رەسەي دەپۋتاتى: قازاقستاننىڭ ءوز جولى بار جانە ولار رەسەيدىڭ ساياساتىن ۇستانبايدى

رەسەي مەملەكەتتىك دۋماسىنىڭ دەپۋتاتى كونستانتين زايتۋلين: «قازاقستاننىڭ ءوز جولى بار جانە ولار رەسەيدىڭ ساياساتىن ۇستانبايدى» – دەپ مالىمدەدى.

ءساۋىر ايىنىڭ 14-ءى كۇنى اقش، ۇلىبريتانيا جانە فرانتسيا قارۋلى كۇشتەرىنىڭ سۇرياعا جاساعان اۋە شابۋىلىنان كەيىن «روسسيا-1» تەلەارناسىندا «ۆوسكرەسنىي ۆەچەر س ۆلاديميروم سولوۆەۆىم» باعدارلاماسىندا رەسەي مەملەكەتتىك دۋماسىنىڭ تمد، ەۋرازيالىق ينتەگراتسيا جانە وتانداستارمەن قارىم-قاتىناس كوميتەتى توراعاسىنىڭ ءبىرىنشى ورىنباسارى كونستانتين زايتۋلين ءسۇريا ماسەلەسىندەگى قازاقستاننىڭ ورنى جونىندە پىكىر ءبىلدىردى. وندا ول: «ەگەر قازاقستان جونىندە اڭگىمە قوزعايتىن بولساق. شىن مانىندە قازىر قازاقستان باياۋ بولسا دا قازاقيلاندىرۋ ساياساتىن جۇرگىزىپ كەلەدى. 1991 جىلعا دەيىن قازاقستاندا ورىستار سانى كوپ بولعان. بىراق قازىر جاعداي باسقا. ولاردىڭ سانى قازىر كەرسىنشە از. قازاقستان ءاۋ باستا ۋكراينامەن سالىستىرعاندا وزگەشە جول تاڭداعان. ول رەسەيمەن دوستىق قارىم-قاتىناس ورناتۋ ارقىلى ءوزىنىڭ ىشكى ساياساتىنا ارالاستىرماۋدى قالادى. رەسەي ءوزىن سولاي ۇستادى. قازىر قازاقستاندا بولىپ جاتقان جاعدايلار «باسشىنىڭ قارتايۋىمەن» بايلانىستى. ءبىز وزبەكستاندا نە بولعانىن بىلەمىز. وندا بارلىعى تىنىش وتكەنىمەن يسلام كارىموۆتىڭ وتباسى بيلىك تەتىكتەرىنەن الاستاتىلدى. ونىڭ ۇلكەن قىزى ءتىرى مە، ءولى مە ءالى كۇنگە دەيىن بەلگىسىز. نازارباەۆ ءدال وسىنداي جاعداي بولعانىن قالامايدى. بۇعان دەيىن اقش-تا سامۇرىق قازىنا ۇلتتىق قورىنىڭ 40 پايىز قارجىسى بۇعاتتالعان بولاتىن. جەلتوقسان ايىندا نازارباەۆ اقش-قا بارىپ اق ءۇي اكىمشىلىگىمەن كەزدەسكەن. وسىدان كەيىن قازاقستان قارجىسى بۇعاتتان شىعارىلعان. الايدا وسى جەردە ايتا كەتەتىن ءبىر جايت بار، نازارباەۆ وسىدان كەيىن رەسەيگە كەلىپ، ءوز قادامدارىن تۇسىندىرگەندەي بولعان. بىراق قارجى بۇعاتىنان بولەك بەلگىلى ءبىر كەلىسسوزدەر بولعان سياقتى. قازاقستاننىڭ حالىقارالىق ارەنادا ءوزىنىڭ جولى بار جانە ولار رەسەيدىڭ ساياساتىن ۇستانبايدى» - دەگەن.

“The Qazaq Times”