قىمباتتايدى؟» دەگەن ساۋال تاستاي وتىرىپ، «وسىنىڭ ءبارىن ەسكەرسەك ەكى ەسەگە وسكەن ايلىق 2023 جىلى قۇنى جاعىنان قازىرگى ايلىقپەن تەڭ بولۋى مۇمكىن» دەگەن بولجامىمەن الاڭداۋشىلىعىن ءبىلدىردى. راسىندا دا، قاڭتار-شىلدە سايىن تيىن تامىپ «وسكەندەي» بولىپ، وركەن جايا المايتىن قازاقستاندىقتاردىڭ جالاقىسى شيەلەنىستى ماسەلە. وتكەن ونجىلدىق پراكتيكا كورسەتكەندەي جىل جاڭارىپ «مىنانشا پايىز قوسىلادى» دەي بەرگەندە بار قىزمەت-تاۋاردىڭ باعاسى ەش نەگىزسىز شارىقتاپ قويا بەرەدى. مينيستر مەن مۇعالىمنىڭ جالاقىسىن قوسا ەسەپتەگەندە ورتاشا جالاقىسى 186,5 مىڭ تەڭگەنى قۇرايتىن دەرەك قانشالىقتى رەالعا جاقىن، اركىمنىڭ ءوز ءىشى بىلەدى. بىزدىڭشە، كوپشىلىك تە ازاماتتىڭ «مەنىڭ جەكە پىكىرىم 2020 جىلدان باستاپ ەكى ەسە وسەدى دەسە ءسۇيىنشى سۇراۋعا بولۋشى ەدى» دەگەن ويىمەن بىرگە.

ەل باسشىسى ءبۇي دەدى..

***

قازاقستان پرەزيدەنتى قاسىم-جومارت توقاەۆ مۇعالىمدەردى مىندەتىنەن تىس جۇمىسقا تارتاتىن اكىمدەر مەن مەكەمە باسشىلىقتارىن سىنادى. سونىمەن قوسا «پەداگوگ جۇكتەمەسىن قىسقارتاتىن، كاسىبىنە ساي ەمەس قىزمەتتەرگە تارتۋعا تىيىم سالاتىن شەكتەۋ قويۋ، شەكتەن تىس ەسەپتىلىك پەن نەگىزسىز تەكسەرۋلەردى شەكتەۋ دەربەس قارالادى»، –  دەپ ۋادە بەردى.

«جەرگىلىكتى اكىمدەر قىزمەتىن اسىرا پايدالانىپ، مۇعالىمدەردى ءبىلىم جۇيەسىنە قاتىسى جوق اكىمشىلىك ىستەرگە، ءبىر رەتتىك شارالارعا تارتادى. بۇل ارەكەت توقتار ەمەس»، –  دەگەن توقاەۆ جيىندا مۇعالىمدەرگە ارتىلاتىن جۇك اۋىرلاعانىن، باسشىلىق تاراپىنان قىسىمعا ۇشىرايتىنىن ايتتى. ايتتى دا ۇكىمەتتى وسى ماسەلەنى دەرەۋ شەشۋگە مىندەتتەدى.

***

قازىر ەلىمىزدە جالپى ورتا ءبىلىم بەرەتىن ناقتى  7 014  مەكتەپ بار. توقاەۆ ونىڭ 128-ءى ءۇشاۋىسىمدى ءارى  31-ءى اپاتتىق جاعدايدا ەكەنىن مالىمدەدى.

«2019-2020 جىلدارى ءۇشاۋىسىمدى مەكتەپتەرگە تاپشىلىقتى جويۋ ماقساتىندا 35, ال اپاتتىق جاعدايداعى وقۋ ورىندارىنىڭ ورنىنا 7 مەكتەپ رەسپۋبليكالىق بيۋدجەت ەسەبىنەن قۇرىلىسى ءجۇرىپ جاتىر»، – دەدى پرەزيدەنت.

دەموگرافيالىق ۇردىستەر مەن تۇرعىنداردىڭ ورنالاسۋىنا بايلانىستى مەكتەپ قۇرىلىستارى سالىنا بەرەتىنىن ايتقان ەل باسشىسىنىڭ مالىمەتىنە قاراعاندا، تاۋەلسىزدىك جىلدارى ىشىندە ەل بويىنشا 1198 مەكتەپ سالىنعان.

