«پۋتين، قازاق ەلىنەن قولىڭدى تارت». شىمكەنتتە بەلسەندىلەر قۋات احمەتوۆتى قۋدالاماۋدى تالاپ ەتتى

بۇگىن، 8 قىركۇيەك كۇنى شىمكەنت قالالىق پروكۋراتۋراسىنىڭ الدىنا جينالعان ون شاقتى ازاماتتىق بەلسەندى "Til Maydani ونلاين پارتياسى" Youtube ارناسىنىڭ اۆتورى، قازاق تىلىندە قىزمەت كورسەتۋدى تالاپ ەتكەنى ءۇشىن ۇستىنەن قىلمىستىق ءىس قوزعالىپ، ەلدەن كەتكەن قۋات احمەتوۆتى ەلگە قايتارۋدى تالاپ ەتتى. بۇل تۋرالى ازاتتىق راديوسى حابارلادى. 

باسىلىمنىڭ جازۋىنشا، بەلسەندىلەر رەسەيدەن قازاقستاننىڭ ىشكى ىسىنە ارالاسپاۋىن تالاپ ەتكەن.

قولدارىنا "پۋتين قازاق جەرىنەن قولىڭدى تارت!" دەگەن جازۋى بار پلاكات ۇستاپ تۇرعان بەلسەندىلەر اۋەلى "قۋات احمەتوۆ ەلگە قايتارىلسىن!" دەپ ايقايلادى. ونى كورگەن پروكۋراتۋرا قىزمەتكەرى زاڭسىز ميتينگ وتكىزۋگە بولمايتىنىن ەسكەرتتى.

سودان كەيىن بەلسەندىلەر قازاقستاننىڭ باس پروكۋرورى عيزات نۇرداۋلەتوۆتىڭ اتىنا حات تاپسىردى. وندا حات اۆتورلارى وزگە ەلگە قازاقستاننىڭ ىشكى ىسىنە ارالاسۋىنا جول بەرمەۋدى، ازاماتتاردىڭ انا تىلىندە قىزمەت الۋ جونىندەگى كونستيتۋتسيالىق قۇقىعىن قامتاماسىز ەتۋدى، ءتىل بەلسەندىسى قۋات احمەتوۆتىڭ ۇستىنەن قوزعالعان قىلمىستىق ءىستى قىسقارتىپ، ەلگە قايتارۋدى تالاپ ەتكەن.

- قۋات احمەتوۆتى قۋدالاۋ توقتاتىلسىن. قازاقستاندا مەملەكەتتىك ءتىل رەتىندە قازاق ءتىلىنىڭ ستاتۋسى تۋرالى جەكە دارا زاڭ قابىلدانۋى كەرەك، - دەدى نارازى بەلسەندىلەردىڭ ءبىرى قالماحان ومار.

بەلسەندىلەردى اكىمدىك قىزمەتكەرلەرى مەن پوليتسيا سىرتتان باقىلاپ، كۇزەتىپ تۇردى. نارازىلار تالاپتارى ورىندالماعان جاعدايدا جاپپاي ميتينگىگە شىعاتىنىن ەسكەرتىپ تارادى.

"Til Maydani ونلاين پارتياسى" Youtube ارناسىنىڭ اۆتورى، ازاماتتىق بەلسەندى قۋات احمەتوۆتىڭ ەلدەن شىعىپ، كيەۆكە كەتكەنى تۋرالى 31 تامىزدا حابارلاندى. ادۆوكات ابزال قۇسپان قورعاۋىنداعى احمەتوۆتىڭ مۇنداي شەشىم قابىلداۋىنا قازاقستان باس پروكۋراتۋراسىنىڭ ونىڭ ۇستىنەن قىلمىستىق كودەكستىڭ 174-بابىمەن ("ۇلت ارازدىعىن قوزدىرۋ") قىلمىستىق ءىس قوزعاعانى سەبەپ بولعانىن ايتقان.

The Qazaq Times