"باقىت كىلتى" – "التىن قاناتتى قۇلىن"

م.اۋەزوۆ اتىنداعى قازاق مەملەكەتتىك اكادەميالىق دراما تەاترىندا قولعانات مۇراتتىڭ «باقىت كىلتى» اتتى درامالىق قويىلىمىنىڭ تۇساۋى كەسىلدى.  ەسمۇحان وباەۆ قويعان بۇل تۋىندى – بۇگىنگى كۇننىڭ باستى تاقىرىبىن  قوزعاعان جانە جاس دراماتۋرگ ق.مۇراتتىڭ  ۇلكەن ساحنادا قويىلعان العاشقى تۋىندىسى.

جالپى، قويىلىم جەلىسى بىلاي ءوربيدى: باۋىرجان ەسىمدى جاس كاسىپكەر  العاشقى ەڭبەك جولىن تۇرالاپ قالعان التىن كەنىشىن قايتا جانداندىرۋ جۇمىستارىنان باستايدى. اتالمىش جەردەن التىن ءوندىرىپ، حالىقتىڭ يگىلىگىنە جۇمىس جاساماق. و باستا كەنىشتى قىرۋار قارىزدارىمەن ساتىپ العان كاسىپكەر جان-جاقتان قىسىمعا الىنادى. سەبەبى، بىرىنشىدەن، جۇمىسشىلاردىڭ ەڭبەكاقىسىن تولەۋ كەرەك. ەكىنشىدەن بۇل جەردە كولەڭكەلى  جولمەن پايدا تاۋىپ وتىرعان بۇزاقى توپ بار، بولىنگەن ينۆەستيتسيادان  ءوز ۇلەسىن الۋدى كوزدەگەن سىبايلاس جەمقورلار بار. باۋىرجانعا وڭايلىقپەن جول بەرەر ەمەس،  ءتىپتى  ونىڭ جەكە باسىنا قاۋىپ توندىرەدى. زۇلىمدىق پەن ىزگىلىك. جالعاندىق پەن اقيقات. ادالدىق پەن ساتقىندىق. ەكىجۇزدىلىك پەن بىربەتكەيلىك. وسى قاسيەتتەردىڭ بارلىعى ءبىر قويىلىمنىڭ ءون بويىنان تابىلعان. تەاترعا كەلگەن كوپ كورەرمەننىڭ ويىندا، قويىلىم جەلىسىندەگى باقىتتىڭ كىلتى ماحاببات پەن دوستىقتا، نە بولماسا اتاق پەن بايلىقتا بولادى دەگەن بولجام بولدى. ولاي ەمەس ەكەن. راس، اركىمنىڭ ۇعىمىنداعى باقىت ءار قيلى. «بىرەۋگە مال قايعى، بىرەۋگە جان قايعى» دەپ قازاق بەكەر ايتپاسا كەرەك. «باقىت كىلتى» باقىتتىڭ كىلتىنىڭ  ادالدىقتا (ەلىڭە، وتباسىڭا، جارىڭا، ماماندىعىڭا، وزىڭە) ەكەنىن مەڭزەيدى. نامىسشىل دا جاڭاشىل جاس ۇرپاقتىڭ جەڭىسكە جەتۋ جولىن  كوركەم بەينەلەيتىن بۇل  قويىلىم  بۇگىنگى كۇننىڭ   شىندىقتارىن  العا تارتادى. دەگەنمەن، كەمشىلىكسىز ەمەس. وسى ورايدا نازارلارىڭىزعا قويىلىم جايلى پىكىر ۇسىنامىز:

فوتو: auezov-theatre.kz

مافيانىڭ مۇگەدەك بالاسىنىڭ ءرولى عانا شىنايى شىقتى

اسەل سارقىت، جۋرناليست: «العاشىندا، قويىلىمنىڭ نە تۋرالى ەكەنىن بىلسەم دە، اتاۋىنا قاراپ ليريكالىق ەپيزودتار باسىم بولار دەپ ەدىك. الايدا، قويىلىم "باقىتتىڭ كىلتى شىندىقتا" دەگەن ويعا قۇرىلعان ەكەن. ماعان اسا ۇناعان جوق: ەپيزودتار اراسى دۇرىس بايلانىسپاعان سياقتى. تۇسىنىكسىز. ماسەلەن، باۋىرجانعا "مەن سەنى الىپ كەتۋگە كەلدىم",  – دەپ كەلە بەرەتىن كەيىپكەردى مافيانىڭ اتقوسشىسى دەپ ويلادىق. كەيىن قويىلىم بروشيۋراسىنان عانا ونىڭ ەلەس بولعانىن بىلدىك. ەگەر ول ەلەس كورەتىن بولسا، كەيىپكەردىڭ پسيحولوگياسىندا بىردەڭە دۇرىس ەمەس پە دەگەن وي كەلدى. سول كەزدە ەشتەڭە كورمەي، جەردە جاتقان باۋىرجان ايەلى كەلىسىمەن بىردەن «ەسىن جيناپ»، ءان ايتقانى دا سەنىمسىزدەۋ. ستسەناري شيكىلەۋ سەكىلدى... ەركەبۇلان دايىروۆ بيزنەسمەن رەتىندە سەندىرە المادى. ازات سەيتمەتوۆتى دا ىلعي جاعىمدى وبرازدا كورگەندىكتەن بولار، ءوز باسىم جاعىمسىز كەيىپكەر رەتىندە قابىلداي المادىم. مافيانىڭ مۇگەدەك بالاسىنىڭ عانا ءرولى شىنايى شىقتى. بالاڭ كوڭىل اكەسىنىڭ «قۋىرشاق» ەكەنىن سەزگەن، «اكە، سەن جاقسى ادامسىڭ با؟» دەگەن سۇراعى جۇرەگىمىزدى ەلجىرەتىپ جىبەردى،  تازالىقتىڭ بەلگىسىندەي كورىندى. دەكوراتسيا ۇنادى. ال  قويىلىم باسىنداعى قارالى حابار كورىنىسى مەن وت ورتاسىنان باۋىرجاندى ايەلى تاۋىپ الىپ، جۇلدىزعا قارايتىن ساتىنەن جاسالاتىن ليريكالىق شەگىنىسى ساتسىزدەۋ. كورەرمەننىڭ كوپشىلىگى وسى تۇسىن تۇسىنبەگەنىن ايتىپ بارا جاتتى...»

فوتو: auezov-theatre.kz

باۋىرجان اساۋباەۆتى زەرتتەپ شىعۋ ءىسىن سىيلاعان تەاتر ەڭبەگىنە العىس

جامال جاقسىتاي. ينستاگرامم پاراقشاسىنان: «قويىلىم ەلدەگى ەڭ باي 20 ادامنىڭ تىزىمىندە بولعان، قازاقستانداعى اسا ءىرى التىن ءوندىرۋشى كومپانيا "Altyn Group Kazakhstan" كاسىپورنىنىڭ قوجايىنى باۋىرجان اساۋباەۆتىڭ جول كولىك اپاتىنان كوز جۇمعانى جونىندەگى راديونىڭ xابارلاماسىمەن باستالادى. كەيىنىرەك، كاسىپورىن ديرەكتورىنىڭ ءولىم قۇشقانعا دەيىنگى باسىنان وتكىزگەن ناۋبەتتەرىمەن ءوربيدى. قازاق بيزنەسىنىڭ بەت-بەينەسى، "اعا-كوكە" دەگەن تۇسىنىككە يىلە قويماعان ادال كاسىپكەردىڭ اجالمەن سويلەسكەن ىشكى كۇيزەلىسى، قاساقانا ۇيىمداستىرىلعان "كەن ورىن اپاتى", ءبىلىمدى گەولوگتىڭ ارقاسىندا جۇمىسى جۇرگەن اسۋباەۆتار اۋلەتىنىڭ ەكى مينۋتقا جەتپەگەن جەڭىستى ءساتى، ءسابي كۇنىندە بانديتتەر كوزىنشە اناسى مەن باۋىرىن باۋىزداپ، بولشەكتەپ كەتكەننەن كەيىنگى كەمتارلىق پەن پسيxولوگيالىق اۋىتقۋعا دۋشار بولعان مۇگەدەك بالانىڭ اكەسىنىڭ بيزنەستەگى تىرلىكتەرىنە بالا كوڭىلمەن جيىركەنگەن تۇستارى جۇرەكتى قوزعاماي قويمايدى. تۇسىنبەيمىن نەگە ءبارى تەك "ساۋلەم-اۋ" نەمەسە ماxاببات پوەزياسىمەن سۇيەمەلدەنگەن ياكي فيلوسوفيالىق جان تەبىرەنىستەرىنە تۇسىرەتىن قويىلىمدارعا "كەرامات" دەپ شىعامىز؟ ال بۇل قويىلىم جايلى رەتسەنزيا ءتىپتى از. قيال اسپانىنان ءتۇسىپ، شىنايى ومىردە بولىپ جاتقان الەۋمەتتىك، قوعامدىق، مەملەكەتتىك ماسەلەلەرمەن اۋىراتىن "جىپ-جيىرما بەس" جاستاعى سانالى مەملەكەتپىز عوي... ال ماعان باۋىرجان اساۋباەۆ تۋرالى ينتەرنەتتەگى بارلىق ماقالالار مەن جاريالىنىمداردى زەرتتەپ شىعۋ ءىسىن سىيلاعان اتالمىش تەاتردىڭ ەڭبەگىنە العىس. مەن جاي عانا "گاككۋ جۇلدىزدارىنىڭ" ەمەس بيزنەس جۇلدىزدارىنىڭ فاناتى كوپ بولعانىن قالايمىن. ال ەركەبۇلان دايىروۆ ونەردەگى تاعى ءبىر كەزەكتى "باۋىرجان" ءرولىن ءساتتى سومداپ شىقتى».