***

مەملەكەت باسشىسى «مەملەكەت ساپالى ءبىلىم بەرۋدىڭ قولجەتىمدىلىگى بويىنشا اتا-انالارعا كومەكتەسۋى كەرەك. ۇكىمەت ءبىلىم بەرۋ سالاسىنا ءوز قىزمەتىنىڭ باسىم باعىتى رەتىندە قاراۋى كەرەك. دامىعان ەلدەردىڭ بارىندە وسىلاي. بىرنەشە مەملەكەتتە ءبىلىم ءمينيسترى مينيسترلەر رەيتينگىندە قارجى مينيسترىنەن كەيىن الدىڭعى ۇشتىكتە تۇراتىنىن بىلەمىن. ءبىز دە وعان جەتەمىز دەپ ويلايمىن»، –  دەپ، رەسۋرستارىن ۇنەمدەۋگە ءماجبۇر وتباسىلىق ينستيتۋتقا ءبىلىم الۋدى جەڭىلدەتۋگە بولىسۋ – ۇكىمەت قىزمەتىنىڭ باسىم باعدارى بولۋى كەرەكتىگىن قاداپ ايتتى.

سونداي-اق پرەزيدەنت قىر استىندا تۇرعان جاساندى ينتەللەكت ءداۋىرىن باستان كەشىرۋگە، زياتكەرلىك جاڭالىقتار تۋدىرۋعا قاۋقارلى ءارى دايىن بولۋ قاجەتتىلىگى جايلى وي قوزعادى.

***

«ۇلتتىق عىلىمي كەڭەستەردىڭ جۇمىسىن جەتىلدىرۋ جانە تولىقتاي العاندا عىلىمدى قارجىلاندىرۋ اشىقتىعىن قامتاماسىز ەتۋ قاجەت».  وسىلاي دەگەن ەل باسشىسى وسى ۋاقىتقا دەيىن ءمولدىر تۇگىلى بۇلىڭعىر عىلىمي وتىنىمدەردى قابىلداۋ مەحانيزمىنىڭ جابىقتىعى مەن «عىلىمي ورتادا قارجىلاندىرۋ جۇيەسىنە سەنىمسىزدىك، سونىمەن قاتار ەگدە جانە جاس عالىمدار اراسىندا بەلگىلى ءبىر جىكتەلۋ بايقالاتىنىن» اشىپ ايتتى. وسى سەبەپتەردى كەشەندى تۇردە زەردەلەي وتىرىپ، ۇكىمەتكە  عىلىمدى ينستيتۋتتىق دامىتۋ تۇجىرىمداسىن ازىرلەۋگە تاپسىرما بەردى.

***

احاڭنىڭ (ا.بايتۇرسىنۇلى – اۆت.) «ءبىز اۋەلى ەلدى تۇزەتۋدى بالا وقىتۋ ءىسىن تۇزەتۋدەن باستاۋىمىز كەرەك» دەگەن ناقىلىن تىلگە تيەك ەتكەن توقاەۆ «بارلىق ماقسات-مىندەتتەر ۇكىمەت ازىرلەپ جاتقان «ءبىلىم مەن عىلىمدى دامىتۋدىڭ مەملەكەتتىك باعدارلاماسىندا» تولىق قامتىلۋى ءتيىس»، – دەدى. جانە اتالمىش باعدارلاما اشىق قوعام تالقىسىنا ءتۇسىپ، ەلمەن كەڭەسىپ، سۇزگىدەن وتەتىنى بەلگىلى بولدى.

***

مەملەكەت باسشىسى جوعارى ءبىلىمنىڭ قولجەتىمدىلىگىن قامتاماسىز ەتەمىز دەپ ءجۇرىپ ونىڭ دەۆالۆاتسيالانۋىنا جول بەرىپ الماۋ قاجەتتىگىن ەسكەرتتى. «وقۋ پروتسەسىنىڭ ساپاسىن كوتەرمەي ءبىلىم گرانتتارىن كەزەڭ-كەزەڭىمەن ۇلعايتۋ يگىلىكتەن بىرتىندەپ ىسكە قوسىلاتىن «ميناعا» اينالىپ كەتۋى مۇمكىن»، – دەپ الاڭداۋشىلىق بىلدىرگەن پرەزيدەنت ماماندىق تاڭداۋدا ەڭبەك نارىعىنا تالداۋ جاساۋدى ۇسىنادى.

