الماتى قالاسىنىڭ ءبىلىم سالاسىنداعى ساپانى قامتاماسىز ەتۋ دەپارتامەنتى مەن ءبىلىم جانە عىلىم مينيسترلىگىنىڭ ءباسپاسوز قىزمەتى QT رەداكتسياسىنىڭ سۇراۋىنا وراي 159 مەكتەپ-گيمنازيا باسشىلىعى ارنايى جيىن قارساڭىندا مۇعالىمدەردىڭ مىندەتتى قىزمەتىنە جاتپايتىن جۇمىسقا جەگىلگەنىن جانە اكىمشىلىك ءىس قوزعالعانىن حابارلادى.
«اكىمشىلىك قۇقىق بۇزۋشىلىق تۋرالى» كودەكستىڭ 802-بابى 1-تارماعى 3-تارماقشاسىنا ساي، بۇقارالىق اقپارات قۇرالدارىنداعى حابارلامالارى نەگىزىندە، الماتى قالاسىنىڭ ءبىلىم باسقارماسىنىڭ «ى.التىنسارين اتىنداعى № 159 گيمنازيا» كمم باسشىسى بيدايبەكوۆا ەلميرا يسەباەۆناعا قاتىستى مەكتەپ مۇعالىمدەرىن مەكتەپتە بولاتىن كونفەرەنتسياعا دايىندىق بويىنشا جوندەۋ جۇمىستارعا نەگىزسىز تارتقاندىعى بويىنشا اكىمشىلىك ءىس قاراستىرىلدى»، – دەلىنگەن رەسمي جاۋاپ حاتتا.
دەپارتامەنت تۇسىندىرمەسىنە قاراعاندا، مەكتەپ ديرەكتورى ەلميرا بيدايبەكوۆا «پەداگوگ مارتەبەسى تۋرالى» زاڭىنىڭ 6-بابى 2-تارماعىنىڭ 1-تارماقشاسىندا بەلگىلەنگەندەي پەداگوگتى كاسىبي مىندەتىنەن تىس جۇمىس تۇرلەرىنە تارتۋعا جول بەرىلمەيدى دەگەن تالاپتى ساقتاماعان.
«حابارلامادا ايتىلعان ۋاجدەر ءوز دالەلدەرىن تاۋىپ، سونىڭ ناتيجەسىندە، الماتى قالاسىنىڭ ءبىلىم باسقارماسىنىڭ «ى.التىنسارين اتىنداعى № 159 گيمنازيا» كمم باسشىسى قر اقبتك-ءنىڭ 409-بابىنىڭ 7-3-تارماقتارىنىڭ 1-تارماعى بويىنشا، اكىمشىلىك ءىس قوزعالىپ، اكىمشىلىك جاۋاپكەرشىلىككە تارتىلدى»، – دەپ سەندىردى دەپارتامەنت جەتەكشىسى گۇلنار ەرمەكباەۆا.
وسىعان دەيىن رەداكتسيا وزىنە قايرىلعان پەداگوگتەردىڭ ۋاجىمەن اپتا باسىندا الماتى قالاسىنداعى 159-مەكتەپتە جيىرما شاقتى مۇعالىمنىڭ «دەمالىستا ىرقىنان تىس جۇمىسقا جەگىلگەنى» تۋرالى جازعان ەدى. ءبىرىنشى توقساننان كەيىنگى دەمالىستا ەر مۇعالىمدەر قابىرعا اقتاپ-سىرلاسا، ايەل پەداگوگتەر تازالىق جۇمىستارىنا تارتىلعان. ءتىلشى 30 جىل بۇرىن قۇرىلعان ءبىلىم وشاعىنىڭ ەكىنشى ديرەكتورىنان 5 قاراشا وتەدى دەلىنگەن جيىن-كونفەرەنتسيا تۋرالى بىلمەك بولىپ، حابارلاسۋعا تىرىستى. بىراق اشىق دەرەككوزدە كورسەتىلگەن بەس-التى قىزمەتتىك ءنومىردىڭ بىردە-ءبىرى تۇتقانى كوتەرمەدى، بايلانىسۋ مۇمكىن بولمادى.
تاۋەلسىزدىكتىڭ شيرەك عاسىرىندا قازاقستاندا پەداگوگيكا سالاسى وڭدى-سولدى رەفورمالاۋعا ۇشىراپ، ءتۇرلى كەمشىلىكتەر قوردالانا كەلە جۇيەلى ماسەلەلەرگە اينالعان ەدى. كەيىنگى بىرەر جىلدا مەملەكەت بيۋروكراتيا مەن اكىمشىل-ءامىرشىل جۇيەنىڭ توقپاعىنا تۇسكەن ءبىلىم باعىتىن جاقسارتۋعا ءبىرشاما قادام جاسادى.
2019 جىلى 27 جەلتوقساندا وسى ولقىلىقتى تولتىرۋ ماقساتىندا 21 باپتان تۇراتىن، 500 مىڭنان استام پەداگوگتىڭ مۇددەسىن قورعاۋعا ارنالعان «پەداگوگ مارتەبەسى تۋرالى» زاڭ قابىلدانعان. الەۋمەتتىك قولداۋ، ۇستەماقى ارقىلى ىنتالاندىرۋ، بىلىكتىلىگىن ارتتىرۋ، جالاقى ءوسىمى سياقتى وڭ وزگەرىستەر بايقالادى. دەسە دە ءالى كۇنگە دەيىن كەي وڭىرلەردە مۇعالىمدى ارتىق جۇمىسقا جەگۋ: سايلاۋ، ساناق سياقتى ساياسي ناۋقاندارعا «جۇمساق تاسىلدەرمەن» تارتۋ، سەنبىلىك-تازالىق جۇمىستارىنا شىعارۋ، ەركىنەن تىس جۇكتەمە بەرۋ ءتارىزدى زاڭبۇزۋشىلىقتار ءجيى قايتالانادى.
الماتى وبل پركۋراتۋراسى. بەلسەندىلەر: «جالعان جالامەن قاماۋداعى ايگەرىم مەن دۋمانعا بوستاندىق!»
ارمان الىمبەكوۆ: مەن ول جەردىڭ رەزيدەنتسيا ەكەنىن بىلمەدىم. ەشنارسە بۇلدىرمەدىم.
قوساي ماحامباەۆ: وق تيگەن ادامدى قۇتقارام دەگەندە ءوزىمدى اتىپ تاستادى
رەزيدەنتسيا ءىسى. ورىنعازى سەرىكبول: بەيبىت شەرۋگە شىقتىم. ال، 269 باپتى مويىندامايمىن
كيبەرشابۋىلعا ۇشىراعان باق وكىلدەرى قۇقىق قورعاۋ ورگاندارىنا ارىز ءتۇسىردى