الماتىدا مەكتەپ مۇعالىمدەرى «جوندەۋ جۇمىسىنا جەگىلدى»

اپتا باسىندا رەداكتسياعا الماتى قالاسىندا ىبىراي التىنسارين اتىنداعى №159 مەكتەپ-گيمنازياسىنىڭ مۇعالىمدەرى وقۋ جىلىنىڭ العاشقى توقساندىعىنداعى دەمالىس كەزىندە «كاسىپتىك مىندەتتەرىمەن بايلانىستى ەمەس جۇمىس تۇرلەرىنە» ەرىكسىز تارتىلعانى تۋرالى اقپارات كەلىپ ءتۇستى. مەكەمە اكىمشىلىگى تاراپىنان قىسىمعا ۇشىراۋدان قاۋىپتەنگەن اتا-انا مەن مۇعالىمدەر اتى-ءجونىن اتاماۋدى سۇرادى.

رەداكتسياعا جۇگىنگەن مۇعالىمدەر تاۋەلسىزدىكپەن قۇرداس وقۋ وشاعىندا «پەداگوگيكا مارتەبەسى تۋرالى» زاڭنىڭ تاپتالعانىن ايتادى. دۇيسەنبى كۇنى جيىرما شاقتى مامان «دەمالىستا ىرقىنان تىس جۇمىسقا جەگىلگەن».

«ەر مۇعالىمدەر ءدالىز بەن باسپالداقپەن كوتەرىلەتىن كىرەبەرىستەردى اقتاپ-سىرلاۋعا مىندەتتەلدى، شكاف جىلجىتىپ، ستەندتەر مەن ورىندىقتاردى تاسىپ جاتتى. ال ايەل مۇعالىمدەر كىتاپ جيناپ، رەتتەستىردىك. بۇل كۇنى وزگە مەكتەپتەردەگى ارىپتەس قۇربىلارىمىز توقساندىق دەمالىستا بولدى. اعايلاردىڭ ايتۋىنشا، قابىرعانىڭ تومەنگى ەكى مەترىن سىرلاعان، جوعارعى بولىگىن اقتاعان. نەگىزى جازدا ارنايى جوندەۋدەن وتكەن. باسشىلىقتىڭ قايتا جاساتقانىنا قاراعاندا ساپاسىز بولعان شىعار، كىم ءبىلسىن. ول جاعىنان قۇرىلىس مامانى بولماعان سوڭ ايتا المايمىن»، – دەيدى نارازىلاردىڭ ءبىرى.

ءوزىنىڭ جانە ارىپتەستەرىنىڭ ەڭبەك قۇقىعى بۇزىلعانىنا نارازىلىعىن جەتكىزگەن پەداگوگ «مىندەتىنە جاتپايتىن اسارعا» 30 جىلدىق تاريحى بار مەكتەپتىڭ ەكىنشى ديرەكتورى «ەلميرا بيدايبەكوۆانىڭ تاپسىرماسى بويىنشا» شاقىرتىلعانىن ايتادى. 1 قاراشادا بولعان جايت بويىنشا رەداكتسيا الماتى قالاسىنىڭ ءبىلىم باسقارماسىنا جۇگىندى. باسقارمانىڭ ءباسپاسوز حاتشىسى قۋاندىق ەشىمەت «مەكتەپتى وزدىگىنەن تەكسەرە المايتىنىن» ايتىپ، قۇزىرەتتى مەكەمە رەتىندە قالالىق ءبىلىم سالاسىنداعى ساپانى قامتاماسىز ەتۋ دەپارتامەنتىنە سىلتەدى. QT ءبىلىم جانە عىلىم مينيسترلىگىنە اتالعان فاكت جونىندە بايانداپ، رەسمي تۇسىندىرمە سۇرادى. ۆەدومتسۆونىڭ ءباسپاسوز حاتشىسى ءمولدىر ابدۋاليەۆا تەكسەرىس باستالعانىن حابارلادى. ازىرگە بۇدان وزگە تولىمدى اقپارات بەرىلە قويمادى.