«ۇكىمەت مەملەكەتتىك گرانتتاردىڭ باعاسى مەن ولاردىڭ قازىرگى شىنايى ومىرگە سايكەستىگى ماسەلەسىن تىڭعىلىقتى زەردەلەۋى قاجەت. بجعم جوعارى وقۋ ورىندارىنا قوياتىن تالاپتارى مەن نورماتيۆتەرىن قايتا قاراۋى كەرەك. ماسەلەن، جوو-نىڭ وقىتۋشىلارىنا ستۋدەنتتەر سانىنىڭ اراقاتىناسىنا قاتىستى تالاپ سالدارىنان شتاتتار جاساندى ۇلعايتىلۋعا ءماجبۇر»، –  دەدى ق.توقاەۆ.

***

پرەزيدەنت پارمەنىمەن ۇكىمەتكە مەكتەپتە 12 جىلدىق وقۋدىڭ «ويلاستىرىلعان ءارى ورنىقتى» مودەلىن دايىنداۋ تاپسىرىلدى. «2025 جىلعا دەيىنگى ءبىلىم مەن عىلىمدى دامىتۋدىڭ جاڭا مەملەكەتتىك باعدارلاماسىن ىسكە اسىرۋ اياسىندا ويلاستىرىلعان ءارى ورنىقتى» اۋىسىم دەگەن ءسوزدى ەرەكشە اتاپ وتىرمىن»، – دەپ ەكپىندەتىپ سويلەدى. سونداي-اق، 60-قا جۋىق الەم ەلدەرىندە بالانىڭ 6 جاستان باستاپ مەكتەپكە باراتىنىن قالىپتى جايت ەكەنىن ايتقان توقاەۆ بۇل «بالانى ەرتەرەك ينتەللەكتۋالدىق دامۋعا، الەۋمەتكە بەيىمدەلۋىنە ىقپال ەتەدى» دەيدى.

ءبىلىم ءمينيسترى ءسوي دەدى...

***

رەسپۋبليكانىڭ باس مۇعالىمى اسحات ايماعامبەتوۆ 2021 جىلى «الىپپە» احمەت بايتۇرسىنوۆتىڭ ادىستەمەسى بويىنشا قايتا ەنگىزىلەتىنىن مالىمدەدى.

ايماعامبەتوۆ مينيسترلىكتىڭ ءارتۇرلى ولقىلىقتارعا تولى ۇسىنىستاردان باس تارتقانىن ايتىپ، «الىپپە – تاجىريبە جاسايتىن الاڭ ەمەس. بىزدە باياعىدان – ناقتى قازاق تىلىنە بەيىمدەلگەن ادىستەمە بار. ءبىز الىپپەنى قايتارۋ كەرەك دەپ ەسەپتەيمىز.ول – احمەت بايتۇرسىنوۆتىڭ ادىستەمەسى. سوندىقتان، ەشتەڭەنى ويدان شىعارماي، وسى ادىستەمەنىڭ نەگىزىندە جۇمىس جۇرگىزەتىن بولامىز»، – دەدى.

***

ادەتتەگىدەي ۇبت تۇسىندا نەبىر ايلا-شارعىلار قىزىپ، قىزىل ماتريتسانى قۋلىعىن اسىرعاندار تولتىرىپ شىعاتىن، ەل «ۇلى بىركۇندىك توڭكەرىس» دەپ اتاپ كەتكەن بايقاۋ تۋرالى. وسى ولقىلىقتاردىڭ جولىن كەسۋ ماقساتىندا ەندى ۇبت ترانسفورماتسيالانىپ، ەلەكتروندى تۇرگە ساتىلاي اۋىساتىن بولادى. بۇل تۋرالى ءبىلىم ءمينيسترى «ءبىز ۇلتتىق بىرىڭعاي تەست تاپسىرۋدى بىرتىندەپ ەلەكتروندى جۇيەگە كوشىرۋدى جوسپارلاپ وتىرمىز. مۇنداي ويىمىز بار. بىزگە ۇبت گرانتتاردى ءبولۋدىڭ اشىقتىعى مەن ادىلدىگىنە كەپىل بەرۋى قاجەت»، – دەدى.

