بۇۇ الداعى ەكى جىل ىشىندە تۋعان ەلدەرىنە قايتاتىن روحيندجا مۇسىلماندارىنىڭ ميانماداعى قاۋىپسىزدىگى ءۇشىن الاڭداۋشىلىق ءبىلدىردى. وتكەن جىلدىڭ قاراشا ايىندا بانگلادەش پەن ميانما وكىلدەرىنىڭ بىرلەسكەن كەزدەسۋىندە بوسقىنداردى بيرماعا قايتارۋدىڭ جوسپارى بەلگىلەنگەن بولاتىن. وعان سايكەس، ايىنا 1 مىڭ 550 بوسقىن بانگلادەشتەگى ترانزيتتىك لاگەرلەردەن ميانماعا ورالادى. جەرگىلىكتى پوليتسيا مەن روحيندجانى قۇتقارۋ ارمياسى مۇشەلەرىنىڭ اراسىندا بولعان قاقتىعىس سالدارىنان تۋعان جەرىن تاستاپ كەتكەن مۇسىلمانداردىڭ بىرقاتارى، وزدەرىنە ازاماتتىق بەرمەگەن مەملەكەتكە قايتۋدان باس تارتىپ وتىر. 

بانگلادەشتىڭ سىرتقى ىستەر مينيسترلىگىنىڭ حابارلاۋىنشا، بوسقىنداردى تىركەپ، انىقتاما بەرۋمەن جانە ولاردى ميانمادا قابىلداۋمەن اينالىساتىن ەكى ءتۇرلى جۇمىس توبى قۇرىلادى. 25 تامىز وقيعاسىنان كەيىن كورشى مەملەكەتكە باس ساۋعالاپ كەلگەن 650 مىڭعا جۋىق روحيندجا مۇسىلمانىن ميانماعا اتتاندىرۋ ءۇشىن 5 ترانزيتتىك لاگەر قۇرىلىپ، قارسى مەملەكەتتە 2 قابىلداۋ پۋكتى ىسكە قوسىلادى دەپ كۇتىلۋدە. بۇۇ-نىڭ بوسقىندار ماسەلەسى جونىندەگى اگەنتتىگىنىڭ قىزمەتكەرى كارولينە گلاك ءال-جازيرا اقپاراتتىق اگەنتتىگىنە بەرگەن سۇحباتىندا مۇسىلمانداردىڭ بانگلادەشتە دە، ميانمادا دا قاۋىپسىزدىكتە بولارىنا كەپىلدىك بەرىلۋى ءتيىس ەكەنىن اتاپ ءوتتى.

روحيندجا مۇسىلماندارى بيرمادا بۇرىننان تۇراتىندارىنا قاراماستان، ميانما بيلىگى ولارعا ازاماتتىق بەرمەي كەلگەن. جاسى جۇزدەن اسقان ابد-ۋس-سالام روحيندجا مۇسىلماندارىنا ميانمادا قالۋ قاۋىپتى ەكەنىن ايتادى. ء"ال-جازيراعا" بەرگەن سۇحباتىندا: ء"بىزدى ميانماعا قايتارماڭىزدار، ولار ءبارىمىزدى تۇگەل ولتىرەدى" دەگەن. بانگلادەشتەگى بوسقىندار لاگەرىن پانالاپ وتىرعان تاعى ءبىر مۇسىلمان تاسليما بەگام ميانماعا قايتقاننان، "ولگەنى ارتىق ەكەنىن" ايتقان.

بۇۇ مەن قۇقىق قورعاۋ ۇيىمدارى بانگلادەش پەن ميانما اراسىندا جاسالعان رەپاترياتسيا جوسپارى بوسقىنداردىڭ قاۋىپسىزدىگىن قامتاماسىز ەتە الاتىنىنا سەنبەيدى. كارولينە گلاك روحيندجا مۇسىلماندارىنا ازاماتتىق بەرۋ ماسەلەسى قاراستىرىلىپ، زاڭ جۇزىندەگى قۇقىقتارىنا قول جەتكىزۋ مۇمكىندىگى قاراستىرىلمايىنشا، بوسقىندار ميانماعا قايتۋ جوسپارىن قولدامايتىنىن حابارلادى.

“The Qazaq Times”