بۇعان دەيىن ءبىلىم وشاعىن 25 جىل بويى «قازاقستاننىڭ ەڭبەك ەرىك» ءارى «ەڭبەك سىڭىرگەن قايراتكەرى» ماراپاتىنىڭ يەگەرى ايگۇل ميرازوۆا باسقارعان. 800 وقۋشىعا ارنالعان، الايدا بۇگىندە 1,5 مىڭعا تارتا بالا ءبىلىم الاتىن مەكتەپ 1991 جىلى قۇرىلعان.

تاۋەلسىزدىكتىڭ 10 جانە 20 جىلدىق تۇسىندا قاتارىنان ەكى رەت «تاڭداۋلى مەكتەپ» بايقاۋىنىڭ باس جۇلدەگەرى اتانعان مەكتەپ بيىل وتىزجىلدىقتا مۇعالىمدەردى قىزمەتىنە جاتپايتىن جۇمىسقا «جەگۋىنىڭ» سەبەبى ازىرگە بەلگىسىز. اتا-انانىڭ ءبىرى مۇنى جازعى جوندەۋ كەزەڭىندەگى سالعىرتتىقتىڭ سالدارىن جاماپ-جاسقاۋ دەپ ەسەپتەيدى.

اشىق دەرەككوزدەگى مالىمەتتەرگە قاراعاندا, ءبىلىم مەكەمەسى كەيىنگى بەس جىلدا مەملەكەتكە 207 ميلليون تەڭگە الىم-سالىق تولەگەن. بيىلدىڭ وزىندە مەجە 60 ملن تەڭگە قارجىعا جۋىقتاعان.

ەگەمەندىكتىڭ شيرەك عاسىرىندا قازاقستاندا پەداگوگيكا سالاسى وڭدى-سولدى رەفورمالاۋعا ۇشىراپ، ءتۇرلى كەمشىلىكتەر قوردالانا كەلە جۇيەلى ماسەلەلەرگە اينالعان ەدى. كەيىنگى بىرەر جىلدا مەملەكەت بيۋروكراتيا مەن اكىمشىل-ءامىرشىل جۇيەنىڭ توقپاعىنا تۇسكەن ءبىلىم باعىتىن جاقسارتۋعا ءبىرشاما قادام جاسادى.

2019 جىلى 27 جەلتوقساندا وسى ولقىلىقتى تولتىرۋ ماقساتىندا 21 باپتان تۇراتىن، 500 مىڭنان استام پەداگوگتىڭ مۇددەسىن قورعاۋعا ارنالعان «پەداگوگ مارتەبەسى تۋرالى» زاڭ قابىلدانعان. الەۋمەتتىك قولداۋ، ۇستەماقى ارقىلى ىنتالاندىرۋ، بىلىكتىلىگىن ارتتىرۋ، جالاقى ءوسىمى سياقتى وڭ وزگەرىستەر بايقالعانىمەن ءالى كۇنگە دەيىن كەي وڭىرلەردە مۇعالىمدى ارتىق جۇمىسقا جەگۋ: سايلاۋ، ساناق سياقتى ساياسي ناۋقاندارعا «جۇمساق تاسىلدەرمەن» تارتۋ، سەنبىلىك-تازالىق جۇمىستارىنا شىعارۋ، ەركىنەن تىس جۇكتەمە بەرۋ ءتارىزدى زاڭبۇزۋشىلىقتار بولىپ تۇرادى.

زاڭعا سايكەس، پەداگوگتەردى وزىنە ءتان ەمەس فۋنكتسيالارعا تارتقانى ءۇشىن باسشىلىق وكىلدەرىنە 20-دان 120 اەك ارالىعىندا، ياعني 58 مىڭ تەڭگەدەن 350 مىڭ تەڭگەگە دەيىن ايىپپۇل قاراستىرىلعان.

The Qazaq Times