***

قازاقستان عىلىمىنا بايلانىستى عالىمداردىڭ ەڭبەكتەرى ەندى شەتەلدىك بازا كولەمىندە انتيپلاگياتتىق سۇزگىدەن وتەتىن بولادى. «بۇگىنگى تاڭدا ءبىز ديسسەرتاتسيا قورعاعان كەزدە عىلىمي ماتەريال تەك قازاقستاندىق بازا بويىنشا انتيپلاگياتتان (ياعني، قازاقستاندىق عالىمدار قورعاعان جۇمىستار بويىنشا) وتەدى. سوندىقتان، عىلىمي جۇمىستار تەك قازاقستاندىق بازا بويىنشا عانا ەمەس، شەتەلدىك مالىمەتتەر بازاسى بويىنشا تەكسەرىلەتىندەي ءتيىستى ەرەجەلەرگە قوسىمشا وزگەرىستەر ەنگىزىلەدى»، – دەگەن اسحات ايماعامبەتوۆ، بۇل شارالاردىڭ وتاندىق  عىلىم ساپاسىن ارتتىرۋعا سەپتىگىن تيگىزەدى دەپ سەنەتىنىن مالىمدەدى.

***

قازىرگى تاڭدا وقۋشىعا  جوو-لار مەن كوللەدجدەر وقۋشىلارعا تەك 11 سىنىپتا تاڭداۋ ءپانىن ايقىنداپ بولعان سوڭ، قىسقا نەمەسە كوكتەمگە تاياۋ كەلىپ، ءوز باعدارلامالارىن ۇسىنادى، اشىق ەسىك كۇندەرىن وتكىزەدى. وقۋ ورنىن جارنامالايدى. وكىنىشكە وراي، بۇل كەز – وتە كەش.

وسىعان قاتىستى ايماعامبەتوۆتىڭ پىكىرىنشە، وقۋشى قاي ماماندىقتى تاڭدايتىنىن 7-ءشى سىنىپتىڭ وزىندە ايقىنداي باستاۋى كەرەك.

مينيستر ماماندىقتى ايقىنداۋ جۇمىسى جۇيەگە ءتۇسۋ قاجەتتىگىن ايتىپ، «جاڭا وقۋ جىلىندا 200 مىڭعا جۋىق بالا ەرتە پروفيليزاتسياعا وتەدى. ماماندىقتى ايقىنداۋ جەتىنشى سىنىپتان باستالۋى كەرەك. ياعني، الدىن الا پروفدياگنوستيكا جۇرگىزىلىپ، قاجەتتى شارالار قابىلدانۋى ءتيىس» ەكەنىن جاريالادى. ونىڭ ايتۋىنشا بۇل تۋرالى بجعم-ءنىڭ وزىندىك ناقتى جوسپارى بار.

***

«اقىلى بايقاۋلار كوبەيىپ كەتتى. اتا-انالار كەيدە امالسىز بالالارىن قاتىستىرۋعا ءماجبۇر بولادى. كەيدە ول بايقاۋلاردىڭ پايداسى دا جوق. كەيبىر ينتەرنەت وليمپيادالاردا قاعازعا باسىپ، اقشا تولەپ، تاپسىرما الىپ ۇيىنە قايتقان بالا بۇكىل وتباسى بولىپ، تاپسىرمانى شەشىپ، اقىرى قانداي دا ءبىر ورىن الادى. بۇل قانشالىقتى پايدالى، قانشالىقتى دۇرىس؟ سوندىقتان، وليمپيادالار بويىنشا مينيسترلىكتىڭ ۇستانىمى بار – مەكتەپتەردە قازىرگىدەي كوپ ءارى فورماتتا اقىلى وليمپيادالار بولماۋى كەرەك. وليمپيادالار مەن بايقاۋلار بىزدە بولادى. ولار كەرەك! بىراق، بۇل رەتتە مينيسترلىك تاراپىنان ناقتى رەگلامەنت بولادى»، – دەگەن مينيستر ءسوزىن قولداماسقا شارا جوق. جارنا تولەگەندەردىڭ وزىنە جاپپاي تاراتىلاتىن ءبىر جاپىراق ماقتاۋ قاعازى ءۇشىن پسەۆدووليمپيادالىق ونلاين بايقاۋلارعا ساباقتان قيىلىپ تۇرىپ سۇرانۋ – جاقسى ءىس ەمەس ەكەنى ءسوزسىز.