فوتو: auezov-theatre.kz

ەڭ وزىق تەحنولوگيالار پايدالانىلاتىن بۇل قويىلىمنىڭ سوزبەن ايتىپ جەتكىزۋگە كەلمەيتىن دۇنيەلەرىن سول تەحنيكالار ارقىلى تۇسىنگەندەي بولدىق. ساحنا جوعارى دەڭگەيدە بەزەندىرىلگەن...

جاس كاسىپكەردىڭ تاعدىرلى عۇمىرىن كورسەتكەن بۇل قويىلىم كورەرمەن نازارىنا ۇسىنىلعانىنا كوپ بولعان جوق.  قويىلىم سوڭىندا باستى كەيىپكەردىڭ «مەن شىندىقپىن، مەن اقيقاتپىن» دەپ جار سالعانى كوڭىلگە قونبادى.  كورەرمەننىڭ كوكەيىندە قالعان سۇراق كوپ، الايدا... بۇنى رەجيسسەرلىك شەشىم بولار دەپ توپشىلادىق تا قويدىق.    «شىركى-ءى-ءىن، ارمانىڭدى ورىندايتىن التىن قاناتتى قۇلىن بولسا عوي»، – دەيتىن باۋىرجاننىڭ ارمانى كوكەيىمىزدە قالىپ قويىپتى. ونداي قۇلىن بار عوي، راسىمەن. تەك ەسسىز سەنە ءبىلۋ كەرەك. «قازاق جالقاۋ ەمەس! قازاقتىڭ دا  قولىنان بيزنەس جاساۋ كەلەتىندىگىن دالەلدەيمىن!» بۇل – باۋىرجاننىڭ ۇرانى. ءبىر جاعى، بۇگىنگى تاڭدا جاستار اراسىنان دراماتۋرگ جوق دەيتىن سىنعا ايتىلعان قولعانات مۇراتتىڭ ۇرانى سياقتى كورىندى. كورەرمەنگە وي تاستاي بىلگەن دراماتۋرگ – جاقسى دراماتۋرگ.  يا، "قازاقتىڭ قولىنان ءبارى كەلەدى". ءار قازاق وسىنداي ۇرانمەن ەڭبەك ەتسە، بىزدەن باقىتتى حالىق بولماس ەدى.

جوعارىدا پرەمەرادان شىققان ەكى قاراكوزدىڭ پىكىرىن وقىدىڭىزدار. اسەل مەن جامال  بارىن بار، جوعىن جوق دەپ باعالادى. ال تۇتاستاي شىعارماعا جاقسى نە جامان دەپ شورت كەسىپ، باعا بەرۋگە بولماس. سەبەبى، ەڭبەك بار. م.گوركي:  «ەرلىك اتاۋلىنىڭ ىشىندەگى ەڭ كەرەمەتى – ەڭبەك ەرلىگى» دەيدى. ساحنادا اق تەر، كوك تەر بولىپ، كورەرمەنگە جەتكىزۋ ءۇشىن بارىن سالعان 40 شاقتى (تەك ءبىر قويىلىمدا), ساحنا سىرتىندا ولاردى دايىنداعان، ساحنا تورىندەگى تەحنيكالاردى باسقارىپ وتىرعاندار، رەجيسسەر، دراماتۋرگ، قانشاما ماماندار كۇش جۇمسادى. ەرلەدى. پرەمەرا قۇتتى بولسىن!   تەاتردا جولىعايىق، كورەرمەن!

«The Qazaq Times»