ۆيتسە-مينيستر «قابىلدايمىز» دەدى...

قر پرەمەر-ءمينيسترىنىڭ ورىنباسارى گۇلشارا ابدىقالىقوۆا مينيسترلىككە 2020 جىلدىڭ 1 قاڭتارىنان بۇرىن قابىلدانۋى ءتيىس «مۇعالىم مارتەبەسى تۋرالى» زاڭ جوباسىن 1 قىركۇيەككە دەيىن پارلامەنتكە ەنگىزۋدى تاپسىردى. ونىڭ ايتۋىنشا «مۇعالىم مارتەبەسى تۋرالى» زاڭ جوباسى ەلىمىزدىڭ بارلىق ايماعىندا تالقىلاۋدان وتكەن.

سونىمەن قاتار، ۆيتسە-پرەمەر ءبىلىمنىڭ مەن عىلىمدى قاتار دامىتۋ ماقساتىندا پرەزيدەنت اتاعان مەملەكەتتىك باعدارلامانىڭ تولىق جوسپارى جىل سوڭىنا قاراي جاسالىپ، قابىلدانۋى ءتيىس ەكەنىن ايتتى. جوعارىدا توقاەۆ 2025 جىلعا دەيىنگى «ءبىلىم مەن عىلىمدى دامىتۋدىڭ مەملەكەتتىك باعدارلاماسىن» دايىنداۋدى تاپسىرعانىن ەسكە سالامىز.

توقاەۆ قولىنان مەدال تاققاندار

«ءبىزدىڭ ارامىزدا ەلىمىزدىڭ ءبىلىم بەرۋ سالاسىن دامىتۋعا ايرىقشا ۇلەس قوسقان مەكتەپ مۇعالىمدەرى وتىر. ءوز ءىسىن ادال اتقارىپ جۇرگەن ازاماتتاردى مەملەكەتتىك ناگرادالارمەن ماراپاتتاعىم كەلەدى»، – دەگەن  پرەزيدەنت ماراپتتاۋ راسىمىندە بىرشوعىر ۇستازدار قاۋىمىنا ءوز قولىمەن مەملەكەتتىك سىيلىقتار تابىستادى. ولار:

«قۇرمەت» وردەنى – پاۆلودار قالاسىنداعى دارىندى بالالارعا ارنالعان №8 ليتسەي-مەكتەبى فيزيكا ءپانىنىڭ مۇعالىمى اناتولي بەليدا;

«ەرەن ەڭبەگى ءۇشىن» مەدالى – الماتى وبلىسى، ىلە اۋدانى، م.ماقاتاەۆ اتىنداعى №13 جالپى ورتا ءبىلىم بەرۋ مەكتەبى تاريح ءپانىنىڭ مۇعالىمى گۇلنار كازەرباەۆا;

تۇركىستان وبلىسى، كەنتاۋ قالاسى احماد يۋگناكي اتىنداعى جالپى ورتا ءبىلىم بەرۋ مەكتەبى ماتەماتيكا ءپانى مۇعالىمى دانەگۇل قۋاتبەك;

«شاپاعات» مەدالى – ورال قالاسىنىڭ ءا.مولداعۇلوۆا اتىنداعى №38 مەكتەپ-ليتسەيى قازاق ءتىلى مەن ادەبيەتى ءپانىنىڭ مۇعالىمى گۇلزيحان تاسقارينا;

قاراعاندى قالاسىنىڭ ن.نۇرماقوۆ اتىنداعى دارىندى بالالارعا ارنالعان وبلىستىق مامانداندىرىلعان مەكتەپ-ينتەرناتى ماتەماتيكا ءپانىنىڭ مۇعالىمى ەكاتەرينا نەپرۋك ماراپاتتالدى.

"The Qazaq Times"